முட்டாள் ராஜாவும் முட்டாள் மந்திரியும்!

முன்னொரு காலத்தில் முட்டாள்ராஜா என்பவன் இருந்தான். தன்னைப் போலவே முட்டாளை அமைச்சராக்கினான். அரசனுக்குத் திடீரென்று வேட்டைக்குச் செல்ல வேண்டும் என்ற எண்ணம் எழுந்தது.

""அரசே! இதுவரை யாரும் காட்டிற்குச் சென்று எலி வேட்டையாடியதில்லை. எல்லா வேட்டைகளிலும் கடினம் எலி வேட்டைதான். அதே சமயம் ஆபத்தும் இல்லாதது. நீங்கள் மட்டும் வெற்றி வீரராகத் திரும்பினால் இந்த உலகமே உங்களைப் பார்த்துப் புகழும்,'' என்றான் முட்டாள் அமைச்சன். அரசனும் இதை ஏற்றுக் கொண்டான்.
""நான் வேட்டையிலிருந்து திரும்பும் வரை ஆட்சியைக் கவனித்துக் கொள்,'' என்று சொல்லி விட்டு வீரர்கள் புடைசூழ எலி வேட்டைக்குப் புறப்பட்டான் அரசன்.

மறுநாள் அரண்மனை அந்தப்புரத்திலிருந்த அரசியை நல்ல பாம்பு ஒன்று கடித்துவிட்டது. மயங்கி விழுந்த அரசியைச் சோதித்த மருத்துவர்கள், ""நஞ்சு தலைக்கு ஏறி விட்டால் அரசி உயிர் பிழைப்பது கடினம்,'' என்றனர். இந்தச் செய்தி உடனே அமைச்சனுக்குத் தெரிவிக்கப்பட்டது. என்ன செய்வது என்று சிந்தித்தான் அவன். அருமையான யோசனை அவனுக்குத் தோன்றியது.

வீரர்களைப் பார்த்து, ""பாம்பின் நஞ்சு அரசியின் தலைக்கு ஏறுவதற்குள் அரசியாரின் தலையை வெட்டிப் பாதுகாப்பிற்காக வையுங்கள். எப்படி அரசியார் இறக்கிறார் என்று பார்த்து விடுகிறேன்,'' என்று கட்டளையிட்டான்.

வீரர்களும் அரசியின் தலையை வெட்டித் தனியே வைத்தனர். அரசியாரைக் கடித்த பாம்பை அடிக்க வீரர்கள் விரட்டிச் சென்றனர். ஆனால், அந்தப் பாம்பு ஒரு வீட்டிற்குள் புகுந்து மறைந்து கொண்டது. உள்ளே நுழைய வீரர்கள் பயந்தனர்.

நடந்ததை அறிந்த அமைச்சன், ""அந்த வீட்டைக் கொள்ளுத்துங்கள். பாம்பு சாகட்டும்,'' என்ற ஆணையிட்டான்.

உடனே வீடு கொளுத்தப்பட்டது. நாலாபுறமும் காற்று வீசிக் கொண்டிருந்ததால் தீ தலைநகர் முழுவதும் பிடித்துக் கொண்டது. ஊர் மக்கள் எல்லாரும் அலறினர்.


"கவலைப்படாதீர்கள்' என்ற அமைச்சன் நகரத்தின் நீர் தேவைக்காக இருக்கும் ஏரியை உடைத்து விடச் சொன்னான்.

அதே போல் ஏரி உடைக்கப்பட்டது. ஏரி நீர் நகரத்திற்குள் புகுந்து தீயை அணைத்தது.

"தன் அறிவுக் கூர்மையால் மக்களின் துன்பத்தைப் போக்கிவிட்டோம்' என்று மகிழ்ந்தான் அமைச்சன்.

அவன் மகிழ்ச்சி ஒரு நாள் கூட நீடிக்கவில்லை. ""ஏரியில் நீர் இல்லாததால் நெற்பயிர்கள் வாடுகின்றன,'' என்று மக்கள் முறையிட்டனர்.

""எதனால் பயிர் வாடுகிறது?'' என்று கேட்டான் அமைச்சன்.

""சூரியனுடைய வெப்பத்தைத் தாங்க முடியாமல் வாடுகின்றன,'' என்று பதில் தந்தான் ஒருவன்.

""அப்படியா... ""கதிரவனின் கதிர்கள் பயிரைத் தாக்காமல் இருக்க நாட்டிலுள்ள மரங்களை எல்லாம் வெட்டிப் பயிர்களுக்குப் பந்தல் போட்டு விடுங்கள்,'' என்றான்.
மக்களும் அவ்வாறே செய்தனர்.

இவ்வாறாக முட்டாள் அமைச்சன் மூன்றே நாளில் நாட்டைச் சுடுகாடாக்கி விட்டான். இதற்குத்தான் முட்டாளாக இருக்காதீங்க என்பது. புரிஞ்சிதா குட்டீஸ்!
***