கடல் ஆபத்து

கரையில் இருந்தால்தான் படகுகளுக்கு பாதுகாப்பு. ஆனால் அவை கடலுக்குள் செல்வதற்குத்தான் உருவாக்கப்பட்டுள்ளதே தவிர, கரையில் நிறுத்தி வைப்பதற்கு அல்ல என்று சொல்வார்கள். மீனவர்கள் நிலைமையும் அப்படித்தான். கடல் ஆபத்தை மட்டுமல்ல, துப்பாக்கி சூடு ஆபத்தையும் சந்திக்க வேண்டியிருக்கிறது. இலங்கை கடற்படையிடம் நமது மீனவர்கள் வாங்கிவரும் அடி கொஞ்ச நஞ்சமல்ல. இந்த நிலையில் இத்தாலி சரக்கு கப்பலில் இருந்தவர்கள் துப்பாக்கியால் சுட்டதில் இரண்டு மீனவர்கள் இறந்து போயிருக்கிறார்கள்.



கடலில் அலையும் கொந்தளிப்பும்தான் பிரச்னை, மற்றபடி ஒரு ஆபத்தும் இல்லை என்ற நிலை மாறிவிட்டது. கடலுக்குள் மீன்பிடிக்க போனால் உயிரோடு திரும்ப முடியுமா என்ற சந்தேகம் வரும் அளவுக்கு ஆபத்து நிறைந்த பகுதியாக மாறிவருகிறது. எல்லை தாண்டி போனால்தான் உயிருக்கு உத்தரவாதமில்லை என்றால், நம் கடல் எல்லையில் மீன் பிடித்தாலும் ஆபத்து தேடி வருகிறது. எகிப்தில் இருந்து சிங்கப்பூர் சென்று கொண்டிருந்த என்ரிகா லெக்ஸி என்ற இத்தாலி நாட்டு சரக்கு கப்பல் இந்திய மீனவர்கள் மீது துப்பாக்கியால் சுட்டதில் இரண்டு பேர் உயிரிழந்துள்ளனர்.




கடலில் ஆபத்தான, சந்தேகத்துக்கு இடமான கப்பலை, படகுகளை பார்த்தால் உடனடியாக கப்பல் மீட்பு ஒருங்கிணைப்பு மையத்துக்கு தகவல் தெரிவிக்க வேண்டும். அதுதான் விதிமுறை. அப்படி செய்யாமல் துப்பாக்கி சூடு நடத்தியுள்ளனர். தகவல் கிடைத்ததும் இந்திய கடற்படையினர் சந்தேகத்துக்கு உரிய நான்கு கப்பல்களை மடக்கி விசாரணை நடத்தி இத்தாலி கப்பலை கொச்சி துறைமுகத்துக்கு கொண்டுவந்துள்ளனர். எங்கள் கப்பலை விரட்டிக் கொண்டு வந்தார்கள். வெளிச்சம் பாய்ச்சி விசாரிக்க மேற்கொண்ட முயற்சிக்கு பலன் இல்லை. கடல் கொள்ளையர்களாக இருப்பார்களோ என்ற சந்தேகம் ஏற்பட்டது.



எனவேதான் சுட்டோம் என அவர்கள் கூறியிருப்பதை நம்ப முடியவில்லை. சோமாலியா கொள்ளையர்களால் கடல் பயணம் ஆபத்தானதாக மாறிவிட்டது. எல்லோரையும் சந்தேகப்பட வேண்டியிருக்கிறது. ஆனால் சாதாரண விசைப் படகில் எந்தவித ஆயுதமும் இல்லாமல் இருந்தவர்கள் எப்படி அவ்வளவு பெரிய கப்பலுக்கு ஆபத்தை ஏற்படுத்த முடியும் எனத் தெரியவில்லை. அரண்டவன் கண்ணுக்கு இருண்டதெல்லாம் பேய் என்பார்கள். இந்த சம்பவத்தில் அந்த பழமொழிதான் நினைவுக்கு வருகிறது.

தலையங்கம்
தினகரன்

உண்மைதான்...தமிழனுக்கு பல வழிகளிலும் தட்டழிவே