இந்தியாவில் உள்ள முக்கிய காடுகள். மார்ச்: 21 உலக வனதினம்

by **சிவா** Wed Mar 21, 2012 8:22 pm

இந்தியாவில் நிலத்தோற்றம், மண் வகை, தட்பவெப்பநிலை ஆகியவற்றிற்கேற்ப காடுகளில் வளரும் தாவரங்கள் மாறுபடுகின்றன. அவை, மலைக்காடுகள், கலப்புக்காடுகள், ஊசியிலைக் காடுகள், இலையுதிர் காடுகள், பாலைவனக் காடுகள், சதுப்பு நிலக்காடுகள்.

மலைக் காடுகள்: மலைகளின் அடிவாரப் பகுதிகள், கீழ்ச்சரிவுகளில் வெப்பமும், மழையும் அதிகமாக காணப்படும். இமய மலையின் வடகிழக்குப் பகுதிகள் மற்றும் மேற்குத் தொடர்ச்சி மலையின் மேற்குச் சரிவுகளில் அடிவாரத்தில் இருந்து ஏறத்தாழ ஆயிரம் மீட்டர் வரை அடர்ந்த காடுகள் காணப்படுகின்றன. இவற்றோடு பலவகை செடி, கொடிகளும் படர்ந்து இருக்கும். ஆண்டு முழுவதும் பசுமையான தோற்றத்துடன் இருப்பதால், இவற்றை பசுமையிலைக் காடுகள் என்று அழைக்கின்றனர். இங்கு எபனி, தேவதாரு, ரோஸ்வுட், கருங்காலி போன்ற மரங்கள் வளர்கின்றன.

கலப்புக்காடுகள்: ஆயிரம் மீட்டர் முதல் 2 ஆயிரம் மீட்டர் வரையில் உள்ள சரிவில் மழை நீர் தங்காது. வெப்பம் குறைவு. எனவே, மரங்கள் அடர்ந்து வளராமல் தனித்து மரங்களும் புதர்ச்செடிகளும், கொடி வகைகளும் கலந்து காணப்படும். இந்த தாவரங்கள் உள்ள பகுதியை `கலப்புக்காடுகள்' என்கின்றனர்.

ஊசியிலைக் காடுகள்: சுமார் 2ஆயிரத்து 500 மீட்டருக்கு மேற்பட்ட உயரங்களில் வெப்பம் குறைவு. பனி அதிகம். இங்குள்ள குளிரையும், பனியையும் தாங்கும் விதத்தில் ஊசி போன்ற இலைகளைப் பெற்றுள்ள தாவரங்கள் வளரும். இவற்றை `ஊசியிலைக் காடுகள்' என்பர். இங்கு பைன், பர் போன்ற மரங்கள் வளரும்.

காணப்படும் இடம்: இமயமலைப் பகுதிகளில் இந்த காடுகள் உள்ளன.

4 ஆயிரம் மீட்டர் உயரத்திற்கும் மேற்பட்ட பகுதியில் எப்போதும் பனி மூடி இருக்கும். எனவே, இந்த இடங்களில் தாவரங்கள் வளர்வதில்லை.

இலையுதிர் காடுகள்: போதுமான வெப்பமும், மண்வளமும் இருந்தாலும், ஒரு சில மாதங்களே பனிப்பொழிவுள்ள இடங்களில் கோடை வறட்சியைத் தாங்குவதற்காக இலைகளை உதிர்க் கும் தாவரம் கொண்ட காடுகளை இலையுதிர் காடுகள் அல்லது பருவக்காற்று காடுகள் என்பர்.

காணப்படும் இடம்: தக்காணப் பீடபூமியிலும், மேற்குத் தொடர்ச்சி மலையில் கிழக்கு, மேற்குச் சரிவுகளிலும், இமயமலை அடிவாரத்தின் மேற்குப் பகுதிகளிலும் இந்த காடுகள் உள்ளன. இங்கு தேக்கு, சால், செம்மரம், சந்தன மரம், மூங்கில் போன்றவை அதிகளவில் காணப்படுகின்றன.

தீபகற்ப இந்தியாவின் மத்தியிலும், புறதீபகற்ப இந்தியாவின் வடமேற்கிலும் மழை குறைவு. வெப்பம் அதிகம். இந்த சூழ்நிலைக்கேற்ப புற்களும், முட்புதர்களும், குறுஞ்செடிகளும் வளர்கின்றன.

பாலைவனக் காடுகள்: இங்குள்ள தாவரங்கள், ஆண்டு முழுவதும் வெப்பம் அதிகமாக காணப்படும் தாவரங்கள். ஒருசில நேரங்களில் மட்டுமே மழை என்ற நிலையில் நீரை வீணாக்காமல், நீண்டகாலம் தண்டில் தேக்கி வைத்து வாழ்கின்றன. சப்பாத்திக்கள்ளி, கற்றாழை போன்ற இலைகள் இல்லாத தண்டுகள் கொண்டவை.

காணப்படும் இடம்: புறதீபகற்ப இந்தியாவின் வடமேற்குப் பகுதியில் உள்ள தார்பாலைவனத்தில் காணப்படுகின்றன.

சதுப்பு நிலக்காடுகள்: கழிமுகப் பகுதிகள், கடல் நீர் ஓதங்கள், அலைகள் போன்றவை இருப்பதால், நீர் எப்போதும் சேர்ந்து சதுப்பு நிலம் ஆகி விடுகிறது. சதுப்பு நிலக் காடுகளில் சுரபுன்னை மரங்கள் அதிகளவில் உள்ளன.

காணப்படும் இடம்: கங்கை நதிக் கழிமுகத்தில் காணப்படும் இத்தகைய காடுகள் `சுந்தரவனக்காடுகள்' என்று அழைக்கப்படுகின்றன.

இத்தகைய தாவரங்கள் மகாநதி, கோதாவரி, கிருஷ்ணா நதியின் கழிமுகங்களிலும், அந்தமான்- நிகோபார் பகுதிகளிலும், தமிழகத்தில் பிச்சாவரம், கோடியக்கரை பகுதிகளிலும், கேரளாவில் வேம்ப நாட்டிலும், கர்நாடகாவில் கூந்தப்பூரிலும், மகா ராஷ்டிராவில் ரத்னகிரி, அக்ராவிலும், குஜராத்தில் கட்ச் வளைகுடா பகுதிகளிலும் காணப்படுகின்றன.

"மரம் வளர்ப்போம். மழை பெறுவோம்'' என்பதற்கேற்ப காடுகளைப் பராமரித்தல், மரம் வெட்டுதல், காட்டை அழித்து விளைநிலமாக்குதல், ஆக்கிரமிப்பு செய்வது போன்றவற்றை தடுக்கும் வகையில், டேராடூனில் வனத்துறை ஆராய்ச்சி மையம் செயல்பட்டு வருகிறது.

தினதந்தி