மாநில உரிமைகளுக்கு பாதிப்பில்லை: 7 முதல்வர்களுக்கு பிரதமர் கடிதம்

புதுடெல்லி: தேசிய பயங்கரவாத தடுப்பு மையம் அமைக்கப்படுவதால், மாநில உரிமைகளுக்கு பாதிப்பு இல்லை என்று பிரதமர் மன்மோகன் சிங் விளக்கம் அளித்துள்ளார்.

இந்த அமைப்புக்கு எதிர்ப்பு தெரிவித்திருந்த தமிழகம், திரிபுரா, ஒடிஷா, குஜராத், மேற்கு வங்கம், பீகார் மற்றும் மத்திய பிரதேசம் ஆகிய முதல்வர்களுக்கு அவர் கடிதம் எழுதியுள்ளார்.

தமிழக முதல்வர் ஜெயலலிதா, மேற்கு வங்க முதல்வர் மம்தா பானர்ஜி உள்பட 7 மாநில முதல்வர்களுக்கு அவர் எழுதியுள்ள கடிதம்:

கடந்த 2001-ம் ஆண்டு நடைபெற்ற மத்திய அமைச்சர்கள் குழு கூட்டத்தில் நாட்டில் உளவு தகவல்களை ஒருங்கிணைப்பதற்காக கூட்டுப் பணிக்குழு அமைக்க வேண்டும் என்று யோசனை தெரிவித்து அறிக்கை தாக்கல் செய்யப்பட்டு இருந்தது.

அதன் அடிப்படையில் தேசிய பயங்கரவாத தடுப்பு மையம் அமைப்பது குறித்து மத்திய அரசு பரிசீலித்து வந்ததை நீங்கள் அறிந்து இருக்கலாம். அப்போது இருந்த மத்திய அரசால் இந்த அறிக்கை ஏற்றுக் கொள்ளப்பட்டு இருந்தது.

இரண்டாவது நிர்வாக சீர்திருத்த கமிஷனும், தேசிய பயங்கரவாத தடுப்பு மையம் அமைக்க வேண்டும் என்று சிபாரிசு செய்து இருந்தது. தேசிய பயங்கரவாத தடுப்பு மையம் அமைப்பதன் மூலம், அரசியல் அமைப்பு சட்டத்தின் அடிப்படை அம்சங்களையோ, மத்திய - மாநில அரசுகளுக்கு இடையே ஒதுக்கப்பட்டு இருக்கும் அதிகாரங்களையோ பாதிக்கச் செய்யும் எந்த நோக்கமும் அரசுக்கு இல்லை.

நாடு முழுவதும் பயங்கரவாதத்துக்கு எதிரான நடவடிக்கைகளை ஒருங்கிணைப்பதுதான், இந்த கமிஷன் அமைக்கப்படுவதன் முதன்மையான நோக்கமாகும். இதுவரை இந்த பணியை மத்திய புலனாய்வுப் பிரிவு (ஐ.பி.) செய்து வந்தது. புதிதாக அமைக்கப்பட இருக்கும் தேசிய பயங்கரவாத தடுப்பு மையம், இதே புலனாய்வு பிரிவின் கீழ்தான் செயல்படுமே தவிர இது ஒரு தனி அமைப்பு அல்ல.

இருந்த போதிலும், புதிய மையத்தின் செயல்பாடு குறித்து தாங்கள் தெரிவித்துள்ள கவலைகளை கவனத்தில் கொண்டுள்ள நான், உங்களுடனும் மற்ற மாநில முதல்வர்களுடனும் கலந்து பேசி, அவற்றுக்கு உரிய தீர்வு காணும்படி மத்திய உள்துறை அமைச்சருக்கு அறிவுறுத்தி இருக்கிறேன் என்று அந்தக் கடிதத்தில் பிரதமர் மன்மோக் சிங் கூறியுள்ளார்.

விகடன் .com

எப்படியோ தீவிரவாதத்தை அடியோடு ஒளிதால் சரி

தீவிரவாதம் ஒழியுதோ இல்லியோ
இவங்க எழுதிக்கற கடுதாசியால நம்ம
போஸ்டல் டிபார்ட்மெண்ட மூடாம இருப்பாக.

இவங்க எழுதுறதே ஓசி கடிதாசி எதனாலயே தபால் நிலையம் வருமானம் இல்லாமல் மூடபடலாம்