தேவகோட்டையில் நடந்த அ.தி.மு.க. நிர்வாகிகள் கூட்டத்தில் மோதல்: நாற்காலிகள் வீச்சு

முதல்- அமைச்சர் ஜெயலலிதா பிறந்தநாள் விழா நடத்துவது தொடர்பான அ.தி.மு.க. நிர்வாகிகள் ஆலோசனைக்கூட்டம் தேவகோட்டையில் திருப்பத்தூர் சாலையில் உள்ள ஒரு திருமண மண்டபத்தில் நேற்று மாலை நடந்தது. மாவட்ட செயலாளர் கே.ஆர்.முருகானந்தம் தலைமை தாங்கினார்.

தேவகோட்டை நகரச் செயலாளர் ராமச்சந்திரன் வரவேற்று பேசினார்.

அவர் பேசும்போது 'இந்த கூட்டத்தில் ஜெயலலிதா பிறந்தநாள் விழா பற்றி மட்டுமே பேசவேண்டும் மற்ற எதைப்பற்றியும் பேசக்கூடாது' என்றார். உடனே வட்டச் செயலாளர் பூக்கடை கண்ணன், 'மதுக்கடை பார் பற்றி எப்போதுதான் பேசுவது?' எனக்கேட்டார். தேவகோட்டை நகரசபை தலைவர் கே.ஆர்.சுமித்ராவின் கணவர் ரவிக்குமார், 'நகரசபை தலைவியான எனது மனைவியின் பெயரை ஏன் வரவேற்புரையில் சொல்லவில்லை' என்று கேட்டு வாக்குவாதத்தில் ஈடுபட்டார்.

இதனால் கூட்டத்தில் கடும் வாக்குவாதம் ஏற்பட்டது. அப்போது நகரச்செயலாளர் ராமச்சந்திரனுக்கு ஆதரவாக 10 பேர் ரவியுடன் கடும் வாக்கு வாதத்தில் ஈடுபட்டனர். திடீரென்று அவர்கள் ரவியை தாக்கியதாக கூறப்படுகிறது. கூட்டத்தில் ரவியின் தந்தையும் தேவகோட்டை நகர ஜெயலலிதா பேரவை இணைச் செயலாளருமான காட்டுராஜா என்ற ஜெகதீசனும் இருந்தார். மகனை காப்பாற்ற சென்றார். அவருக்கும் அடி-உதை விழுந்தது. சட்டை கிழிந்தது. இதனை கண்ட ரவியின் அதரவாளர்கள் அவரை சூழ்ந்து கொண்டு அவர் மீது அடிபடாமல் பாதுகாத்தனர்.

அப்போது ரவியின் ஆதரவாளர் கீழவயல் பழனியப்பன் சட்டையும் கிழிந்தது. கூட்டத்தில் சிலர் நாற்காலியை தூக்கி வீசினர். கூட்டத்தில் இருந்தவர்கள் அலறியடித்துக்கொண்டு வெளியே ஓடினர். மாவட்ட செயலாளரும் வெளியேறி காரில் ஏறி சென்று விட்டார். பின்னர் கட்சியின் முக்கிய பிரமுகர்கள் இருதரப்பினரையும் சமதானம் செய்தனர். தகவல் கிடைத்து போலீசாரும் விரைந்து வந்து கூட்டத்தை கலைத்தனர். மேலும் மோதல் ஏற்படாமல் இருக்க மண்டபத்தை இழுத்து பூட்டினர்.

மாலைமலர்

சிவா அண்ணா , நீங்கதான் அந்த சண்டைக்கு முக்கிய காரணமுனு அரசல் புரசலா பேசிக்கிறாங்க