கூடங்குளம் பகுதியில் 144 தடை உத்தரவு, மத்திய துணை ராணுவம் வருகை

by **சிவா** Tue Mar 20, 2012 7:20 am

கூடங்குளம் பகுதியில் 144 தடை உத்தரவு நேற்று முதல் பிறப்பிக்கப்பட்டு உள்ளது. பாதுகாப்புக்கு மத்திய தொழில் பாதுகாப்பு படையினர் வரவழைக்கப்பட்டு உள்ளனர்.

துணை ராணுவம் வருகை

கூடங்குளம் அணுமின் நிலையத்தை திறக்க மத்திய, மாநில அரசுகள் நடவடிக்கை எடுத்து வருகின்றன. இதற்கு எதிர்ப்பு தெரிவித்து கூடங்குளம் பகுதி மக்கள் தங்கள் போராட்டத்தை தீவிரப்படுத்தி உள்ளனர்.

அசம்பாவிதங்கள் ஏதும் நிகழாமல் தடுக்க கூடங்குளத்தில் தமிழகம் முழுவதும் இருந்து வந்த 5 ஆயிரத்துக்கும் மேற்பட்ட போலீசார் குவிக்கப்பட்டு உள்ளனர். கேரள போலீசாரும் வரவழைக்கப்பட்டு உள்ளனர். எனவே கூடங்குளத்தில் பதற்றம் நிலவுகிறது.

பாதுகாப்பு நடவடிக்கைகளை கருத்தில் கொண்டு துணை ராணுவ பிரிவுகளில் ஒன்றான மத்திய தொழில் பாதுகாப்பு படையினரும் வந்து உள்ளனர். நேற்று மாலை முதல் தொழில் பாதுகாப்பு படையினர் வந்த வண்ணமாக இருந்தனர். உடனடியாக அவர்கள் உள்ளூர் போலீசாருடன், பாதுகாப்பு பணிகளில் ஈடுபடுத்தப்படுவார்கள் என்று போலீஸ் அதிகாரிகள் தெரிவித்தனர்.

144 தடை உத்தரவு

கூடங்குளம் பகுதிக்கு `144' தடை உத்தரவும் பிறப்பிக்கப்பட்டு உள்ளது.

இதுபற்றி நெல்லை மாவட்ட கலெக்டர் இரா.செல்வராஜ் வெளியிட்டு உள்ள அறிக்கையில் கூறப்பட்டு உள்ளதாவது:-

கூடங்குளம் அணுமின் நிலையத்தை உடனடியாக செயல்படுத்தும் நடவடிக்கைகளை மேற்கொள்ள வேண்டும் என்று தமிழக அரசு ஆணையிட்டு உள்ளது.

அரசின் ஆணையை தொடர்ந்து கூடங்குளம் அணுமின் நிலைய பணிகள் தொடங்கப்பட்டு உள்ளன.

கலவரங்களை தடுக்க

அணுசக்திக்கு எதிரான மக்கள் இயக்கத்துக்கு உதவுவது, கூடங்குளம் பகுதி மக்களின் பொது அமைதிக்கு குந்தகம் விளைவிப்பது போன்ற செயல்கள் தடுக்கப்படும். கூடங்குளம் அணுமின் நிலையத்தில் சட்டப்படி வேலை செய்து வருகிறவர்களை தடுக்காமல் இருக்கவும், அவர்களை பாதுகாக்கும் பொருட்டும், பொதுமக்களின் உயிருக்கும், உடமைக்கும் பாதுகாப்பு அளிக்கும் பொருட்டும், கலவரங்கள் ஏற்படாமல் தடுப்பதற்கும், பொது அமைதியை பாதுகாக்கவும் இந்த தடை ஆணை பிறப்பிக்கப்படுகிறது.

அணுமின் நிலைய எதிர்ப்பு போராட்ட குழுவுக்கு உதவி செய்வது, அவர்களை தூண்டி விடுவது போன்றவற்றில் ஈடுபடும் அரசியல் கட்சிகள், அமைப்புகள், இயக்கங்கள் மற்றும் நபர்கள் 19.3.2012 (அதாவது நேற்று) மாலை 3 மணி முதல், 2.4.2012 மாலை 3 மணி வரை ராதாபுரம் வட்ட எல்லைக்குள் நுழைய தடை விதித்து இந்த `144' தடை ஆணை பிறப்பிக்கப்படுகிறது.

இவ்வாறு அந்த அறிக்கையில் தெரிவிக்கப்பட்டு உள்ளது.

தினதந்தி