நதிநீர் இணைப்பில் இனியும் தாமதம் கூடாது அரசுக்கு சுப்ரீம்கோர்ட் கண்டிப்பு

புதுடெல்லி : நதிகள் இணைப்பு திட்டத்தில் இனியும் தாமதம் கூடாது. விரைந்து நடவடிக்கை எடுக்க மத்திய அரசுக்கு உச்ச நீதிமன்றம் கண்டிப்புடன் உத்தரவிட்டுள்ளது.
நதிகளை இணைக்கும் திட்டத்தை கடந்த 2002ம் ஆண்டு அக்டோபரில் அப்போதைய பிரதமர் வாஜ்பாய் அரசு அறிவித்தது. இதற்காக செயல்திட்ட குழுவையும் அரசு அமைத்தது.

அந்த குழு தென்னக நதிகளை ஒருங்கிணைக்கவும், இமாலய மலையில் இருந்து உற்பத்தியாகும் நதிகளை இணைக்கவும் 2 திட்டங்களை தயாரித்தது. தென்னக நதிகள் இணைப்பு திட்டத்தின் கீழ் மகாநதி, கோதாவரி நதிகளின் உபரி நீரை பெண்ணாறு, கிருஷ்ணா, வைகை, காவிரி நதிகளுக்கு திருப்பிவிட அந்த குழு பரிந்துரைத்திருந்தது. மேலும், கேரளா, கர்நாடகாவில் மேற்கு நோக்கி அரபிக்கடலுக்குள் பாயும் நதிகளை கிழக்கு திசைக்கு திருப்பவும் குழு முடிவு செய்தது. மொத்தம் ரூ.5 லட்சம் கோடி செலவில் நதிகளை இணைத்தால் நாட்டின் உணவு உற்பத்தியை அதிகரிக்க முடியும் என்றும், இந்த திட்டத்தை 2016ம் ஆண்டுக்குள் செயல்படுத்திவிடலாம் என்றும் அந்த குழு கூறியது.

நதிகள் இணைப்புக்கான விரிவான திட்ட அறிக்கையும் தயாரிக்கப்பட்டது. ஆனால், நதிகள் இணைப்பு திட்டத்தை காங்கிரஸ் தலைமையிலான ஐக்கிய முற்போக்கு கூட்டணி அரசு கண்டுகொள்ளவில்லை. இதனால் இந்த திட்டத்தை நிறைவேற்ற மத்திய அரசுக்கு உத்தரவிடக் கோரி உச்ச நீதிமன்றத்தில் வழக்கு தொடரப்பட்டது. இந்த வழக்கை விசாரித்த நீதிபதிகள் ஸ்வதந்தர் குமார், ஏ.கே.பட்நாயக் ஆகியோர் நேற்று தீர்ப்பு அளித்தனர்.

நீதிபதிகள் தங்கள் தீர்ப்பில் கூறியிருப்பதாவது: நதிகள் இணைப்பு திட்டத்தை நிறைவேற்ற மத்திய அரசு நடவடிக்கை எடுக்க உத்தரவிடுகிறோம். ஏற்கனவே திட்டத்தை தொடங்குவதில் காலதாமதமாகிவிட்டதால் திட்ட மதிப்பீடு அதிகரித்துள்ளது. எனவே, குறித்த காலத்துக்குள் திட்டத்தை நிறைவேற்ற வேண்டியது அவசியம்.

இதற்காக, மத்திய அரசும் சம்பந்தப்பட்ட மாநில அரசுகளும் நதிகளை இணைக்க தீவிர முயற்சி மேற்கொள்ள வேண்டும். இந்த திட்டத்தை செயல்படுத்துவது எப்படி என்பதற்காக வழிமுறைகளை வகுத்து, திட்டத்தை கண்காணிக்கவும், அமல்படுத்தவும் உயர் நிலை குழு ஒன்றை அமைக்க வேண்டும்.

இந்த குழுவில், மத்திய நீர்வளத் துறை அமைச்சர், செயலாளர், சுற்றுச்சூழல் பாதுகாப்பு துறை செயலாளர், நீர்வளம், நிதி, சுற்றுச்சூழல் பாதுகாப்பு ஆகிய துறைகளையும் திட்டக் கமிஷனையும் சேர்ந்த தலா ஒரு நிபுணர், மாநில அரசுகளின் பிரதிநிதிகள், சமூக ஆர்வலர்கள் 2 பேர் மற்றும் இந்த வழக்கில் நீதிமன்றத்துக்கு உதவிய மூத்த வக்கீல் ரஞ்சித் குமார் ஆகியோர் உறுப்பினர்களாக இருப்பார்கள். இந்த உயர் நிலை குழு அமைப்பது தொடர்பான உத்தரவை மத்திய அரசு உடனே வெளியிட வேண்டும். நன்றி தினகரன்.....

ரொம்ப வருஷமா சொல்லி கிட்டே தான் இருக்குறங்க வேலைய தொடங்குன மாதிரி இல்லையே