சங்கரன்கோயில் வெற்றி யாருக்கு?

**சிவா** · **சிவா** Thu Mar 15, 2012 3:01 pm

மீடியா அலுவலகங்களில் எடிட்டோரியல் மீட்டிங் தொடங்கி, குக்கிராமங்களில் அதிகாலை டீக்கடை அரட்டை வரை சங்கரன்கோயில்தான் இப்போது ஹாட் டாபிக். பொதுவாகவே இடைத்தேர்தல்களில் ஆளும் கட்சிக்குத்தான் வெற்றிவாய்ப்பு அதிகம். அதுவும் சங்கரன்கோயில் அ.தி.மு.க.வின் கோட்டை வேறு! என்றாலும்கூட தொடர் மின்வெட்டு, பேருந்துக் கட்டண உயர்வு, பால் விலை உயர்வு, எதிர்க்கட்சிகளின் பிரசாரம், தேர்தல் ஆணையத்தின் கிடுக்கிப்பிடி யாவற்றையும் சமாளிக்க வேண்டிய நிலையில் ஆளும் அ.தி.மு.க. இருக்கிறது.

வெற்றி யாருக்கு? தொகுதிக்குள் ஒரு ரவுண்ட் வந்தோம்.

அ.தி.மு.க. தரப்பில் அனைத்து அமைச்சர்களும் தொகுதிக்குள் முகாம் இட்டு செயல்படுகின்றனர். அ.தி.மு.க. தேர்தல் வாக்குறுதிகளாக சொன்ன அனைத்தையும் தொகுதிக்குள் வழங்கிவிட்டனர். ஒருசில இடங்கள் மட்டுமே பாக்கி; அங்கே வழங்குவதற்குள் தேர்தல் அறிவிப்பு வந்துவிட்டது. அதனால், அவர்களுக்கு தேர்தலுக்குப் பிறகு கட்டாயம் உண்டு என்று சொல்லி வாக்கு சேகரிக்கின்றனர்.

அ.தி.மு.க. வேட்பாளரான முத்துச்செல்வி சங்கரன்கோயில் நகராட்சித் தலைவராக இருப்பவர். அம்மாவின் ஆட்சியிலே ஏகப்பட்ட நலத்திட்டங்கள் உள்ளது. மேலும், சங்கரன்கோயில் தொகுதி மக்கள் என்றைக்கும் அ.தி.மு.க. விசுவாசிகள். எனது வெற்றி என்பது அம்மாவின் வெற்றி என்று நம்பிக்கையுடன் பேசுகிறார் முத்துச்செல்வி.

முதல்வர் ஜெயலலிதா மார்ச் 13ம் தேதி பிரசாரம் செய்ய உள்ளாராம். இதனால் அ.தி.மு.க. தொண்டர்கள் கூடுதல் உற்சாகத்துடன் உள்ளார்கள்.

தி.மு.க. சார்பில் வழக்கறிஞர் சூரியகுமார் நிற்கிறார். மறைந்த அமைச்சர் கருப்பசாமி பாணியில் சூரியகுமாரும் வாக்காளர்கள் காலில் விழுந்து வாக்கு கேட்கிறார்.

சங்கரன்கோயில் தொகுதி மக்களின் உயிர்நாடி விவசாயமும் கைத்தறியும்தான். இவை இரண்டையும் செயல்படுத்த மின்சாரம் தேவை. மின் தட்டுப்பாடு இருந்தாலும், தி.மு.க. ஆட்சியில் ஒழுங்குமுறைப்படி மின்சாரத்தை விநியோகித்தோம். அந்த மரபு இப்பொழுது பின்பற்றப்படவில்லை. விலைவாசி உயர்வு மக்களை வாட்டி வதைக்கின்றது. எனவே, எத்தனை அமைச்சர்கள் தொகுதிக்குள் வலம் வந்தாலும் வெற்றி எங்களுக்குத்தான் என்கிறார் சூரியகுமார்.

தி.மு.க. சார்பில் மு.க. அழகிரி முன்னதாகவே தொகுதிக்குள் தேர்தல் பணிகளைத் தொடங்கிவிட்டார். கருணாநிதி, மு.க. ஸ்டாலின், அன்பழகன், குஷ்பு என்று முக்கிய தலைவர்களும் வாக்கு கேட்டு வரவிருப்பதால் கூடுதல் ஓட்டு கிடைக்கும் என திமு.க. தரப்பில் நம்பப்படுகிறது. தி.மு.க.வை ஆதரித்து ஞானதேசிகன் உள்ளிட்ட தமிழக காங்கிரஸ் தலைவர்கள் பிரசாரத்தில் ஈடுபடுவது கூடுதல் பலம் என்கிறார்கள். விடுதலைச் சிறுத்தைகள் ஆதரவு தலித் ஓட்டுகளை கணிசமாகப் பெற்றுத் தரும் என்கிறார்கள்.

தேர்தல் களத்தை தன்மானப் பிரச்னையாகவே கருதி நிற்கிறது ம.தி.மு.க. கடந்த சட்டமன்றத் தேர்தலில் தேர்தலைப் புறக்கணிக்க வேண்டிய சூழ்நிலைக்கு ம.தி.மு.க. தள்ளப்பட்டதனால் இழந்த தனது செல்வாக்கை மீட்டெடுக்கவும் சொந்த தொகுதியில் தங்களுக்கு அதிக செல்வாக்கை காட்டவேண்டிய நிலையிலும் வைகோ இருக்கிறார். ம.தி.மு.க. சார்பில் களம் காணும் சதன் திருமலைக்குமார் ஒரு மருத்துவர். கடந்த ஐந்து வருடங்கள் வாசுதேவநல்லூர் தொகுதி ம.தி.மு.க. எம்.எல்.ஏ.வாக இருந்தவர்.

இங்கு எங்கள் பொதுச் செயலாளர் வைகோவுக்கென்று ஒரு செல்வாக்கு உண்டு. ம.தி.மு.க.வின் குரல் சட்டமன்றத்தில் ஒலிக்க மக்கள் உதவி செய்வார்கள். ஆளும் அ.தி.மு.க.விற்கு ஒரு பாடம் புகட்டும் தேர்தலாகவும் இந்த இடைத் தேர்தல் இருக்கும் என்கிறார் ஆவேசமாக சாதன் திருமலைக்குமார்.

திராணியிருந்தால் சங்கரன்கோயில் இடைத்தேர்தலில் தனித்து நின்று பாருங்கள் என்று முதல்வரின் சவாலை ஏற்று களத்தில் குதித்துள்ள தே.மு.தி.க. வேட்õபளராக முத்துக்குமார் நிற்கிறார். சென்னையில் சாஃப்ட்வேர் கம்பெனியில் பணிபுரிந்து கொண்டிருந்தவர். தேர்தலுக்காக தனது பணியை ராஜினாமா செய்து களம் காண்கிறார். 2006 தேர்தலில் சங்கரன்கோயிலில் தே.மு.தி.க. சார்பில் போட்டியிட்டு 5800 வாக்குகள் பெற்றவர்.

விஜயகாந்தும் பிரேமலதாவும் தங்களுடன் அனைத்து தே.மு.தி.க. சட்டமன்ற உறுப்பினர்களையும் களத்தில் இறக்கி அனல் பறக்க வைத்திருக்கிறார்கள்.

பா.ஜ.க.வும் இம்முறை தனித்து தன் பலத்தைக் காட்டவிருக்கிறது.

சின்னச் சின்னக் கட்சிகள், புதிய தமிழகம் கட்சி போன்ற ஜாதிய அமைப்புகளை அ.தி.மு.க. கையில் எடுத்துவிட்டது. இது வெற்றி வித்தியாசத்தை அதிகரிக்க உதவும் எனக் கூடுதல் நம்பிக்கையுடன் இருக்கிறாரகள் அ.தி.மு.க.வினர்.

21ஆம் தேதி தெரிந்துவிடும்!

-டி.ஜோசப்

யினியவன் · யினியவன் Thu Mar 15, 2012 4:24 pm

அம்மா ஜெயிக்காம விட மாட்டாங்க. ஜெயிச்சவுடன் எல்லாரையும்
கேவலப் படுத்தி அசிங்க அசிங்கமா அறிக்கை விடுவாங்க.

வேற யாராவது ஜெயிச்சா அது உலக அதிசயமாத்தான் இருக்கும்.