இத்தாலிய கப்பலை சிறை பிடித்ததால் பல கோடி நஷ்டம்

கொச்சி:இத்தாலிய கப்பலை கொச்சி துறைமுகத்தில் சிறை பிடித்து வைத்ததால், தினமும் மத்திய அரசுக்கு, பல கோடி ரூபாய் நஷ்டம் ஏற்பட்டது.

மேலும், துறைமுகத்தில் நிறுத்தி வைத்ததற்காக, 20 லட்ச ரூபாய், துறைமுக பொறுப்புக் கழகத்திற்கு இத்தாலிய கப்பல் தரவேண்டிய நிலையும் ஏற்பட்டுள்ளது.அரபிக் கடலில் மீன் பிடித்துக் கொண்டிருந்த தமிழக மீனவர்களை, இத்தாலி நாட்டைச் சேர்ந்த, "என்ரிகா லக்சி' என்ற எண்ணெய் கப்பலின் பாதுகாவலர்கள் சுட்டதில், இரு மீனவர்கள் பலியாகினர். இச்சம்பவம் குறித்து, கேரள போலீசார் விசாரணை நடத்தி வருகின்றனர். மீனவர்கள் சுடப்பட்டதை அடுத்து, இத்தாலிய எண்ணெய் கப்பல் கொச்சி துறைமுகத்திற்கு கொண்டுவரப்பட்டு, எண்ணெய் கப்பல்களுக்கான தளத்தில் நிறுத்தப்பட்டது.

கடந்த 16ம் தேதி கப்பல் அங்கு கொண்டு வரப்பட்ட போது, கொச்சி சுத்திகரிப்பு நிலையத்திற்காக எண்ணெய் ஏற்றி வந்த கப்பலில் இருந்து, குழாய்கள் மூலம் எண்ணெய் பம்ப் செய்யும் பணி நடந்துகொண்டிருந்தது.அவசர நிலை கருதி, அக்கப்பல் அங்கிருந்து வேறு பகுதிக்கு கொண்டு செல்லப்பட்டு, "என்ரிகா லக்சி' அங்கு நிறுத்தப்பட்டது. இவ்வாறு நான்கு நாட்களுக்கு மேல் அங்கு நிறுத்தப்பட்டதால், கொச்சி எண்ணெய் சுத்திகரிப்பு நிலையத்திற்கு எண்ணெய் ஏற்றி வந்த கப்பல்கள், அத்தளத்திற்கு வர முடியாத நிலை ஏற்பட்டு, அந்த கப்பல்கள் எல்லாம் துறைமுகத்திற்கு வெளியே நிறுத்தப்பட்டன.இதனால், எண்ணெய் பெற்று சுத்திகரித்து வெளியே அனுப்பும் பணிகள் முடங்கின. இவ்வாறு தினமும், ஒரு மணி நேரத்திற்கு ஒன்றரை லட்ச ரூபாய் என, ஒரு நாளில் 40 லட்ச ரூபாய்க்கும் மேல் சுத்திகரிப்பு நிலையத்திற்கு மட்டும் நஷ்டம் ஏற்பட்டது.சுத்திகரிப்பு நிலையத்திற்கு எண்ணெய் ஏற்றி வந்த கப்பலை வெளியே நிறுத்தி வைத்தால், அதற்காக சுத்திகரிப்பு நிறுவனம் தினமும், 40 லட்ச ரூபாயை எண்ணெய் நிறுவனத்திற்கு அளிக்க வேண்டும்.

இது தவிர, கொச்சி துறைமுக பொறுப்புக் கழகத்திற்கு, இத்தாலிய கப்பல் அங்கு எவ்வளவு நாட்கள் நிறுத்தப்பட்டதோ, அதற்குரிய வாடகையை அளிக்க வேண்டும்.இவ்வாறு, 20 லட்ச ரூபாய் செலுத்த வேண்டும். அதற்கான தொகை யை கப்பலின் கொச்சி ஏஜன்டிடம் இருந்து, துறைமுக பொறுப்புக் கழகம் வசூலிக்கும் என எதிர்பார்க்கப்படுகிறது.இந்நிலையில், கப்பல் ஊழியர்கள் இருவர் கைது செய்யப்பட்டு விட்டதால், கப்பல் கொச்சி துறைமுகத்திற்கு வெளியே கொண்டு செல்லப்பட்டு, போலீசார் கண்காணிப்பில் உள்ளது.

தினமலர்

இதன் மூலம் என்ன சொல்ல வருகிறார்கள்? எவன் வந்து நம் மீனவர்களைச் சுட்டுக் கொன்றாலும் கண்டும் காணாதது போல் இருக்கச் சொல்கிறார்களா?

என்ன நஷ்டம் ஆனாலும் சரி இறந்த மீனவர்களின்
குடும்பத்தினருக்கு நீதி / நிதி கெடச்சா சரி.

அரசியல் வியாதிகள் மக்கள் பணத்தில் ஊர்சுற்றுவதை விட இந்த தொகை குறைவுதான்

நமக்கு ஏற்பட்ட உயிர் நஷ்டத்தை விடவா பெரிய நஷ்டம் அவர்களுக்கு