ஒரு பக்கக்கதை - குணம் - குமுதம் ( From மார்ச் 04,2012 To மார்ச் 14,2012 )

by **பிரசன்னா** Sat Mar 10, 2012 1:53 pm

குமுதம் ( From மார்ச் 04,2012 To மார்ச் 14,2012 )

பத்தாம் வகுப்பு ஆசிரியர் கணபதிராம் ப்ராக்ரஸ் கார்டை வினியோகித்து விட்டு அறிவித்தார், “இந்த முறை முதல் இடத்தைப் பிடித்திருப்பது கணேஷ்குமார். மொத்த மார்க் நானூற்று எண்பத்தைந்து. அதைப் பாராட்டி இந்த பாரதியார் கவிதைப் புத்தகத்தை அவனுக்கு வழங்குகிறேன்’ அவர் கூறி முடிக்க, வகுப்பு ஆரவாரத்துடன் கை தட்டியது.

கணேஷ்குமார் எழுந்து ஆசிரியருக்கு முன் நின்றான், “சார், இந்த பாராட்டும், பரிசும் மாரிமுத்துவுக்குதான் சார் சேரணும்.’

“இல்லைப்பா அவன் நானூற்று எண்பது மார்க் எடுத்து இரண்டாவது இடத்துலதானே இருக்கிறான்?’

“இருக்கலாம் சார்... எனக்கு ஒவ்வொரு பாடத்துக்கும் தனித்தனி டியூசன், பள்ளிக்கு வந்து போக கார். எந்தக் கவலையும் இல்லாம படிக்கிறேன், ஆனா மாரிமுத்து... பள்ளிக்கூடம் முடிஞ்சதும் வீட்டு வறுமையால ஒரு ஓட்டல்ல வேலை பார்த்திட்டு அப்புறம் படிச்சு என்னைவிட அஞ்சு மார்க்தான் குறைவா எடுத்திருக்கிறான், என்னோட வசதிகள் அவனுக்கு இருந்தா நானெல்லாம் அவன்கிட்ட நெருங்கவே முடியாது. அவன் எடுத்த மார்க் தான் முதலிடமுன்னு நான் நெனைக்கிறேன்.’

பணம் உள்ள இடத்தில் குணமிருக்காது என்று சொல்வார்கள். கணேஷ்குமார் ஒரு குணக்குன்றாக தெரிந்தான் வகுப்பாசிரியருக்கு!

வி.சகிதாமுருகன்