விஜிலன்ஸ் ரெய்டு : பெரியார் பல்கலைக்கழக அதிகாரிகள் சிக்குகின்றனர்

இரா.பகவதி · இரா.பகவதி Fri Feb 17, 2012 6:18 pm

ஓமலூர்: சேலம் பெரியார் பல்கலைக்கழகத்தில் லஞ்ச ஒழிப்பு போலீசார் நேற்றிரவு நடத்திய அதிரடி சோதனையில் ஏராளமான ஆவணங்கள் சிக்கியுள்ளன. தேர்வு எழுதாமலே மாணவர்கள் பாஸானதாக அறிவித்தது உள்பட பல்வேறு முறைகேடுகள் நடந்திருப்பது அம்பலமாகி உள்ளது. இதில் ஈடுபட்ட பல்கலை அதிகாரிகள், பேராசிரியர்கள் வழக்கில் சிக்குகின்றனர். சேலம் பெரியார் பல்கலைக்கழகத்தின் கீழ் சேலம், நாமக்கல், தர்மபுரி, கிருஷ்ணகிரி ஆகிய 4 மாவட்டங்களில் 74 அரசு, தனியார் கல்லூரிகள் இயங்கி வருகின்றன. இந்த கல்லூரிகளில் 40 ஆயிரத்துக்கும் அதிகமான மாணவ, மாணவிகளும், பல்கலைக்கழகத்தில் 2 ஆயிரம் மாணவர்களும் படித்து வருகின்றனர். பல்கலைக்கழகத்தில் போதிய கல்வித் தகுதி இல்லாதவர்களுக்கு பணத்தை பெற்றுக் கொண்டு பணி நியமனம் வழங்கியுள்ளதாக புகார் எழுந்தது. மேலும் விடைத்தாள் திருத்தம் செய்வதிலும் மோசடி நடந்திருப்பதாகவும் பல்கலைக்கழக தேர்வில் ரேங்க் வழங்குவதற்கும், மார்க் ஷீட் வழங்கவும் மாணவர்களிடம் பணம் பெறுவதாகவும் சேலம் லஞ்ச ஒழிப்பு போலீசாருக்கு புகார்கள் சென்றன.

இதையடுத்து லஞ்ச ஒழிப்பு டிஎஸ்பி சந்திரமவுலி தலைமையில் 5 பேர் கொண்ட குழுவினர் நேற்று இரவு பெரியார் பல்கலைக்கழகத்தில் அதிரடி சோதனையில் ஈடுபட்டனர். தேர்வு கட்டுப்பாடு அலுவலகத்தில் தீவிர சோதனை நடத்தப்பட்டது. பல்கலைக்கழக பதிவாளர் (பொ) அங்கமுத்து, தேர்வு கட்டுப்பாட்டு அலுவலர் பிரின்ஸ் தங்கராஜ் ஆகியோரிடம் போலீசார் விசாரணை நடத்தினர். நள்ளிரவு 12 மணி வரை சோதனை நீடித்தது. இந்த சோதனையின்போது கடந்த 5 ஆண்டுகளில் பணி நியமனம் செய்யப்பட்டவர்களின் பட்டியல் மற்றும் அவர்களின் கல்விச் சான்றிதழ்கள், தேர்வு கட்டுப்பாட்டு அறையில் இருந்து 443 விடைத்தாள்கள் மற்றும் அதன் டம்மி எண் பேப்பர்கள், மதிப்பெண் சான்றிதழ்கள் ஆகியவற்றை போலீசார் கைப்பற்றினர். மேலும் பல முக்கிய ஆவணங்களும் சிக்கியுள்ளதாக கூறப்படுகிறது.

ஆவணங்களை லஞ்ச ஒழிப்பு போலீசார் தீவிரமாக ஆய்வு செய்து வருகின்றனர். முதல்கட்டமாக 2 மாணவர்கள் தேர்வு எழுதாமலேயே தேர்ச்சி பெற்றதாக சான்றிதழ் வழங்கப்பட்டிருப்பது தெரியவந்துள்ளது. மதிப்பெண் பட்டியலில் பல மாணவர்களின் மார்க் குளறுபடி நடந்திருப்பதும் கண்டுபிடிக்கப்பட்டுள்ளதாக தெரிகிறது. இதுதொடர்பாக தொடர்ந்து ஆய்வு செய்யப்பட்டு வருகிறது. பல்கலைக்கழகத்துக்கு உட்பட்ட கல்லூரிகளில் படிக்கும் மாணவர்கள் தேர்ச்சி பெறாவிட்டால், அவர்களை மறு மதிப்பீடு மூலம் தேர்ச்சி பெற வைக்க பணம் வாங்கியதாகவும், தினக்கூலி அடிப்படையில் ஊழியர்களை பணியமர்த்தி மோசடியில் ஈடுபட்டதாகவும் விசாரணையில் தெரியவந்துள்ளது. இந்த முறைகேட்டில் பெரியார் பல்கலைக்கழக அதிகாரிகள், அலுவலர்கள் மற்றும் பேராசிரியர்கள் சிக்குவார்கள் என்று லஞ்ச ஒழிப்பு போலீசார் தெரிவித்தனர். கைப்பற்றப்பட்ட ஆவணங்கள் அடிப்படையில் அவர்கள் மீது நடவடிக்கை எடுக்கவும் லஞ்ச ஒழிப்பு போலீசார் முடிவு செய்துள்ளனர்.

இதுதொடர்பான அறிக்கை அரசுக்கு அனுப்பி வைக்கப்பட உள்ளதாகவும், அரசு உத்தரவு வந்தபின் முறைகேட்டில் ஈடுபட்ட அனைவர் மீதும் வழக்கு பதிவு செய்து நடவடிக்கை எடுக்கப்படும் என்றும் லஞ்ச ஒழிப்பு போலீஸ் அதிகாரி ஒருவர் தெரிவித்தார். பெரியார் பல்கலைக்கழகத்தில் நள்ளிரவில் நடந்த சோதனையால் பெரும் பரபரப்பு ஏற்பட்டுள்ளது.