மின்வெட்டு நேரம் அதிகாரபூர்வ அறிவிப்பு: சென்னையில் 2 மணி நேரம்; மற்ற பகுதியில் 4 மணி நேரம் மின் தடை

தமிழ்நாடு முழுவதும் மின் வெட்டு நேரம் அதிகாரபூர்வமாக அறிவிக்கப்பட்டு உள்ளது. இதன்படி நாளை (திங்கட்கிழமை) முதல் சென்னையில் 2 மணி நேரமும், மற்ற பகுதியில் 4 மணி நேரமும் மின் தடை அமலுக்கு வருகிறது.

தமிழ்நாட்டில் நிலவும் மின் பற்றாக்குறையை கருத்தில் கொண்டு மின்வினியோகத்தை சீரமைக்க தமிழக அரசு முயற்சி மேற்கொண்டு வந்தது.

இதன் அடிப்படையில், நாளை (திங்கட்கிழமை) முதல் தமிழ்நாடு முழுவதும் மின் தடை நேரம் அதிகாரபூர்வமாக அறிவிக்கப்பட்டு உள்ளது.

இது தொடர்பாக தமிழ்நாடு மின்சார வாரியம் வெளியிட்டுள்ள அறிவிப்பில் கூறியிருப்பதாவது:-

4000 மெகாவாட் பற்றாக்குறை

தமிழ்நாட்டில் மின் பற்றாக்குறை நிலவி வருகிறது. மின் தேவையின் அளவு 11,500லிருந்து 12,500 மெகாவாட்டாக உள்ளது. தமிழ்நாடு மின் உற்பத்தி நிலையங்கள், மத்திய மின் தொகுப்பு மற்றும் இதர இனங்களிலிருந்து பெறப்படும் மின்சாரத்தின் அளவு 8500 மெகாவாட் ஆகும். இதனால் சுமார் 3000 முதல் 4000 மெகாவாட் அளவிற்கு இடைவெளி ஏற்பட்டுள்ளது.

ஏற்கனவே இருந்து வரும் மின் உபயோகக் குறைப்பு மற்றும் கட்டுப்பாட்டு முறைகளால் இப்பொழுது நிலவி வரும் இடைவெளியை சீர் செய்ய இயலாத நிலையில், அறிவிக்கப்பட்டதற்கும் அதிகமான மின்வெட்டினை கையாள வேண்டிய அவசியம் ஏற்பட்டுள்ளது.

சில மாதங்களுக்கு இடர்பாடு

இந்நிலையில் பல்வேறு தரப்பு மின் உபயோகிப்பாளர்களும் இப்பிரச்சினையை எதிர்கொள்வதற்காக பல உத்திகளை தெரிவித்துள்ளனர். இப்பிரச்சினை குறித்து தமிழக அரசு தீவிரமாக ஆராய்ந்து தமிழ்நாடு மின் உற்பத்தி மற்றும் பகிர்மான கழக அதிகாரிகளுடன் பல ஆய்வுகள் நடத்தியது.

மாநிலத்தின் மின் தேவை ஆண்டுக்கு 10 சதவீதத்திற்கும் மேலாக உயர்ந்து வருகிறது. மாநிலத்தின் மின் தேவையை பூர்த்தி செய்யும் பொருட்டு 600 மெகாவாட் திறன் கொண்ட மேட்டூர் அனல் மின்திட்டம், தலா 600 மெ.வா. திறன் கொண்ட 2 அலகு வடசென்னை அனல்மின் திட்டம், தலா 500 மெ.வா. திறன் கொண்ட 3 அலகு தேசிய அனல் மின் கழகத்துடனான வள்ளூர் கூட்டு மின் திட்டம், தலா 1000 மெ.வா. திறன் கொண்ட 2 அலகு கூடங்குளம் அணு மின் திட்டம், தலா 250 மெ.வா. திறன் கொண்ட 2 அலகு நெய்வேலி பழுப்பு நிலக்கரி நிறுவனத்தின் விரிவாக்கத் திட்டம் ஆகிய மின் திட்டங்கள் இந்த ஆண்டு இயக்கத்திற்கு வந்திருக்க வேண்டிய நிலையில் பல்வேறு காரணங்களால் தாமதமாகின்ற காரணத்தினால் இத்தகைய இடைவெளி தவிர்க்க இயலாததாகி விட்டது. ஆகவே அடுத்து வரும் சில மாதங்களுக்கு இத்தகைய இடர்பாடுகள் தொடரக்கூடிய கட்டாயம் ஏற்பட்டுள்ளது.

சென்னைக்கு 2 மணி நேரம்

ஆகவே பல்வேறு தரப்பினர் அளித்த யோசனைகளின் பேரிலும், அவற்றை செயல்படுத்தும் வழிவகைகளைக் கருத்தில் கொண்டும், சில மின் விநியோகக் கட்டுப்பாட்டு முறைகள் அமலுக்கு கொண்டு வரப்படுகின்றன. இவற்றுள் பல ஏற்கனவே 2008-ல் அமலில் இருந்தவையே.

* தொழிற்சாலை மற்றும் வணிக மின் பயனீட்டாளர்களுக்கு 40 சதவீத மின்வெட்டு.

* சென்னை மற்றும் புறநகர் பகுதிகளுக்கு 2 மணி நேர மின்தடை.

ஊரகங்களுக்கு 4 மணி நேரம்

* மற்ற நகர மற்றும் ஊரகப் பகுதிகளுக்கு 4 மணி நேர மின் தடை.

* வணிக பயனீட்டாளர்களுக்கு மாலை உச்சநேர (மாலை 6 மணி முதல் இரவு 10 மணி வரை) மின் பயனீட்டுக் கட்டுப்பாடு அமல்படுத்தப்படும்.

மேற்கண்ட அறிவிப்புகள் நாளை (திங்கட்கிழமை) முதல் அமலுக்கு வருகிறது.

ஒரு நாள் `மின்விடுமுறை'

* 1.3.2012 முதல் தொழிற்சாலைகளுக்கு வாரம் ஒரு நாள் `மின் விடுமுறை' அமல்படுத்தப்படும்.

இம்மின் கட்டுப்பாட்டு முறைகள் தேவைக்கேற்றபடி அமல்படுத்தப்படும். மின்தேவையின் இடைவெளியைப் பொறுத்து மின்வெட்டின் அளவும் அவ்வப்போது மாற்றியமைக்கப்படும்.

உயர்நிலை மற்றும் மேல்நிலைப் பள்ளிகளுக்கு தேர்வு நேரங்களில் முடிந்த அளவிற்கு தடையின்றி மின்சாரம் கிடைப்பதற்கான வழிவகைகள் செய்யப்படும்.

தொழிற்சாலைகளுக்கான மின் விடுமுறை விவரம்:

திங்கள் - ஈரோடு மண்டலம்.

செவ்வாய் - சென்னை தெற்கு மண்டலம் மற்றும் திருப்பத்தூர் பகிர்மான வட்டம்.

புதன் - சென்னை வடக்கு மற்றும் மதுரை மண்டலம்,

வியாழன் - கோவை மண்டலம் திருப்பூர், நீலகிரி பகிர்மான வட்டம் நீங்கலாக.

வெள்ளி - திருநெல்வேலி மண்டலம் மற்றும் திருப்பூர், நீலகிரி பகிர்மான வட்டம்.

சனி - திருச்சி, விழுப்புரம் மற்றும் வேலூர் மண்டலம் திருப்பத்தூர் பகிர்மான வட்டம் நீங்கலாக.

ஜுன் முதல் தளர்வு

மின்னூட்டி வாரியான மின் நிறுத்தம் மற்றும் கட்டுப்பாடுகள் குறித்த அறிவிப்பினை அந்தந்த மண்டல தலைமைப் பொறியாளரோ அல்லது அந்தந்த பகுதி மின்வாரிய அலுவலர்களோ தெரிவிப்பார்கள்.

இவ்விடர்பாடு அடுத்த சில மாதங்களுக்கு நீடிக்கும். வருகின்ற ஜுன் மாதம் முதல் காற்றாலை மின் உற்பத்தி வரத்துவங்கி விடுவதாலும், புதிய மின் திட்டங்கள் வரிசையாக தொடங்கப்பட்டு விடுவதாலும் அறிவிக்கப்பட்டுள்ள சில கட்டுப்பாடுகள் தளர்த்தப்படும்.

இவ்வாறு அதில் கூறப்பட்டுள்ளது.

தினதந்தி

அதிகாரபூர்வ அறிவிப்பு சரிங்க ஆனா
அதுக்கு மேலேயே பூஸ் பூடுதே அது அப்ப
சர்வாதிகாரபூர்வ அறிவிப்புங்களா?

இதை நான் வரவேற்கிறேன் , ஆக்கபூர்வமாக சிந்தித்துள்ள தமிழக அரசுக்கு நன்றி.

தொழிற்சாலைகளுக்கு மின்விடுமுறை நல்ல செயல்
நன்றி

அறிக்கை விட்டாமட்டும் போதுமா அதை நடைமுறை படுத்த வேண்டும்..!

நல்ல முடிவு தமிழகம் மின்வெட்டினால் தத்தளித்திக் கொண்டிருக்கிறது..... எப்படியோ இந்த பிரச்சினை விரைவில் தீர்ந்தால் போதும்

வரவேர்க்க தக்கது !

பற்றாக்குறை மின் விநியோகத்தை .... சரியாக தான் பகிர்ந்துள்ளார்கள்.