தமிழக மின்சார தட்டுப்பாட்டை சமாளிக்க, ஐந்து விதமான திட்டங்களுக்கு அரசு ஒப்புதல்

by **இளமாறன்** Sun Feb 19, 2012 1:16 pm

தமிழக மின்சார தட்டுப்பாட்டை சமாளிக்க, ஐந்து விதமான திட்டங்களுக்கு அரசு ஒப்புதல் அளித்துள்ளது. வீடுகளுக்கான மின் வெட்டை பெருமளவு குறைக்க முடிவெடுக்கப்பட்டுள்ளது.

தமிழகத்திற்கு தினமும் 11 ஆயிரத்து 500 மெகாவாட் மின்சாரம் தேவைப்படுகிறது. இதில், தற்போது 3,500 மெகாவாட் அளவுக்கு பற்றாக்குறை உள்ளது. இந்த தட்டுப்பாட்டை சமாளிக்க, தமிழகம் முழுவதும் எட்டு மணி நேர மின்வெட்டு அமலாகிறது. மின்வெட்டால், வணிக நிறுவனங்கள், தொழிற்துறையினர் கடுமையாக பாதிக்கப்பட்டுள்ளனர். பிளஸ் 2 மற்றும் எஸ்.எஸ்.எல்.சி., போன்ற பொதுத்தேர்வுகளும், மற்ற வகுப்புகளுக்கு, முழு ஆண்டுத்தேர்வும் வருவதால், மின்வெட்டால் படிக்க முடியாமல், மாணவர்களும் பாதிக்கப்பட்டுள்ளனர்.

இதுகுறித்து, தமிழக மின்துறை அதிகாரிகளுடன், முதல்வர் ஜெயலலிதா கடந்த 17ம் தேதி ஆலோசனை நடத்தினார். இதில், தலைமை செயலர் தேவேந்திரநாத் சாரங்கி, மின்துறை முதன்மை செயலர் ரமேஷ்குமார் கண்ணா, மின்வாரிய சேர்மன் ராஜிவ் ரஞ்சன் மற்றும் அதிகாரிகள் பங்கேற்றனர். இதில், தமிழகத்தின் மின்சார தேவை எவ்வளவு, தற்போது மின்வாரியத்திடம் உற்பத்தியாகும் அளவு, மத்திய தொகுப்பிலிருந்து வரும் அளவு, தனியார் மற்றும் தன் பயனீட்டு நிலையத்தினர், காற்றாலை, மரபுசாரா எரிசக்தி மூலம் கிடைக்கும் மின்சார அளவு ஆகியவை குறித்து, பவர் பாயின்ட் பிரசன்டேஷன் மூலம் அதிகாரிகள் விளக்கினர். இதையடுத்து, மாணவர்களின் படிப்புக்கு இடையூறு இல்லாத வகையிலும், சாதாரண பொதுமக்களுக்கு ஓரளவாவது மின்சாரம் தர வேண்டும் என்ற அடிப்படையிலும், தொழிற்துறைக்கு பாதிப்பு ஏற்படாத வகையிலும், புதிய திட்டங்களை நடைமுறைப்படுத்த முதல்வர் ஆலோசனை கூறினார். இதன்படி, பொதுமக்களை பெரிய அளவில் பாதிக்காத வகையில், ஐந்து விதமான திட்டங்கள் மூலம், மின் தட்டுப்பாட்டை சமாளிக்க, அரசின் சார்பில் ஒப்புதல் அளிக்கப்பட்டுள்ளது.

அதன் விவரம்:

* அடிக்கடி முன்னறிவிப்பில்லாமல், மின்சாரம் தடைசெய்வது நிறுத்தப்படும்.

* பொதுமக்களுக்கான வீட்டு மின் பயன்பாடுக்கு, தற்போதைய எட்டு மணி நேர மின்வெட்டை குறைத்து, அதிகளவில் மின் வினியோகம் தரப்படும்.

* சென்னை நகருக்கு இரண்டு மணி நேரமும், சென்னைப் புறநகர் முதல் மற்ற அனைத்து மாவட்ட பகுதிகளுக்கும், ஐந்து மணி நேரத்திற்கு குறைவாகவும் மின்வெட்டு அமல்படுத்தப்படும்.

* மாணவர்கள் படிக்கும் நேரமான மாலை 6 மணி முதல் இரவு 10 மணி வரை, மிகக்குறைந்த அளவுக்கு மின்வெட்டு அமல்படுத்தப்படும். இதற்காக, மாலை 6 மணி முதல் இரவு 10 மணி வரை, உயரழுத்த வணிகரீதியிலான மின் இணைப்புகளுக்கும், தொழிற்சாலைகளுக்கும் தனியாக கூடுதல் மின்வெட்டு அமல்படுத்தப்படும். இதில் சேமிப்பாகும் மின்சாரத்தை, மாணவர்கள் படிப்புக்காக வீடுகளுக்கு தரப்படும்.

* உயரழுத்த தொழிற்சாலைகள் மற்றும் வணிக இணைப்புகளுக்கு, 20 சதவீதமாக இருக்கும், மின் பயன்பாடு கட்டுப்பாட்டை, 40 சதவீதமாக உயர்த்தி அமல்படுத்தப்படும்.

* தொழிற்சாலை சங்கங்கள் மற்றும் தொழிலதிபர்களின் கோரிக்கைப்படி, அவர்கள் விருப்பப்படும் வார நாட்களில் ஒரு நாள், 24 மணி நேர மின்வெட்டு அமல்படுத்தப்படும். இதுதொடர்பாக, தொழிற்சாலை சங்கங்கள் மற்றும் தொழிலதிபர்கள் மனு அளித்தால், அவர்களது கோரிக்கைகள் பரிசீலிக்கப்படும்.

* இனி அனைத்து இடங்களுக்கும், குறிப்பிட்ட நேரத்தை அறிவித்து, அதன்படி மட்டுமே மின்வெட்டு அமல்படுத்தப்படும். இதன்மூலம், மின்வெட்டு நேரத்தை கணக்கிட்டு, ஒவ்வொரு தரப்பினரும் தங்கள் பணிகளை திட்டமிடலாம். இவ்வாறு முடிவுகள் எடுக்கப்பட்டுள்ளன.

இதுகுறித்து, மின்துறை அதிகாரி ஒருவர் கூறியதாவது: அரசின் ஆலோசனைப்படி, மின்துறை அதிகாரிகள் திட்டங்கள் தயாரித்து வருகின்றனர். மின்சார வார விடுமுறை குறித்து, தொழிற்சாலை சங்கங்களிடம் அவர்களது ஆலோசனை மற்றும் கோரிக்கை மனுக்கள் பெறப்படுகின்றன. இந்த மனுக்களின் முடிவுப்படி, விடுமுறை அமலாகும். கூடுதல் மின்வெட்டு முறை, நாளை முதல் பரீட்சார்த்த முறையில் அமலாக உள்ளது. இதில் ஏற்படும் நடைமுறை சிக்கல்களை ஆய்வு செய்த பின், முழுமையான அளவில் நடைமுறையாகும். இவ்வாறு அவர் கூறினார்.

தொழிற்சாலைகளுக்கு "வாட்' சலுகை: தொழிற்சாலைகள் மற்றும் உயரழுத்த வணிக இணைப்பு உள்ளவர்கள், டீசல் ஜெனரேட்டர்களை அதிகளவில் பயன்படுத்த கேட்டுக் கொள்ளப்பட்டுள்ளனர். டீசல் விலை அதிகமாக உள்ளதால், அவர்களுக்கு வாட் வரியில், உள் பயனீட்டு சலுகை வழங்கவும், மின்துறையிலிருந்து அரசுக்கு பரிந்துரைக்கப்பட்டுள்ளது. இதேபோல், பெரிய நிறுவனங்கள் மற்றும் தொழிற்சாலைகள் தங்களுக்கு வெளிச்சந்தையிலும், தனியார் மின்சார நிலையங்களிடமும், தனியாக மின்கொள்முதல் செய்து கொள்ளவும், மின்துறையிலிருந்து அனுமதி அளிக்கப்பட்டுள்ளது.

- ஹெச்.ஷேக் மைதீன் -

தினமலர்