கட்டாய ஹெல்மெட்டிற்கு எதிர்ப்பு போலீஸ் கமிஷனருக்கு நோட்டீஸ்

by இரா.பகவதி Sun Mar 18, 2012 3:05 am

மதுரை: கட்டாய ஹெல்மெட்டிற்கு எதிராக தாக்கல் செய்யப்பட்டுள்ள மனுவுக்கு பதிலளிக்க மதுரை போலீஸ் கமிஷனர், எஸ்பிக்கு ஐகோர்ட் கிளை உத்தரவிட்டுள்ளது.
மதுரையை சேர்ந்த குருவிஜயன், ஐகோர்ட் கிளையில் தாக்கல் செய்த பொதுநல மனு:
மதுரை நகர் மற்றும் புறநகர் பகுதியில் இரு சக்கர வாகன ஓட்டிகள் கட்டாயம் ஹெல்மெட் அணிய வேண்டும் என போலீசார் வலியுறுத்தி வருகின்றனர். ஹெல்மெட் அணிவதை கட்டாயமாக்கக்கூடாது. வாகன ஓட்டிகளின் விருப்பத்திற்கு விட வேண்டும். ஹெல்மெட் அணிவதால் தலைவலி, தலையில் நீர் கோர்த்தல், சளி, ஆஸ்துமா, கழுத்து வலி ஆகியன ஏற்படுகிறது.
போலீசார் திடீர் திடீரென ஹெல்மெட் கட்டாயம் அணிய வேண்டும் என நடவடிக்கை எடுத்து வருகின்றனர். மக்களிடம் கருத்து கேட்காமல் கட்டாய ஹெல்மெட் திட்டத்தை போலீசார் அமல்படுத்தியுள்ளனர். வாகன ஓட்டிகள் கட்டாயம் ஹெல்மெட் அணிய வேண்டும் என வலியுறுத்தக்கூடாது என போலீசாருக்கு உத்தரவிட வேண்டும்.
இவ்வாறு மனுவில் கூறப்பட்டிருந்தது.
மனுவை நீதிபதிகள் ஏ.செல்வம், கந்தசாமி ரவிச்சந்திரபாபு விசாரித்தார். அரசு வக்கீல் டி.எஸ்.முகமது முகைதீன் வாதிடுகையில், ஐகோர்ட் டிவிஷன் பெஞ்ச் உத்தரவின் பேரில், கட்டாய ஹெல்மெட் அரசாணை பிறப்பிக்கப்பட்டது என்றார். இதையடுத்து, மனுவுக்கு பதிலளிக்க மதுரை போலீஸ் கமிஷனர், எஸ்பி ஆகியோருக்கு நோட்டீஸ் அனுப்ப உத்தரவிட்டு விசாரணையை மார்ச் 22க்கு நீதிபதிகள் ஒத்திவைத்தனர்.