இந்தியா முழுவதும் நாளை திரையுலகினர் வேலைநிறுத்தம் : காட்சிகள் ரத்து! _

பது · பது Wed Feb 22, 2012 4:25 pm

மத்திய அரசின் சேவை வரிக்கு எதிர்ப்புத் தெரிவித்து, இந்தியா முழுவதும் திரையுலகம் சார்பில் நாளை (வியாழக்கிழமை) வேலை நிறுத்தப் போராட்டம் நடைபெறவிருக்கிறது. படப்பிடிப்புகள், சினிமாக் காட்சிகள் ரத்து செய்யப்படுகின்றன. சென்னையில் பொதுக்கூட்டம் நடைபெறவும் ஏற்பாடு செய்யப்பட்டுள்ளது.

இதுபற்றி இந்திய திரையுலக சம்மேளனத் தலைவர் வினோத் கே.லம்பா கூறுகையில்,

திரையுலகம் ஏற்கனவே ஏராளமான பிரச்சினைகளை எதிர்கொள்ள வேண்டிய நிலையில் உள்ளது. ஏறக்குறைய 95 சதவீத படங்கள் தோல்வி அடைகின்றன. 5 சதவீத படங்கள்தான் வெற்றி பெறுகின்றன. சினிமாவுக்கு ஏற்கனவே பொழுதுபோக்கு வரி விதிக்கப்பட்டு வருகிறது. எனவே சேவை வரியை முழுவதுமாக ரத்து செய்ய வேண்டும்.

சேவை வரியை ரத்து செய்யக் கோரியும், மத்திய அரசின் கவனத்தை ஈர்க்கவும் இந்திய திரையுலக சம்மேளனம் ஒரு முழுமையான போராட்டத்துக்கு அழைப்பு விடுத்திருக்கிறது.

இதற்காக, நாளை (வியாழக்கிழமை) இந்தியா முழுவதும் தியேட்டர்கள் அனைத்தும் மூடப்படும். ஸ்டூடியோக்கள் மூடப்படும். படப்பிடிப்புகள் அனைத்தும் ரத்து செய்யப்படும். திரையுலகம் சம்பந்தப்பட்ட அத்தனை அமைப்புகளும் நாளை ஒரு நாள் மட்டும் வேலை நிறுத்தத்தில் ஈடுபடுகின்றன.

இந்தப் போராட்டத்துக்குச் சின்னத்திரை தயாரிப்பாளர்களும் ஆதரவு தெரிவித்திருக்கிறார்கள்" என்றார்.