ஜெனரேட்டர் டீசலுக்கு மாணவர்களிடம் தலா ரூ.150 கேட்கும் தனியார் பள்ளி

by மகா பிரபு Sun Feb 19, 2012 7:24 am

ஜெனரேட்டர் டீசல் செலவு, பராமரிப்புக்கு என, தலா, 150 ரூபாய் தர வேண்டும் என, தஞ்சாவூரில் தனியார் மெட்ரிக் பள்ளி நிர்வாகம், பெற்றோருக்கு, "அன்பு வேண்டுகோள்' விடுத்துள்ளது.

தஞ்சாவூரில், சீனிவாசபுரத்தில், "ஸ்ரீவெங்கடேஷ்வரா மெட்ரிக் மேல்நிலைப் பள்ளி' இயங்கி வருகிறது. இப்பள்ளி நிர்வாகத்தின் சார்பில், பெற்றோருக்கு அனுப்பிய அறிவிப்பு நோட்டீசில் கூறியிருப்பதாவது: மின்வெட்டு காரணமாக, பள்ளி வேலை நேரத்தில், காலை 9 மணி முதல், 12 மணி வரை மற்றும் மாலையில், 3 மணி முதல், 6 மணி வரை, மூன்று ஜெனரேட்டர்களை பயன்படுத்துகிறோம். அதனால், டீசல் செலவு, பராமரிப்புக்கு நிதி தேவைப்படுவதால், தாங்கள் இம்மாத காலாண்டு பள்ளிக்கட்டணம் செலுத்தும்போது, குழந்தைகள் ஒருவருக்கு தலா, 150 ரூபாய் வீதம் கூடுதலாக செலுத்துமாறு, "மிகவும் அன்புடன்' கேட்டுக் கொள்கிறோம். இவ்வாறு தெரிவிக்கப்பட்டுள்ளது.

அதிர்ச்சியடைந்த பெற்றோர், இதுகுறித்து கல்வித் துறை அதிகாரிகளிடம் புகார் தெரிவித்தனர். இதுகுறித்து, அப்பள்ளி முதல்வர் ஜெய்சங்கர் கூறுகையில், ""பள்ளியில் மாணவர்கள் படிக்க வசதியாக, மின்வெட்டு நேரங்களில் ஜெனரேட்டர் இயக்கப்படுகிறது. இதற்கான டீசல், பராமரிப்பு செலவு கூடுதலாக ஏற்படுவதை ஈடுகட்டவே, பெற்றோரிடம் நிதி கேட்டுள்ளோம். வேண்டுகோள் வைக்கப்பட்டுள்ளதே தவிர, இதுவரை வசூல் ஏதும் செய்யவில்லை,'' என்றார். மெட்ரிக் பள்ளிகளின் ஆய்வாளர் திருவளர்ச்செல்வி கூறுகையில், ""கல்வி கட்டணம் தவிர, வேறு எந்த நிதியையும் தனியார் பள்ளி நிர்வாகம், பெற்றோரிடம் வசூலிக்கக் கூடாது. புகாரின் பேரில், மேற்கண்ட பள்ளி தாளாளரிடம் விசாரித்து, உரிய நடவடிக்கை எடுக்கப்படும்,'' என்றார்.

தினமலர்