சிரித்தே எரித்தான் சிவபெருமான் !

சிவபெருமான் திரிபுரத்தை எரித்தான் என்று ஒரு வரலாறு கூறுவார்கள். கமலாட்சன், விருபாட்சன், வித்யுன்மாலி என்ற மூன்று அசுரர்கள் இரும்பு மதில், வெள்ளி மதில், தங்க மதில் ஆகிய மதில்களைக் கொண்டு அரசு புரிந்தார்கள்.

இந்த அசுரர்களின் கொடுமை தாங்காமல் தேவர்கள் முறையிட்டனர். உடனே இம்மூன்று மதில்களையும் சிவபெருமான் சிரித்து எரிகொளுத்தினான் என்பது புராணம் கூறும் வரலாறு.

இதில் எதுவுமே இயற்கைக்கு ஒத்ததாகவோ அறிவுக்குப் பொருந்துவதாகவோ இல்லை என்பது வெளிப்படை. மூன்று மதில்களாம்!. இரும்பு, வெள்ளி, தங்கத்தால் ஆனவையாம்!. அவை சிரித்தே கொளுத்தப்பட்டனவாம்.
யார் நம்புவார்கள்?

இவற்றையெல்லாம் அப்படியே படித்து நம்புபவன் மூடன்; இவற்றின் அடியுறைப் பொருளைக் காண்பவன் அறிஞன். என்று திருமூலர் கூறுகிறார். பாடல் பின்வருமாறு.

“அப்பணி செஞ்சடை ஆதி புராதனன்
முப்புரம் எரித்தனன் என்பர்கள் மூடர்கள்
முப்புரமாவது மும்மல காரியம்
அப்புரம் எய்தமை யாரறி வாரே!”

சிவபெருமான் சிரித்து எரித்தது ஆணவம், கன்மம், மாயை என்கின்ற மூன்று மலங்கள். அவையே மும்மதில்கள் என உருவகிக்கப்பட்டன்.
ஆணவம் கடினம் ஆனது; இரும்பு என உருவகிக்கப்பட்டது.
கன்மம் என்பதில் நல்வினை சில சுகங்கள் கொடுப்பதால் வெள்ளி என விரும்பும் உலோகமாக உருவகிக்கப்பட்டது.
மாயை என்பது மலமானாலும் உயிர்க்கு சிறிது சிறிதாக அறிவொளி ஊட்டும் கருவிக்கு அடிப்படையானதால் அது தங்கம் எனப்பட்டது.

இவை மூன்றும் உயிரைச்சூழ்ந்து நிற்பதால் இவை மதில்கள் எனப்பட்டன. இவை மூன்றில் கன்மமும், மாயையும் சென்று சென்று மீண்டும் பற்றி உயிருக்கு உடல் அமைவதால் இவை பறக்கும் மதில்கள் எனப்பட்டன. ஆணவம் வலிதாக இருண்டதாக இரும்பாக இருந்தாலும் இறுதியில் முத்தியில் வலி மடங்கிப் போவதால் அதுவும் பறக்கும் மதிலாயிற்று.

இதை சிவபெருமான் சிரித்தே எரித்தான் என்றது இறைவன் இம்மூன்றை நீக்குவதை அவ்வளவு எளிதாகச் செய்தான் என்பதைக் குறிக்கிறது.

திரிபுரம் எரித்தது இறைவனது எட்டு வீரச்செயல்களில் ஒன்றாகக் கூறப்படுகிறது. இதன் உட்பொருளை தெளிவு படுத்தியதைப் போலவே ஏனைய ஏழையும் ‘பதிவலியில் வீரட்டம் எட்டு’ என்ற தலைப்பில் இரண்டாம் தந்திரத்தில் திருமந்திரத்தில் பாடுகின்றார் திருமூலர்.
(நன்றி: பிரதோஷ வழிபாடு உள்ளுறை – உமா பதிப்பகம்)

நண்பரே நல்ல அறிவார்ந்த விளக்கம் அளித்தமைக்கு நன்றிகள். பொதுவாக அந்த காலத்தில் படிக்காத மக்களுக்கு இதுபோன்று கதைகள் மூலமாக சொன்னால் இன்னும் இலகுவாக விளங்கிக்கொள்வார்கள் என்று சொல்லப்பட்டிருக்கலாமோ என்னவோ? எப்படியானாலும் பரப்பப்படுவது இறைவன் புகழ்தானேயன்றி வேறொன்றும் இல்லையே! நன்றி

நன்றி ! அசுரன்