தண்டனை வாங்கிக் கொடுங்கள்

இது சிங்கப்பூரில் நடந்த சம்பவம். ஆனால் நமது போலீசாருக்கும் பாடம் சொல்லித்தரும் சம்பவம். ஒரு வாரத்துக்கு முன்பு, சிங்கப்பூரில் தமிழர்கள் கொண்டாடும் தைப்பூசம் திருவிழா, வெகு விமரிசையாகக் கொண்டாடப்பட்டது. அங்குள்ள தமிழர்கள் எல்லாம் ஒன்றாகக் கூடி, மகிழ்ச்சியோடு `ஓம் முருகா' என்று பக்திப்பரவசத்தோடு வழிபட்டனர். அந்த விழாவை கொண்டாடிய அறிவழகன் என்ற 31 வயது தமிழரை, அதற்குப்பிறகு காணவில்லை. சிங்கப்பூர் போலீசார் உடனடியாக வழக்குப்பதிவு செய்து தேடினார்கள். அன்றே, அறிவழகன் உடல் பிணமாக ஒரு மேம்பாலத்தின் அடியில் கிடப்பதைக் கண்டு பிடித்தனர். புலன் விசாரணையை முடுக்கிவிட்டனர். சில மணி நேரங்களுக்குள், அங்கு கட்டிடத் தொழிலாளியாக பணிபுரியும் திருச்சியைச் சேர்ந்த 20 வயது வாலிபர் தேவராஜனை கைது செய்து, சிறையில் அடைத்தனர். மின்னல் வேகத்தில் குற்றப்பத்திரிகை தாக்கல் செய்யப்பட்டது. வழக்கு நடந்தது. கொலை நடந்தது 8-ந் தேதி. குற்றவாளிக்கு ஒரே வாரத்தில் கோர்ட்டில் மரண தண்டனை விதிக்கப்பட்டது.

இந்த சம்பவத்தை, தமிழ்நாட்டில் உள்ள அனைத்து போலீஸ் நிலையங்களுக்கும் உடனடியாக தெரிவித்து, இதுபோல வழக்குகளின் புலன் விசாரணையை முடித்து, ஒரு குறிப்பிட்ட காலக்கெடுக்குள் தண்டனை வாங்கிக்கொடுக்கவேண்டும் என்று நிர்ணயிக்க வேண்டும். தமிழ்நாட்டில் உள்ள கீழ்க்கோர்ட்டுகள் தொடங்கி, மேல் கோர்ட்டுகள் வரை, எண்ணற்ற கிரிமினல் வழக்குகள் தேங்கிக்கிடக்கின்றன. இதற்கெல்லாம் காரணம், வழக்குகளை பதிவு செய்யும் போலீசார், புலன் விசாரணையில் தீவிரம் காட்டாமல், குற்றவாளிகளைக் கைது செய்வதில் நீண்ட தாமதம் காட்டுகிறார்கள். அடுத்து குற்றப்பத்திரிகை தாக்கல் செய்வதில் தாமதம். தொடர்ந்து சரியான சாட்சிகளைக் கொண்டு வந்து, வழக்குகளை திறமையாக நடத்தி, தண்டனை வாங்கிக் கொடுப்பதில் சரியான ஆற்றல் இல்லையா? அல்லது வேறு காரணங்களா? என்று தெரியவில்லை.

அந்தக் காலத்தில் தஞ்சாவூர் மாவட்டத்தைச் சேர்ந்த ராமலிங்கம் பிள்ளை என்று ஒரு சப்-இன்ஸ்பெக்டர் திருநெல்வேலி மாவட்டத்தில் பல இடங்களில் பணியாற்றினார். பிறகு இன்ஸ்பெக்டர், துணை சூப்பிரண்டு என்று சென்னை உள்பட சில இடங்களில் வேலை பார்த்தார். காமராஜர் ஆட்சி காலத்திலேயே, கன்னியாகுமரி மாவட்டம் மண்டைக்காட்டில் மத கலவரம் வருவதுபோல இருந்தது. அப்போது காமராஜர், சென்னையில் ரகசிய போலீஸ் பிரிவில் இருந்த ராமலிங்கம் பிள்ளையை ஒரு ஆண்டு காலம் `ஸ்பெஷல் டூட்டி' என்று மண்டைக்காட்டுக்கு அனுப்பு, கலவரம் வராது என்று அனுப்பினார். ராமலிங்கம் பிள்ளை, ஒரு வழக்கில் புலன் விசாரணை செய்தால், குற்றம் சாட்டப்பட்டவருக்கு அதிகபட்ச தண்டனை நிச்சயம். நார்ட்டன் துரையே வக்கீலாக வந்தாலும் காப்பாற்ற முடியாது என்பார்கள். அப்படி போலீஸ் அதிகாரிகள் அந்தக்காலங்களில் இருந்தார்கள். சர்க்கிள் இன்ஸ்பெக்டர்கள், துணை சூப்பிரண்டுகள், மாவட்ட சூப்பிரண்டுகள் என்று ஒவ்வொரு மட்டத்திலும் உள்ள உயர் அதிகாரிகள், மாதா மாதம் ஒவ்வொரு போலீஸ் ஸ்டேஷன் வாரியாக, எத்தனை வழக்குகள் நிலுவையில் உள்ளன? அதற்கு என்ன காரணம்? கீழ்க்கோர்ட்டில் விடுதலை கிடைத்தால், மேல் கோர்ட்டில் தண்டனை வாங்கித்தர என்ன செய்யலாம்? கேஸ் டைரி, சாட்சிகள் வாக்குமூலம் ஆகியவற்றை புலன் விசாரணை செய்யும் சப்-இன்ஸ்பெக்டரே கைப்பட எழுதினாரா? என்பதுபோல ஆய்வு நடத்தி, பாடாய்ப் படுத்திவிடுவார்கள். இந்த வேகத்தை இப்போது ஏன் காணவில்லை?

வழக்குகள் தாமதமாவதால், குற்றம் சாட்டப்பட்டவர்கள் ஜாமீனில் வெளியே வந்து, அந்த பகுதியிலேயே ராஜா போல நடமாடுகிறார்கள். இதுமட்டுமல்லாமல், வழக்கை பதிவு செய்யும் அதிகாரி மாற்றப்பட்டு, வேறு அதிகாரி வந்தால், அவர் அந்த வழக்கில் வேகம் காட்டுவதில்லை. கொலை, கொள்ளை, கற்பழிப்பு போன்ற பெரிய பதட்டமான வழக்குகளை பதிவு செய்யும் போலீஸ் அதிகாரிதான் இறுதிவரை வழக்கை நடத்தி, தண்டனை வாங்கிக்கொடுக்க வேண்டும். அதுவரையில் கூடுமான வரையில், அந்த போலீஸ் நிலையத்திலேயே பணியாற்ற முடியுமா? என்று பரிசீலிக்க வேண்டும். மொத்தத்தில் வழக்குகள் புலன் விசாரணை, கோர்ட்டுகளில் வழக்கை நடத்தி தண்டனை வாங்கிக்கொடுப்பது உள்பட பல முக்கியமான விஷயங்கள் குறித்து உயர் போலீஸ் அதிகாரிகள் ஆழ்ந்து ஆய்வு செய்து, புதிய நடைமுறைகளை அமலுக்கு கொண்டு வரவேண்டிய காலம் கனிந்துவிட்டது.

தினதந்தி