வெற்றிக்கு ஒரு புத்தகம் - அன்னா காட்டிய வழி!- குமுதம் ( From மார்ச் 04,2012 To மார்ச் 14,2012 )

by **பிரசன்னா** Sat Mar 10, 2012 1:51 pm

குமுதம் ( From மார்ச் 04,2012 To மார்ச் 14,2012 )

சென்ற வருடத்தில் இந்தியாவின் மீடியா ஹீரோ, சந்தேகமில்லாமல் அன்னா ஹசாரேதான்.

இதற்கு முன்னால் இந்தியாவில் எத்தனையோ பேர் ஊழலை எதிர்த்து கிட்டத்தட்ட இதே போன்ற முயற்சிகளில் ஈடுபட்டிருக்கிறார்கள். ஆனால், அவர்கள் யாராலும் சாதிக்க முடியாத மிகப் பெரிய வெற்றியை அன்னா ஹசாரே இத்தனை குறுகிய காலகட்டத்தில் சாதித்தது எப்படி? அவர் பயன்படுத்திய அதே வழிகளை நாமும் நம்முடைய தனிப்பட்ட முன்னேற்றத்துக்காகப் பின்பற்றமுடியுமா? அன்னாவுடைய வாழ்க்கையிலிருந்து நாம் கற்றுக்கொள்ளவேண்டிய பாடங்கள் என்னென்ன? ஹார்வர்ட் பல்கலைக்கழகத்தில் படித்த சதீஷ், சிவராம் என்ற இரண்டு இளைஞர்கள் இந்த கோணத்தில் சிந்தித்திருக்கிறார்கள். “லீடிங் வித்தவுட் லைசன்ஸ்’ என்ற சுவையான புத்தகத்தை எழுதியிருக்கிறார்கள். (ரூபா பப்ளிகேஷன்ஸ் வெளியீடு, விலை ரூ.140/-)

அன்னாவோ அவரது குழவினரோ இதை இப்படித்தான் செய்யவேண்டும் என்று திட்டமிட்டு வேலை செய்தார்களா, அல்லது சேவை நோக்கத்தில் சட்டென்று களத்தில் இறங்கிவிட்டார்களா என்பது நமக்கு தெரியாது. ஆனால் அவர்கள் செயல்பட்ட விதத்திலும் வெற்றியடைந்த தன்மையிலும் ஆறு முக்கியமான பாடங்கள் இருக்கின்றன என்று விளக்கிச் சொல்கிறது இந்தப் புத்தகம். அந்த ஆறு பாடங்கள்:

1. பதவி முக்கியமில்லை.
2. நீங்ள் கையில் எடுக்கும்போகும் பிரச்னை எது?
3. சரியான கூட்டாளிகளை தேர்ந்தெடுங்கள்.
4. தலைவராகுங்கள்.
5. எப்போதும் கவனமாக இருங்கள்.
6. முன்னேற்பாடுகளும் பயிற்சிகளும் மிக முக்கியம்.

1. பதவி முக்கியமில்லை

அன்னா ஹசாரே தேர்தலில் நிற்கவில்லை. மக்களால் தேர்ந்தெடுக்கப்படவில்லை. ஐ.ஏ.எஸ். படிக்கவில்லை. அரசாங்கத்தில் அதிகாரியாகச் சேரவில்லை. பிரதமராலோ ஜனாதிபதியாலோ ஊழல் எதிர்ப்பு அமைச்சர் என்று அறிவிக்கப்படவில்லை. எந்தவிதத்திலும் அவருக்கு அதிகாரபூர்வமான பதவி எதுவுமே கிடையாது.

ஆனால் இவையெல்லாம் அவருடைய முயற்சிகளை தடுத்துவிடவில்லை.

அலுவலகத்தில் சின்னச் சின்னப் பதவி உயர்வுகள், மாற்றங்களுக்காகச் சண்டை போட்டுக்கொண்டு வேலையில் கவனம் செலுத்தாமல் இரக்கிறவர்களுக்கெல்லாம் அன்னாவின் இந்த குணம் ஒரு பாடம். பதவி என்பது ஒரு நல்ல செயலைச் செய்வதற்கான லைசன்ஸ், அதேசமயம் அந்த லைசன்ஸ் இல்லாதவர்கள் அதனைச் செய்ய முடியாது என்று அர்த்தம் இல்லை மனம் வேண்டும். அவ்வளவுதான்.

2. நீங்கள் கையில் எடுக்கப்போகும் பிரச்னை எது?
பல நேரங்களில் நாம் ஒரு விஷயத்தில் இறங்கத் தீர்மானிக்கும்போது, ஆர்வம் இருக்கும், ஆனால் முதலில் எதைச் செய்வது என்பது புரியாது. சுலபமாக இருக்கிறதே என்பதற்காக எலி வேட்டை ஆடாமல் சிங்க வேட்டை ஆடினால் தாக்கம் அதிகம், வெற்றியும் பெரிதாக இருக்கும்.

3. சரியான கூட்டாளிகளைத் தேர்ந்தெடுங்கள்
அன்னா ஹசாரேயின் சிநேகிதர்களைப் பற்றி மீடியாவில் ஆயிரம் விமர்சனங்கள் இருக்கலாம். ஆனால் வலுவான அந்தக் கூட்டணி இல்லாமல் தன்னந்தனியாக அவர் இத்தனை பெரிய வெற்றியைச் சாதித்திருக்கமுடியாது என்பதுமட்டும் உண்மை.

4. தலைவராகுங்கள்
பத்து பேருக்காக நாம் போராடும்போது, இந்தத் தலைமை உரிமை மிக அவசியமாகிவிடுகிறது.

ஆக, நாம் எந்தக் குழுவுடன் செயல்படுகிறோமோ அங்கே நமது இடம் என்ன என்பதைச் சரியாகப் புரிந்துகொள்ளுங்கள். அவர்களது ஒட்டுமொத்தச் சம்மதம் இன்றி எதிலும் நீங்களாக உரிமை எடுத்துக் கொள்ளாதீர்கள்.

5. எப்போதும் கவனமாக இருங்கள்
அன்னா ஹசாரேயின் ஊழல் எதிர்ப்புப் போராட்டம் என்னதான் நியாயமான நோக்கங்களைக் கொண்டிருந்தாலும், அவர் சந்தித்த எதிர்ப்புகள் கொஞ்ச நஞ்சமில்லை. ஒவ்வொரு கட்டத்திலும் என்ன நடக்கும் என்பதை முன்கூட்டியே யோசித்து, பின்னர் நடப்பவற்றைத் தொடர்ந்து கவனித்து, வேண்டிய மாற்று ஏற்பாடுகளைச் செய்து அவர் முன்னேறிக் கொண்டே இருந்தார்.

6. முன்னேற்பாடுகளும் பயிற்சியும் மிக முக்கியம்
வெற்றியடைந்த எல்லாரிடமும் இந்தக் குணத்தைப் பார்க்கலாம். அவர்களுடைய வெற்றி திடீரென்று முளைத்த காளானாக இருக்காது, பொறுமையாக வளர்த்த தேக்கு மரத்தைப் போல் கடினமாகவும் உயரமாகவும் வளர்ந்து நிற்கும். காரணம், அவர்கள் இப்படி ஒரு வளர்ச்சிக்குத் தங்களைத் தாங்களே மிகக் கவனமாகத் தயார் செய்துகொள்வதுதான்.

- என். சொக்கன்.