வெகு சினேகமாயிருந்த ஒரு கடவுள்......

by **rameshnaga** Mon Mar 05, 2012 4:04 pm

நீ காலி செய்த வீட்டின்
தேவை அற்ற பொருள்களின்
குப்பையிலிருந்துதான் கண்டெடுத்தேன்...
உனக்கு வெகு சினேகமாயிருந்த
ஒரு கடவுளின் படத்தையும்.
**************************************************************
பிச்சைக் காரனின் பாத்திரம்....
அதில் மிகக் குறைவாய் தளும்புகிறது
உலகின் கருணை.
****************************************************************
தபால் பெட்டிகளில்....
பயணிக்கக் காத்திருக்கின்றன
சில இதயங்களும்., சில துயரங்களும்., சில கனவுகளும்.
*********************************************************************************
ஒட்டகத்தின் கனவொன்றில்
வந்து..வந்து போகிறது...
இருள் அடர்ந்த பசுமையான காடு ஒன்று.
*********************************************************************************
தவித்து விடுகிறது நிலா....
எல்லாக் கவிஞர்களின் கனவுகளிலும்....
காதலியாய் வந்து சென்று மீள்வதற்குள்.
*************************************************************************************
இன்றைய தின "நல் வாழ்த்துக்களைக்"
என் தோட்டத்துக் கிளிக்குச் சொல்கிறேன்.
இதுவரை-
யாரும் அதற்கு
இப்படிச் சொன்னதில்லையோ...என்னவோ?
நன்றிப் பெருக்கில்-
தன் சிறகுகளைப்..."பட...பட..."வென....
அடித்துக் கொள்கிறது கிளி.
********************************************************************************************