போலீசாரை தாக்கி தப்பியோடிய பிரபல ரவுடி சுட்டுக்கொலை

திண்டுக்கல் அருகே போலீசாரை தாக்கி விட்டு, தப்பியோடிய பிரபல ரவுடி சுட்டுக் கொல்லப்பட்டார்.
தேனி மாவட்டம், கூடலூரை சேர்ந்தவர் மண்டைவெட்டியான் என்ற தெய்வேந்திரன். இவருக்கு திருமணமாகி ஒரு மகள் இருக்கிறார்.

ஆரம்பத்தில் கார் டிரைவராக இருந்தவர், பின்னர் கொலை, கொள்ளைகளில் ஈடுபட்டார். இவர் மீது 17 வழக்குகள் உள்ளன.கூடலூரை சேர்ந்த தொழிலதிபர் அன்பழகன் வீட்டில் 300 பவுன் நகைகளை தெய்வேந்திரன் கொள்ளையடித்தார்.

அப்போது அன்பழகனின் தாய் தெய்வம்மாள் உட்பட 3 பேரை சுட்டுக் கொலை செய்தார். இது தொடர்பான வழக்கில் தெய்வேந்திரனுக்கு தூக்கு தண்டனை விதிக்கப்பட்டது. ஜனாதிபதிக்கு அவர் அனுப்பிய கருணை மனு பரிசீலிக்கப்பட்டு, ஆயுள் தண்டனையாக குறைக்கப்பட்டது.

பின்னர், இன்னொரு வழக்கில் போலீசார் அவரை உத்தமபாளையம் நீதிமன்றத்தில் ஆஜர்படுத்தி விட்டு மதுரை வரும் போது, போலீஸ் பிடியில் இருந்து தப்பினார். பிறகு கூட்டாளி மாரியப்பன் என்பவரை கொலை செய்தார்.

மீண்டும் போலீசில் சிக்கி, திருச்சி மத்திய சிறையில் அடைக்கப்பட்டிருந்த தெய்வேந்திரன், திண்டுக்கல் நீதிமன்றத்தில் ஆஜர்படுத்தி விட்டு, பஸ்சில் திரும்பும்போது கைவிலங்கோடு தப்பினார்.

இதையடுத்து, அவரை பிடிக்க திண்டுக்கல் எஸ்.பி. பாரி தலைமையில் தனிப்படை அமைக்கப்பட்டது.

தனிப்படையினர், விருதுநகர் மாவட்டம், காரியாபட்டியில் பதுங்கியிருந்த தெய்வேந்திரனை நேற்று முன் தினம் பிடித்தனர். அவரிடமிருந்து நாட்டுதுப்பாக்கி, 5 தோட்டாக்கள் பறிமுதல் செய்யப்பட்டன.

அவரை திண்டுக்கல்லுக்கு கொண்டு வரும் வழியில் சின்னாளபட்டி அருகே நள்ளிரவில் சிறுநீர் கழிக்க அனுமதித்தனர். அப்போது, போலீசாரை தாக்கி துப்பாக்கியை பறித்து கொண்டார். பிறகு எஸ்.ஐ. புகழேந்தியை கையில் சுட்டு விட்டு தப்ப முயன்றார்.

உடனே போலீசார் சுதாரித்து, தெய்வேந்திரனை சரமாரியாக சுட்டனர். தெய்வேந்திரன் மார்பில் 3 குண்டுகள் பாய்ந்ததில் அதே இடத்தில் இறந்தார்.

திண்டுக்கல் அரசு மருத்துவமனையில் வைக்கப்பட்டிருந்த தெய்வேந்திரன் உடல், பிரேத பரிசோதனைக்கு பிறகு, உறவினர்களிடம் ஒப்படைக்கப்பட்டது.