“போலீஸ் காவலின்போது ஏன் இத்தனை மரணங்கள்? இதற்கு முடிவே கிடையாதா?

மலேசியா இன்று

ஐஜிபி, ஐயத்துக்குரியவர்களும் மனிதர்கள்தானே?
விசாரணை ஆணையம் அமைக்கப்பட வேண்டும்

காவல் கைதி ஒருவரின் ஆகக் கடைசியான மரணத்தை தொடர்ந்து, சிவில் சமூக அமைப்பான அலிரான் பிரதமரிடம் பல கேள்விக் கணைகளைத் தொடுத்துள்ளது, அவற்றில் முதன்மையானது: “இவற்றுக்கு முடிவே கிடையாதா? என்பதாகும்.


“போலீஸ் காவலின்போது ஏன் இத்தனை மரணங்கள்? இறந்தவர்களில் உடல்களில் போலீஸ் அராஜகத்தின் காயங்கள் ஏன் காணப்படுகின்றன? ஐயத்துக்குரியவர்களை விசாரிப்பதில் தொழில்சார்ந்த அதிகாரிகள் உள்ளனரா அல்லது துன்புறுத்தும் வக்கிரப்புத்திக்காரர்கள் உள்ளனரா?

ஐயத்துக்குரிய துரதிஷ்டசாலிகளிடமிருந்து பெறப்படும் வாக்குமூலங்கள், கட்டாயத்தின்பேரிலும் காட்டுமிராண்டித்தனமாகவும் பெறப்படுகின்றனவா என்று வினவுகிறார் அலிரான் தலைவர் பி ராமகிருஷ்ணன்.

குகன் ஆனந்தன் விவகாரம் குறித்து கருத்துரைக்கையில், அவரது உடலில் காணப்பட்ட காயங்கள், காவலின்போது மிருகத்தனமான முறையில் சித்ரவதை செய்யப்பட்டதை ‘தெளிவாகக் காட்டுவதாக,’ கூறினார்.

இந்த காயங்களை யார் விளைவித்தது? இதற்கான காரணங்கள்தான் யாவை? என அவர் வினவினார்.

இவற்றுக்கு விடை காண்பதற்குப் பதிலாக, போலீஸ் நிலையத்தில் நிகழ்ந்த கொடூரங்களை வெளிப்படுத்தியவர்களை பிடிப்பதில்தான் போலீசார் முனைப்பாக இருக்கின்றனர் என்று ராமகிருஷ்ணன் கூறினார்.

” நிகழ்ந்த சம்பவம், ஒரு தனிச் சம்பவம் அல்ல. அவை வழக்கமாகவே மேற்கொள்ளப்படுவது போல் தென்படுகிறது. இதற்கான காரணம்தான் என்ன? நமக்கு பதில் வேண்டும்.

“தேசிய போலீஸ் படைத் தலைவர் முசா ஹசான், வெளிப்படையாக பதில் கூறுவாரா? இதற்கு மறுமொழி கூறும் கடப்பாட்டை அவர் கொண்டுள்ளார்,” என்றாரவர்.

கார் கொள்ளைகள் தொடர்பாக கைது செய்யப்பட்ட குகன், கடந்த செவ்வாய்க்கிழமை, போலீஸ் காவலில் இறந்தார்.

விசாரணை ஆணையம் அமைய வேண்டும்

அண்மையில் பி பிரபாகர், சி சோலமன் ஆகிய இருவரும் போலீஸ் காவலின்போது சித்ரவதை செய்யப்பட்டதாக கூறப்படும் சம்பவங்களையும் ராமகிருஷ்ணன் எடுத்துரைத்தார். அவர்களில் ஒருவர் மீது கொதிநீர் ஊற்றப்பட்டது.

ஐயத்துக்குரிய நபர்களும் மனிதர்கள்தானே என்று ஐஜிபியிடம் நாம் கேட்க விரும்புகிறோம்? அவர்கள் தங்களது உரிமைகளை கொண்டுள்ளனரா? மனுக்குல உரிமைகளும் அவர்களுக்கு உள்ளதா? கைது செய்யப்பட்டவுடன் மனித கௌரவத்தை அவர்கள் இழந்து விடுகின்றனரா? என அவர் மேலும் வினவினார்.

இதனிடையே, இந்த சம்பவம் தொடர்பாக ஏழு போலீஸ்காரர்கள் கைது செய்யப்பட்டுள்ளனர்.
ஐயத்துக்குரியவர்களை விசாரிக்கும்போது போலீஸ் நடத்தைகளை ஆராய்வதற்கான விசாரணை ஆணையத்தை அமைக்கும்படி பிரதமரை அலிரான் கேட்டுக் கொள்வதாக ராமகிருஷ்ணன் சொன்னார்.

“இதன் வழிதான் உண்மைகளை தெரிந்து கொள்ளலாம். போலீசார் நடத்தும் உள்விசாரணைகள் மீது மக்கள் நம்பிக்கை இழந்துள்ளதாயும் அவர் மேலும் கூறினார்.