தங்கம் மீது 1% வரி வாபஸ் கிடையாது

புதுடெல்லி : தங்கத்தின் மீது மத்திய பட்ஜெட்டில் விதிக்கப்பட்டுள்ள 1 சதவீத உற்பத்தி வரி திரும்பப் பெறப்பட மாட்டாது என்று மத்திய கலால் மற்றும் சுங்க வரி வாரியம் (சிபிஇசி) திட்டவட்டமாக தெரிவித்துள்ளது. தங்கத்தின் மீது மத்திய பட்ஜெட்டில் உற்பத்தி வரி 1 சதவீதம் விதிக்கப்பட்டுள்ளது. இதனால், தங்க நகைகளின் விலை உயரும் என்றும், வர்த்தகத்தை அது பாதிக்கும் என்றும் தங்க நகை நிறுவனங்கள் எதிர்ப்பு தெரிவித்துள்ளன. வரி விதிப்பை வாபஸ் பெற வலியுறுத்தி, கடந்த சனிக்கிழமை முதல் நாடு தழுவிய வேலைநிறுத்தம் செய்து வருகின்றன.

இதனால், நாடு முழுவதும் லட்சக்கணக்கான நகை கடைகள் இன்றுடன் 3 நாட்களாக மூடிக்கிடக்கின்றன. டெல்லியில் மத்திய நிதி அமைச்சக உயரதிகாரிகளை இன்று சந்தித்து கோரிக்கை மனு அளிக்க தங்க நகை உற்பத்தியாளர்கள் சங்கம் திட்டமிட்டுள்ளது. இந்த நிலையில், தங்கத்தின் மீது விதிக்கப்பட்டுள்ள 1 சதவீத உற்பத்தி வரி வாபஸ் பெறப்படாது என்று மத்திய கலால் மற்றும் சுங்க வாரியம் நேற்று அறிவித்தது. அசோசேம் சார்பில் நடந்த பட்ஜெட் விளக்க கூட்டத்தில் சிபிஇசியின் தலைவர் கோயல் இதை தெரிவித்தார். அவர் கூறியதாவது:

மத்திய அரசின் பல்வேறு துறைகளில் அளிக்கப்படும் மானியத் தொகை நாளுக்கு நாள் அதிகரித்து கொண்டே போகிறது. இதனால், நிதி ஆதாரமின்றி அரசு பிரச்னையை சந்திக்கிறது. நிதி ஆதாரத்தை அதிகரிக்க ஒரு சில கடினமான முடிவுகளை எடுக்க வேண்டியுள்ளது. அதன்படியே உற்பத்தி வரி, சேவை வரி 2 சதவீதம் அதிகரிக்கப்பட்டுள்ளது. தங்கத்தின் மீது 1 சதவீத உற்பத்தி விதிக்கப்பட்டுள்ளது. இது குறைவுதான். இதுபற்றி விரைவில் விளக்கம் அளிக்கப்படும். வரி விதிப்பை வாபஸ் பெறும் பேச்சுக்கே இடமில்லை.இவ்வாறு கோயல் தெரிவித்தார்.

தங்கத்த வாங்குறவங்க வாங்கிட்டே தான் இருப்பாங்க.
வாங்கித் தரலேன்னா யாரு வீட்ல வாங்கிக் கட்டிக்கிறது?