புதிய ஐ-பேட் வழங்க முடியாமல் ஆப்பிள் திண்டாட்டம்

by **சிவா** Wed Mar 21, 2012 8:13 pm

ஆப்பிள் நிறுவனத்தின் சாதனங்கள் வெளி வரும் போதெல்லாம், முதல் நாளே கடைகளில் பெருங் கூட்டம் அலை மோதும். அன்றே வாங்கியாக வேண்டும் என்பது போல மக்கள் வெறியுடன் கடை முன் கூடி வாங்க முயற்சிப்பார்கள். இப்போதெல்லாம், ஆப்பிள் தன் இணைய தளம் மூலமும் விற்பனை செய்திட நடவடிக்கை எடுத்துள்ளது. விற்பனை மையங்களில் சென்று வாங்க முடியாமல் திரும்பும் ஏமாற்றத்தினைத் தவிர்க்க, மக்கள் இணைய தளத்தில் புதிய ஐ-பேடிற்குப் பதிந்து வைத்துள்ளனர்.

ஆனால், பதிந்தவர்களின் எண்ணிக்கை எதிர்பார்த்ததற்கு மேலாக இருப்பதால், அவர்களுக்கு மார்ச் 16 அன்று வழங்க முடியாத நிலைக்கு ஆப்பிள் தள்ளப் பட்டுள்ளது, இதனால், ஒரு நபர் இரண்டு ஐ-பேட் மட்டுமே ஆர்டர் செய்திட முடியும் என்ற கட்டுப்பாட்டினை விதித்துள்ளது. பதிந்தவர்கள் மார்ச் 19 வரை காத்திருக்க வேண்டியதிருக்கும் என்ற தகவலும் தரப்பட் டுள்ளது. இதனால், விற்பனை மையங்களில் கூட்டம் அதிகமாகும் சூழ்நிலை ஏற்பட் டுள்ளது.

மையங்களில் கூட்டம் கூடுகிறது என்ற தகவல் உண்மையா என்ற ஐயம் சிலருக்கு எழலாம். சென்ற முறை, ஜனவரி மாதத்தில், சீனாவின் தலைநகர் பெய்ஜிங்கில், ஐபோன் 4 எஸ் விற்பனை செய்திடும் ஆப்பிள் மையம், அறிவித்தபடி விற்பனையை மேற்கொள்ள முடியாது என அறிவித்த போது, கூடி இருந்தவர்கள், முட்டைகளையும், கற்களையும் கடை மீது எறிந்து சேதப்படுத்தினார்கள்.

2012 ஆம் ஆண்டில், 7 கோடி புதிய ஐ-பேட் விற்பனை செய்யப்படும் என ஆய்வு மையங்கள் எதிர்பார்த்துள்ளன. இது ஆப்பிள் நிறுவனத்தின் விற்பனை 71% உயர வழி வகுக்கும்.

கம்ப்யூட்டர் மலர்

by **சிவா** Wed Mar 21, 2012 8:14 pm

புதிய ஐ-பேட் வாங்க அலைமோதிய கூட்டம்!

அமெரிக்கா மற்றும் ஐரோப்பிய நாடுகளிலும், தென் கிழக்கு ஆசிய நாடுகளிலும், ஆஸ்திரேலியாவிலும், மார்ச் 16 வெள்ளிக் கிழமை அன்று புதிய ஐ-பேட் விற்பனைக்கு வந்தது. முதலில் இதனைப் பெற்றவர், ஆஸ்திரேலியாவில், சிட்னி நகரில், டேவிட் டாராசென்கோ என்பவர். இந்நகரில் ஜார்ஜ் தெருவில் உள்ள புகழ் பெற்ற டெல்ஸ்ட்ரா ஸ்டோரில் இதனை வாங்கினார்.

ஆஸ்திரேயாவினைத் தொடர்ந்து, ஜப்பான், ஹாங்காங், சிங்கப்பூர், ஜெர்மனி, ஸ்விட்சர்லாந்து, பிரான்ஸ், பிரிட்டன் மற்றும் அமெரிக்க நாடுகளில் இது விற்பனைக்கு வந்தது. குளிர், மழை பொருட்படுத்தாமல் அனைத்து நகரங்களிலும், இரவு மற்றும் விடியற் காலையிலிருந்தே மக்கள் காத்திருந்து ஐ-பேட் பெற்றுச் சென்றனர். நியூயார்க்கில், பனி பெய்து ஈரம் மற்றும் சிறிது மழை இருந்த போதும், மக்கள் காத்திருந்தனர். இதே போல மற்ற நகரங்களிலும் மக்கள் ஐ-பேட் சாதனத்தை வெளியான அன்றே வாங்க வேண்டும் என விரும்பினர். சான்பிரான்சிஸ்கோவில் இதனைப் பெற்றவர் மிகவும் பெருமையாக, ஐ-பேட் கொண்டிருந்த பையுடன் அதனைப் பெருமிதத்துடன் தூக்கிக் காண்பித்தார்.