மின் தட்டுப்பாடு: இன்று அறிக்கை சமர்ப்பிக்கிறது மின் வாரியம்

தமிழகத்தின் மின்சார நிலைமை குறித்து சென்னை தலைமைச் செயலகத்தில் வெள்ளிக்கிழமை ஆய்வு நடத்திய முதல்வர் ஜெயலலிதா. உடன், மின்துறை அமைச்சர் நத்தம் விஸ்வநாதன

சென்னை, பிப். 17: தமிழகத்தில் நிலவி வரும் மின் தட்டுப்பாட்டை எப்படி சமாளிப்பது என்பது குறித்த பல்வேறு பரிந்துரைகள் அடங்கிய அறிக்கையை மின் வாரியம் தமிழக அரசிடம் சனிக்கிழமை சமர்ப்பிக்க உள்ளது.

தமிழகத்தின் மின்சார நிலைமை குறித்த ஆலோசனைக் கூட்டம் முதல்வர் ஜெயலலிதா தலைமையில் தலைமைச் செயலகத்தில் வெள்ளிக்கிழமை நடைபெற்றது.

இதில் மின்துறை அமைச்சர் நத்தம் விஸ்வநாதன், வருவாய்த்துறை அமைச்சர் செங்கோட்டையன், நிதியமைச்சர் ஓ.பன்னீர்செல்வம், தலைமைச் செயலர் தேவேந்திரநாத் சாரங்கி, மின் வாரிய தலைவர் ராஜீவ் ரஞ்சன் மற்றும் அதிகாரிகள் பங்கேற்றனர்.

தமிழகத்தின் மின் நிலைமை குறித்து ராஜீவ் ரஞ்சன் கூட்டத்தில் விளக்கம் அளித்தார். அப்போது மின் தட்டுப்பாட்டை சமாளிப்பது குறித்த வழிமுறைகளை அறிக்கையாக தயாரித்து அளிக்குமாறு முதல்வர் அறிவுறுத்தினார்.

அதன் பிறகு, மின் வாரியத் தலைவர் ராஜீவ் ரஞ்சன் மின் வாரிய தலைமை அலுவலகத்தில் அதிகாரிகளுடன் ஆலோசனை நடத்தினார். இந்த ஆலோசனைக் கூட்டத்துக்குப் பின்னர், பல்வேறு பரிந்துரைகள் அடங்கிய அறிக்கையை மின் வாரிய அதிகாரிகள் தயாரித்துள்ளனர்.

இதில் சென்னையில் மின் வெட்டு நேரத்தை அதிகரிக்கச் செய்து, பிற மாவட்டங்களில் இப்போது நிலவி வரும் மின் வெட்டு நேரத்தைக் குறைப்பது. தொழில் நிறுவனங்களுக்கு வாரத்தில் இரண்டு நாள்கள் மின்சார விடுமுறை அளித்து, அதன் மூலம் மிச்சமாகும் மின்சாரத்தை வீடுகளுக்கு அளிப்பது. இப்போது நடைமுறைப்படுத்தி வரும் மின்வெட்டு நிலையை நீடிப்பது.

வெளிச் சந்தையில் மின்சாரம் வாங்கி, நிலைமையை ஓரளவு சமாளிப்பது என்பன உள்ளிட்ட பல்வேறு பரிந்துரைகள் இந்த அறிக்கையில் குறிப்பிடப்பட்டுள்ளன.

வெளிச் சந்தையில் மின்சாரம் வாங்குவதால், மின் வாரியத்தின் நிதி நிலைமை மேலும் மோசமடையும் என்பது குறித்தும் அதில் குறிப்பிடப்பட்டிருப்பதாக அதிகாரிகள் தெரிவிக்கின்றனர்.

இந்த அறிக்கையை மின் வாரியம், தமிழக அரசிடம் சனிக்கிழமை சமர்ப்பிக்கிறது. இதன் பிறகே, தமிழகத்தின் மின் வெட்டை சமாளிக்க எத்தகைய நடவடிக்கை எடுக்கப்படும் என்பது குறித்து தெரியவரும். அறிக்கை சமர்பித்த ஓரிரு நாள்களில் இறுதி முடிவு எடுக்கப்பட்டுவிடும் என்றும் அதிகாரிகள் தெரிவித்தனர்.

தினமணி