காலை வாருது கிரிக்கெட்*மானம் காக்குது ஹாக்கி * ஒலிம்பிக் தகுதி பைனலில் இந்திய அணி

புதுடில்லி: இந்திய
ஹாக்கிக்கு நேற்று பொன்னான நாள். லண்டன் ஒலிம்பிக் தகுதி ஹாக்கி தொடரின்
பைனலுக்கு பெண்கள், ஆண்கள் அணிகள் முன்னேறின. பரபரப்பான கடைசி லீக்
போட்டியில் பெண்கள் அணி, இத்தாலியை 1-0 என்ற கோல் கணக்கில் வீழ்த்தியது.
ஆண்கள் அணி, போலந்தை 4-2 என்ற கோல் கணக்கில் வீழ்த்தியது.
லண்டன்
ஒலிம்பிக் போட்டிக்கு முன்னேற, தகுதி சுற்று ஹாக்கி போட்டி டில்லியில்
நடக்கிறது. நேற்று பெண்கள் பிரிவில் நடந்த கடைசி லீக் போட்டியில் இந்தியா,
இத்தாலி அணிகள் மோதின. இதில் வென்றால் மட்டுமே பைனலுக்கு முன்னேறி,
ஒலிம்பிக் கனவை தக்க வைக்க முடியும் என்ற இக்கட்டான நிலையில் இந்தியா
இருந்தது. இத்தாலியை பொறுத்தவரை "டிரா செய்தாலே போதும் என்ற நிலையில்
களமிறங்கியது.
துவக்கத்தில் இந்திய அணி ஆதிக்கம் செலுத்திய
போதும், கோல் எதுவும் அடிக்க முடியவில்லை. 9 மற்றும் 17வது நிமிடங்களில்
கிடைத்த மூன்று "பெனால்டி கார்னர் வாய்ப்புகளையும் இந்திய வீராங்கனைகள்.
29வது நிமிடத்தில் கிடைத்த நான்காவது வாய்ப்பையும் தவறவிட்டனர். இதனால்
முதல் பாதி ஆட்டம் கோல்(0-0) எதுவுமின்றி முடிந்தது.


தொடர் ஆதிக்கம்:
இரண்டாவது
பாதியில் இந்திய வீராங்கனைகள் இத்தாலி பகுதியில் தாக்குதல் நடத்தினர்.
47வது நிமிடத்தில் இத்தாலி அணிக்கு கிடைத்த "பெனால்டி கார்னர் வாய்ப்பை,
இந்தியாவின் சுஷிலா அருமையாக தடுத்தார்.


முதல் கோல்:
பின்
இந்தியாவுக்கு 54வது நிமிடத்தில் "பெனால்டி கார்னர் வாய்ப்பு வந்தது.
இம்முறை ஜஸ்ஜீத் பந்தை வேகமாக அடித்தார். அதை அப்படியே ரிது ராணி,
"ரிவர்சில் அடித்து கோலாக மாற்றினார். இதற்கு கடைசி வரை இத்தாலி அணியால்
பதிலடி தர முடியவில்லை. முடிவில் 1-0 என்ற கோல் கணக்கில் இந்திய அணி
வெற்றிபெற்று, பைனலுக்கு முன்னேறியது.
மற்றொரு லீக் போட்டியில்
கனடாவை 4-1 என வென்ற தென் ஆப்ரிக்க அணி, பைனலுக்கு முன்னேறியது. நாளை
நடக்கும் பைனலில் இந்தியா, தென் ஆப்ரிக்க அணிகள் மோதுகின்றன. இதில்
வெற்றிபெறும் அணி, லண்டன் ஒலிம்பிக் போட்டியில் விளையாட தகுதி பெறும்.


சந்தீப் அபாரம்:
ஆண்கள்
பிரிவில் நேற்று நடந்த கடைசி லீக் போட்டியில் இந்திய அணி, போலந்தை
எதிர்கொண்டது. ஆட்டத்தின் 13வது நிமிடத்தில் போலந்தின் தாமஸ் "பெனால்டி
கார்னர் மூலம் முதல் கோல் அடித்து அதிர்ச்சி கொடுத்தார். இதற்கு "பெனால்டி
கார்னர் மூலம் இந்தியாவின் சந்தீப் சிங்(26வது நிமிடம்) பதிலடி கொடுத்தார்.
முதல் பாதியில் இரு அணிகளும் 1-1 என சமநிலையில் இருந்தன.
இரண்டாவது
பாதியில் எழுச்சி கண்ட இந்திய அணிக்கு சிவேந்திர சிங்(59) ஒரு கோல்
அடித்தார். போலந்து சார்பில் மிராஸ்லாவ்(63) ஒரு கோல் அடித்தார். பின்
இந்தியாவின் ரகுநாத்(65) கோல் அடித்தார்.இறுதியில் சந்தீப் சிங்(70)ஒரு
கோல் அடித்து, இந்தியாவின் வெற்றியை <உறுதி செய்தார். இம்முறை நூறு
சதவீத வெற்றியுடன் இந்தியா பைனலுக்கு முன்னேறியது.
நாளை நடக்கும்
பைனலில் இந்தியா, பிரான்ஸ் அணிகள் மோதுகின்றன. இதில் வெற்றி
பெறும்பட்சத்தில் இந்திய அணி, லண்டன் ஒலிம்பிக் போட்டிக்கு தகுதி பெறும்.
முத்தரப்பு
கிரிக்கெட் தொடரின் பைனலுக்கு முன்னேற இந்திய கிரிக்கெட் அணி திணறி வரும்
நிலையில், ஹாக்கியில் அசத்தியிருப்பது ரசிகர்களுக்கு ஆறுதலாக அமைந்தது.


தினமலர்

ஆமாம் அக்கா
அருமையான தலைப்பு நன்றி
நானும் செய்தியில் படித்தேன்
ஒலிம்பிக் தகுதி பெற வேண்டும் என வேண்டிக் கொள்வோம்

கார்த்திக்.எம்.ஆர் wrote:ஆமாம் அக்கா
அருமையான தலைப்பு நன்றி
நானும் செய்தியில் படித்தேன்
ஒலிம்பிக் தகுதி பெற வேண்டும் என வேண்டிக் கொள்வோம்

நன்றி கார்த்தி

ஹாக்கி நமது தேசிய விளையாட்டு என்பதே பலபெருக்கு மறந்து போச்சி

இன்றும் இது உண்மையாகிப் போனது..
இன்னும் 14 நிமிடங்களே எஞ்சியுள்ள நிலையில் இந்திய அனி 8 - 1 என முன்னிலை வகிக்கிறது..
அதிலும் குறிப்பாக சந்தீப் சிங் தனக்குக் கிடைத்த 6 பெனால்டி கிக் வாய்ப்புகளில் 5 ஐ கோலாக மாற்றினார்..
எட்டும் தூரம் தான்
ஒலிம்பிக் கோப்பை
நிறைய பேருக்கு நமது தேசிய விளையாட்டு என்னவென்று தெரியும் நேரம் ..

இந்திய ஹாக்கி அணிக்கு வாழ்த்துகள்.

வென்றால் மகிழ்வோம், இல்லையேல் கண்டுக்காம விட்டுருவோம். அதுதானே நம்ம உடம்புக்கு நல்லது

வேறு இவர்களை வைத்து என்ன செய்வது

கிரிக்கெட் காலை வாறலைங்க....... புலி பதுங்குதுன்னா பாயுறதுக்குத்தான்னு புரிஞ்சுக்கோங்க.......

ஹாக்கியில் சிறப்பாக ஆடி இந்திய அணி ஒலிம்பிக் போட்டிக்கு தகுதி பெற்றிருப்பது மிகவும் மகிழ்ச்சியான செய்தி...... ஒலிம்பிக்கில் தங்கத்தை வென்று இந்தியா நாடு திரும்ப என் அன்பார்ந்த வாழ்த்துகள்

நல்ல செய்தி.இந்தியா ஹாக்கி அணி வெற்றி பெற என் மனமார்ந்த பிரார்த்தனைகள்.

ஆனாலும் நம்ம நாட்டு கிரிக்கெட் அணி உலக கோப்பை வாங்குனதுக்கு அப்புறம் கொஞ்சம் ஓவர் கான்பிடன்ஸ் ல திரிஞ்சுட்டு இருக்காங்க.
அத கொஞ்சம் குறைச்சுக்கிட்டா அவங்க எல்லாருக்கும் நல்லது.