கலாச்சாரம் காக்கும் கைவினைப் பொருள்கள்

குடிசைத் தொழில்கள், கிராமியத் தொழில்கள், கதர், கைத்தறி ஆடை நெய்யும் தொழில்கள் இவைதான் நமது பாரம்பரியத்தை அடுத்தடுத்த லைமுறைகளுக்கு எடுத்துச் செல்கின்றன. கலாசாரத்தைப் பறைசாற்றும் பொருள்கள்.
இவற்றின் மீது உயர்ந்த மதிப்பீடு கொண்டிருப்பது மட்டும் போதாது; கைவினைப் பொருட்களுக்கு ஆதரவு வேண்டும். இந்த கைவினைப் பொருட்களின் தயாரிப்பு குடிசைத் தொழிலாக, கிராமியத் தொழிலாக நடைபெற்று வருகின்றன.
எவ்வளவு அழகான கலைப் பொருட்கள்...
விலை இருபது முப்பது என்று ஆரம்பித்து, செய்யப்படும் கலைப் பொருட்களின் கலை நுணுக்கங்களையும் உபயோகப்படுத்தும் மூலப்பொருளையும் பொருத்து, விலை சில நூறுகளில், சில ஆயிரங்களில் இருக்கலாம்.
எல்லாரும் எல்லாப் பொருட்களையும் வாங்க முடியாதுதான். அவரவர்கள் சக்திக்கு வசதிக்கும் ஏற்ப கைவினைப் பொருட்களை வாங்கி ஆதரிக்கலாமே...

மூங்கில் இழைச் சித்திரங்கள் (பாயில் செய்யலாம்)
மெல்லிய மூங்கில் இழைகளைக் கொண்டு அல்லது பாயில் தயாரித்த சித்திரங்கள்... ஓடம், யானை போன்றவைகளில் இருந்து பல தரப்பட்ட கற்பனைகள்... ஒவ்வொன்றும் அழகானவை.
வாங்கி வீட்டில் மாட்டி வைக்கலாம். கிருகப் பிரவேசம் போன்ற விழாக்களில் கலந்து கொள்ளும்போது பரிசாகத் தரலாம்.

சுடுமண் சிற்பங்கள்
டெர்ரகோட்டா என்று ஆங்கிலத்தில் சொல்லப்படும் சுடுமண் பொருட்கள் சிற்பங்கள் தனித்தன்மை வாய்ந்தவை.
அந்தூரியம் போன்ற அலங்காரப் பூக்களைச் செருகி வைக்கும் சிறிய வட்டமான தட்டு முதல் பெரிய அளவில் உள்ள யானைகள், குதிரைகள் வரை சுடுமண் பொருட்களில் உண்டு.
கீழே விழுந்தால் உடைந்துபோகும் என்பதற்காக பயந்துகொண்டு பலரும் இதனை வாங்க முன் வருவதில்லை.
இதே காரணத்திற்காக விசிறி முதல் பூச்செடிகள் வைக்கும் பூத்தொட்டிகள் வரை உடையாத பிளாஸ்டிக்கில் வர ஆரம்பித்துவிட்டன.
உடைந்துபோய் விடுமோ என்பதற்காக, நாம் பிளாஸ்டிக் தொட்டிகளை வாங்க ஆரம்பித்தால், நமது நாட்டில் வறுமைக் கோட்டிலும், அதற்குக் கீழிலும் வாழும் லட்சக்கணக்கான இந்தத் தொழில் செய்யும் சுடுமண் கலைஞர்களுக்கு நாம் இழைக்கும் தீங்கு, அநீதி. நாம் ஓரளவுக்கு வசதியான நிலையில் இருக்கும்போது நம்மால் செய்ய முடிந்த காரியத்தினால் - சில பேருடைய வறுமையைப் போக்க முயற்சி செய்யலாமே. நாம் அவர்கள் தயாரிக்கும் பொருட்களை வாங்கி உடயோகிப்பது, மறைமுகமாக அவர்களுடைய வறுமையைப் போக்க உதவுகிறது என்பதை உணர்வோம்.

பித்தளை மற்றும் வெங்கலப் பொருட்கள்
எவர்சில்வர் பாத்திரமும் குக்கர்குளம் வந்த பிறகு, பித்தளை, வெங்கலப் பாத்திரங்கள் ஓடி ஒளிந்து கொண்டன என்பது உண்மை. இத்தகைய பாத்திரங்களை நேரக்குறைவு காரணமாக அல்லது வேறு காரணங்களால் உபயோகப்படுத்த முடியாவிட்டாலும், ஒரு சில பொருட்களையாவது அலங்காரப் பொருள்களாக உடயோகப்படுத்தலாமே. கேரளத்தில் உருளி, பறை (நெல் அளக்கும் பாத்திரம்) போன்ற பித்தளை, வெங்கலப் பொருட்களை அலங்காரப் பொருட்களாக வரவேற்பு அறையில் வைத்திருப்பதைப் பார்க்கலாம். பெரிய அளவில் உள்ள குத்துவிளக்குகளையும் வரவேற்பு அறையில் அவர்கள் வைக்கிறார்கள்.

மரச்சிற்பங்கள்
ஃப்ளவர்வாஸ் போன்ற பொருட்களில் இருந்து கலை நுணுக்கம் வாய்ந்த சிற்பங்கள் வரை மரத்தில் செய்யப்படுகின்றன. உற்சாக மூட்டும் வித்தியாசமான வாசகங்கள் அடங்கிய மரப்பொருள்களையும் வரவேற்பு அறைகளில் வைக்கலாம். அலுவலகங்களில் வைக்கலாம்.

பொம்மைகள்
காற்றில் தலையை ஆட்டி இடுப்பை ஆட்டி நடனமாடும் பொம்மைகளை வைத்த நேரம் இருந்தாலும் பார்த்துக் கொண்டே இருக்கலாம். எவ்வளவு அழகான பொம்மைகள். அலங்காரப் பொம்மைகளாக வைக்கலாம். பொம்மைகள் என்று சொல்லும்போது, மண்பொம்மைகள் தவிர, பேப்பர் கூழினால் செய்த பொம்மைகள், பிளாஸ்டர் ஆஃப் பாரிசினினால் செய்த பொம்மைகள் என்று பலவிதமான பொம்மைகள் விற்பனைக்கு வருகின்றன.
ஒவ்வொரு அறையிலும் அந்தந்த அறையின் உபயோகத்திற்குத் தகுந்த மாதிரி பொம்மைகளை வாங்கி வைக்கலாம்.
உதாரணமாக, பெட்ரூமில் சிங்கார ரசம் ததும்பும் ராதாகிருஷ்ணர் பொம்மை, அங்கலட்சணங்கள் அமைந்த அழகு ததும்பும் பொம்மைகளை வைத்த பெட்ரோமை அழகு படுத்தலாம்.
இன்னும் எத்தனை எத்தனையோ வகைக் கலைப்பொருள்கள் உள்ளன.

அன்றாட உபயோகத்திற்கும்...
கைத்தறி வேட்டி, புடவைகளை வாங்கி உபயோகிக்கலாம். கதர் விற்கும் கடைகளுக்குச் சென்று சந்தன பேண்ட், சந்தன ஊதுபத்தி போன்ற தரமான பொருட்கள் விற்கப்படுகின்றன. அவற்றை வாங்கி உபயோகப்படுத்தலாம்.
இன்னும் மேசை விரிப்பு, படுக்கை விரிப்பு, திரைச்சீலைகள் போன்றவற்றிற்குத் தகுந்தவற்றை வாங்கி ஆதரிக்கலாம்.
நாம் வாழ்க்கையில் உயர உயர நம் வீட்டில் கிராமியப் பொருட்களின் உபயோகத்தை அதிகரித்துவந்தால், பார்ப்பவர்களின் மனதில் நம்மைப்பற்றிய உயர்வான அபிப்பிராயம் உருவாகும்.
என்ன புறப்பட்டுவிட்டீர்களா! கைவினைப் பொருட்களை வாங்குவதற்கு.
கைவினைப் பொருட்களை ஆதரிப்போம். அதைப் பார்த்து, மகாத்மா காந்தியும் நம்மை ஆசிர்வதிப்பார்.

- கமலநாதன்

மஞ்சரி ( From பிப்ரவரி 05,2012 To மார்ச் 10,2012 )