மார்ச் 15: உலக நுகர்வோர் தினம்

**சிவா** · **சிவா** Wed Mar 14, 2012 11:06 am

பொருட்களை தயாரிப்பவர்கள் உற்பத்தியாளர்கள். அவற்றை வாங்கி, பயன்படுத்துபவர்கள் நுகர்வோர் (Consumer) என்பது நம் அனைவருக்கும் தெரியும். நுகர்வோர்கள் பற்றிய சில தகவல்களைப் பார்ப்போம்...

ஒவ்வொரு நாடும், நுகர்வோரைப் பாதுகாப்பதற்காக நுகர்வோர் பாதுகாப்பு சட்டங்களை அறிமுகப்படுத்துகின்றன. இந்திய நுகர்வோர் பாதுகாப்புச் சட்டம், 1986-ன் படி, பகுதி 2(1) (d) பிரிவின்படி, யார் பணம் கொடுத்து பொருளையோ, சேவையையோ வாங்குகிறார்களோ அவர்களே நுகர்வோர்கள் என்று அழைக்கப்படுகின்றனர்.

பணம் கொடுத்து பொருள் வாங்குகிறவர்களும், சேவையை அனுபவிக்கிறவர்களும் நுகர்வோர்கள். ஒரு பொருளை அதற்கான விலையைக் கொடுத்து, ஒருவர் வாங்கியிருக்கலாம். ஆனால், அதை அனுபவிப்பவர்கள் வேறொரு நபர் என்றால், அவர் தான் அந்த பொருளுக்கு நுகர்வோர். உதாரணமாக குழந்தைக்கு, பால் பவுடர், தந்தை காசு கொடுத்து வாங்கினாலும், அதை அனுபவிக்கும் குழந்தை தான் நுகர்வோர்.

அதனால், நுகர்வோர்கள் தனக்கு வேண்டிய பொருள் அல்லது சேவைக்குரிய பணத்தை தான் தான் கொடுக்க வேண்டும் என்ற கட்டாயம் இல்லை. அவர்களுக்காக யார் வேண்டுமானாலும் கொடுக்கலாம். அப்படி கொடுக்கும்போது அந்த பொருளையோ, சேவையையோ யார் பெற்று அனுபவிக்கிறார்களோ, அவர்கள் நுகர்வோர்களாகி விடுகின்றனர். உதாரணமாக, தன் பிள்ளைகளுக்கு தந்தை மருத்துவ சிகிச்சைக்காக பணம் கொடுத்தாலும், மருத்துவ சிகிச்சை பெற்ற அவரது பிள்ளைகள்தான் நுகர்வோர்கள். பொருளின் தரம் கெட்டுப் போய் இருந்து அதனால், நுகர்வோர் பாதிக்கப்பட்டிருந்தால், அவர் அந்த பொருளை விற்றவர் மீது வழக்கு தொடுக்கலாம்.