இலங்கை சென்றது இந்திய அணி! : நாளை முதல் மோதல்

கொழும்பு: இலங்கை அணிக்கு எதிரான ஒரு நாள் தொடரில் பங்கேற்க உள்ள மகேந்திர சிங் தோனி தலைமையிலான இந்திய கிரிக்கெட் அணி, நேற்று கொழும்பு சென்றது. இவ்விரு அணிகள் மோதும் முதல் போட்டி நாளை தம்புலாவில் நடக்கிறது. இலங்கை சென்றுள்ள இந்திய அணி, 5 ஒரு நாள் மற்றும் ஒரு "டுவென்டி-20' போட்டிகள் கொண்ட தொடரில் பங்கேற்க உள்ளது. இதற்காக கொழும்பு சென்ற இந்திய வீரர்களுக்கு விமான நிலையத்தில் உற்சாக வரவேற்பு அளிக்கப்பட்டது. இலங்கை தரப்பில் முரளிதரன், மெண்டிஸ் இருவரும் சுழற் பந்து வீச்சில் அசத்தி வரும் நிலையில், இந்திய அணி ஹர்பஜன் இல்லாமல் விளையாட உள்ளது. இருப்பினும் அணியில் அறிமுக சுழற்பந்து வீச்சாளராக ரவீந்திர ஜடேஜா களமிறங்குகிறார். இவருடன் இணைந்து பிரக்யான் ஓஜா அசத்த உள்ளார்.

முதல் சர்வதேச போட்டியில் களமிறங்க உள்ள ரவீந்திர ஜடேஜா கூறியது: காயம் காரணமாக ஹர்பஜன் இலங்கை தொடரில் பங்கேற்காதது ஏமாற்றம் தான். இருப்பினும் இந்திய வீரர்கள் ஒவ்வொருவரும் தங்களது சிறப்பான செயல்பாடுகளை வெளிப்படுத்துவார்கள். தேசிய அணியில் இடம் பெற்றது மறக்க முடியாத நிகழ்வு. சீனியர் வீரர்களுடன் அனுபவங்களை பகிர்ந்து கொள்வது புது அனுபவமாக இருக்கிறது. அவர்களிடமிருந்து நிறைய கற்றுக் கொண்டு வருகிறேன். இத்தொடரில் பேட்டிங், பவுலிங், பீல்டிங் என அனைத்திலும் 100 சதவீத திறமையை வெளிப்படுத்துவேன். இவ்வாறு ஜடேஜா தெரிவித்தார்.

கில் வாழ்த்து: கிரிக்கெட் கேப்டன் தோனி, சுழற்பந்து வீச்சாளர் ஹர்பஜன் சிங், பில்லியர்ட்ஸ் சாம்பியன் பங்கஜ் அத்வானி, முன்னாள் ஹாக்கி வீரர்பல்பீர் சிங் குல்லார் ஆகியோர் பத்மஸ்ரீ விருதை வென்றுள்ளனர். உயரிய கவுரவம் பெற்றுள்ள இவர்களுக்கு, மத்திய விளையாட்டு துறை அமைச்சர் எம்.எஸ்.கில் வாழ்த்து தெரிவித்துள்ளார். ஒவ்வொருவரையும் போனில் தொடர்பு கொண்ட கில், தோனிக்கு வாழ்த்து தெரிவிக்கும் நோக்கில் அவரது மொபைல் போனில் தொடர்பு கொண்டார். ஆனால் இலங்கை கிளம்பவிருந்த தோனி, மொபைல் போனை ஆப் செய்திருந்தார். அதற்கு பின் தகவலறிந்த தோனி, கில்லுடன் தொடர்பு கொண்டு பாராட்டை பெற்றுக் கொண்டார்.

அணி அறிவிப்பு : ஐந்து போட்டிகள் கொண்ட ஒரு நாள்தொடரில், முதல் மூன்று போட்டிகளுக்கான இலங்கை அணி நேற்று அறிவிக்கப்பட்டுள்ளது. 15 பேர் கொண்ட இலங்கை அணி வருமாறு: ஜெயவர்தனா (கேப்டன்), ஜெயசூர்யா, சங்ககரா, தரங்கா, கபுகேதரா, முபாரக், தில்ஷன், கண்டம்பி, முரளிதரன், மெண்டிஸ், மகரூப், பெர்னாண்டோ, குலசேகரா, மாத்தீவ்ஸ் மற்றும் துஷாரா.