புற்றுநோய் செல்களை அழிக்கும் திராட்சை விதைகள்

**பிரசன்னா** · **பிரசன்னா** Sat Feb 18, 2012 1:14 pm

புற்றுநோய் எந்த அளவிற்கு பெருகிக் கொண்டே போகிறதோ அதே அளவிற்கு அதனை அழிக்கும் வழிமுறைகள் குறித்து ஆராய்ச்சிகளும் அதிகரித்துக் கொண்டே இருக்கிறது. எனினும் இதுவரை சரியான முடிவு எட்டப்படாத நிலையில், திராட்சைக் கொட்டைகளுக்கு புற்றுநோய்க் கிருமிகளை அழிக்கும் ஆற்றல் இருப்பதாக ஒரு ஆய்வு கூறியுள்ளது.

கொலரோடோ பல்கலையின் புற்றுநோய் ஆராய்ச்சி பிரிவில் இந்திய வம்சாவளியைச் சேர்ந்த ஆராய்ச்சியாளர் ராஜேஷ் அகர்வால் தலைமையிலான ஆய்வுக் குழுவினர் நடத்திய ஆய்வின் முடிவில்தான் இத்தகவல் தெரிவிக்கப்பட்டுள்ளது.

திராட்சை விதையில் உள்ள மூலப்பொருட்கள் புற்றுநோயைக் கட்டுப்படுத்துவது ஆராய்ச்சியில் தெரிய வந்துள்ளது. ஆனால், இவை, மற்ற நல்ல செல்களை எந்த வகையிலும் பாதிக்கவில்லை என்பதும் குறிப்பிடத்தக்கது.

தற்போது புற்றுநோய்க்கு அளிக்கப்படும் கீமோதெரபி உட்பட அனைத்து வகை மருத்துவ சிகிச்சை முறையிலும், புற்றுநோய் கிருமிகளை அழிக்கும் முறையில் நல்ல செல்களும் சேர்ந்தே அழிக்கப்படுகிறது. எனவே, நோயாளிகள், புற்றுநோயில் இருந்து விடுபட்டாலும், ஆரோக்கியமான செல்களை இழந்து பலவீனமானவராக மாறி அதனாலேயே உயிரிழப்பு நேரிட்டு விடுகிறது.

எனவே, திராட்சை விதையின் மூலம் புற்றுநோய் செல்களை மட்டும் அழிக்கும் புதிய சிகிச்சை முறையை கொண்டு வந்தால், அதனால் எவ்வித பக்க விளைவுகளும் ஏற்படாது என்று நம்பிக்கை ஏற்பட்டுள்ளதாக ஆராய்ச்சியாளர் ராஜேஷ் கூறியுள்ளார்.

தினமணி