கணக்கெடுப்பு - வெளி மாநில மாணவர்கள் விவரம்

மாநிலம் முழுவதும் உள்ள கல்லூரிகளில் படிக்கும் வெளி மாநிலங்களைச் சேர்ந்த மாணவர்கள் குறித்த முழு தகவல்களையும் சேகரித்து, உடனடியாக அறிக்கை அனுப்ப, உயர்கல்வித் துறை செயலர் ஸ்ரீதர் உத்தரவிட்டுள்ளார். சென்னையில், போலீசாரால் சுட்டுக் கொல்லப்பட்ட, வெளி மாநிலத்தைச் சேர்ந்த வங்கிக் கொள்ளையர்களில் ஒருவர், சென்னையில் உள்ள தனியார் பொறியியல் கல்லூரியில் படித்தவர் என்ற தகவலை அடுத்து, இந்த நடவடிக்கை எடுக்கப்பட்டுள்ளது.
கல்லூரிகள் மூலம்...: மாநிலம் முழுவதும் உள்ள பல்கலை துணைவேந்தர்களுக்கு செயலர் அனுப்பியுள்ள உத்தரவில், ""தமிழகத்தில் உள்ள கல்லூரிகளில் பயிலும் வெளி மாநிலங்களைச் சேர்ந்த மாணவ, மாணவியர் குறித்த முழு விவரங்களையும், உடனடியாக சேகரிக்க வேண்டும். குறிப்பாக, வெளியில் தங்கியிருக்கும் மாணவர்கள் குறித்த விவரங்களை, சேகரித்து அனுப்ப வேண்டும். இந்த தகவலை, ஒவ்வொரு பல்கலையும் தங்களது கல்லூரிகளுக்கு அனுப்பி, உரிய விவரங்களைப் பெற வேண்டும்,'' எனத் தெரிவித்துள்ளார்.
"புகைப்படம் எடுக்க வேண்டாம்': மாணவர்களின் பெயர், எந்த மாநிலம், அவர்களுடைய சொந்த முகவரி, தொலைபேசி எண்கள், எந்த பாடப்பிரிவுகளில் படிக்கின்றனர், கல்லூரி விடுதியில் தங்கியிருக்கின்றனரா, வெளியில் தங்கியிருக்கின்றனரா, அப்படி வெளியில் தங்கும் மாணவர்கள் என்றால், அவர்களுடைய செயல்பாடுகள் என்னென்ன, அவர்கள், யார், யாரை சந்திக்கின்றனர், கல்லூரிகளில் வெளி
மாநில மாணவர்களின் செயல்பாடுகள் உள்ளிட்ட அனைத்து விவரங்களையும் சேகரிக்க உத்தரவு உள்ளது. விவரங்களுடன், மாணவர்களின் புகைப்படங்களும் சேகரிக்க வேண்டும் என உத்தரவிட்டுள்ளதாகக் கூறப்படுகிறது. இதற்கென புகைப்படம் எடுத்தால், மாணவர்கள் மத்தியில் பிரச்னை ஏற்படும் என்பதால், ஆவணங்களில் உள்ள புகைப்படங்களை நகல் எடுத்து அனுப்ப அறிவுறுத்தப்பட்டுள்ளது.
தொடர் கண்காணிப்பு: சென்னைப் பல்கலைக்கழக துணைவேந்தர் திருவாசகம் கூறும் போது, ""சுற்றறிக்கையை நாங்கள் பெற்றுள்ளோம். இதை, எங்களது நிர்வாகத்திற்கு உட்பட்ட கல்லூரிகளுக்கு தற்போது அனுப்பி வருகிறோம். கல்லூரி விடுதியில்லாமல், வெளியிடங்களில் தங்கியிருக்கும் மாணவர்களைப் பற்றிய விவரங்கள் குறிப்பாக கேட்கப்பட்டுள்ளன. அப்படிப்பட்ட மாணவர்களின் செயல்பாடுகளை, கல்லூரி வளாகத்தில் கண்காணிக்கவும் உத்தரவிடப்பட்டுள்ளது. அதன்படி, விரைவில் விவரங்களைத் திரட்டி, அரசுக்கு அனுப்புவோம்,''
என்றார். பல்கலைகளின் மூலம் முழு அறிக்கைகளும் வந்த பின், தமிழகத்தில் பயிலும் வெளி மாநில மாணவர்கள் குறித்த புள்ளி விவரங்கள் தெரியவரும். தொடர் கொள்ளை சம்பவங்களுக்கு பின், தமிழகத்தில் தங்கியுள்ள வெளி மாநிலங்களைச் சேர்ந்தவர்கள் மீது ஒரு, "கண்' வைக்கும் வேலையில் போலீசார் இறங்கியுள்ளனர்.
- நமது சிறப்பு நிருபர் -


தினமலர்