பக்கத்து வீட்டுக்காரர்!

மேலூரில் சுந்தரம் என்ற பணக்காரன் இருந்தான். அவனது அடுத்த வீட்டுக்காரன் லட்சாதிபதி பாலு. சுந்தரத்திற்கும், பாலுவிற்கும் ஒரு சிறு விஷயத்தில் மனஸ்தாபம் ஏற்பட்டது. இதனால் பாலு, சுந்தரத்தை தன் பகைவனாகக் கருதி வந்தான்.

ஒருமுறை சுந்தரம் தன் வீட்டைப் பூட்டிக் கொண்டு குடும்பத்தோடு அயலூர் போய் ஒருவார காலம் அங்கேயே தங்கி விட்டான். அவ்வளவு தான். பாலு தன் மாடுகளை, சுந்தரம் வீட்டுக் கொல்லையில் ஏவி விட்டு, அங்கு வளர்ந்திருந்த காய்கறிச் செடி, பூஞ்செடிகளை ஒன்று விடாமல் மேய வைத்து மொட்டையடிக்கச் செய்தான்.

ஊர் திரும்பிய சுந்தரம் தன் கொல்லைப்புறம் பாழானதைக் கண்டு திடுக்கிட்டான். இனியும் பாலுவுடன் பகைமை பாராட்டினால் தான் சுக வாழ்வு வாழ முடியாது என எண்ணி அவனுடன் நட்புறவு கொள்ள தீர்மானித்துக் கொண்டான் சுந்தரம்.

அப்போது அவ்வூரின் பச்சையப்பன் என்ற பண்டிதர் சுந்தரத்திடம் கைமாற்றாக கொஞ்சம் பணம் கேட்க வந்தார்.

சுந்தரனும், ""நீங்கள்தான் அதிசாமர்த்தியசாலியே. நான் சொல்லும் ஒரு வேலையைச் செய்து முடித்தால் நீங்கள் கேட்கும் பணத்தைக் கைமாற்றாக கொடுத்து உதவுகிறேன்,'' என்றான்.

பச்சையப்பனும், ""என்ன செய்ய வேண்டும்?''என்றான்

""என் அடுத்த வீட்டுக்காரன் பாலு என்னோடு பகைமை பாராட்டாமல் எனது நண்பனாக வேண்டும்,'' என்றான்.

பச்சையப்பனும், அதைச் செய்து விடுவதாகக் கூறிவிட்டுச் சென்றான்.

மறுநாள் பாலு, சுந்தரத்தைத் தேடி அவனது வீட்டிற்கு வந்து, ""அண்ணே! இதற்குமுன் உங்களுக்கு நான் இழைத்த கொடுமைகளுக்கு மன்னிப்பு வேண்டுகிறேன். நடந்ததை எல்லாம் மறந்து விடுங்கள். இனி நாம் நண்பர்களாக இருப்போம். என் மகனுக்கு கல்யாணம் நிச்சயமாகி விட்டது. நீங்கள்தான் வந்திருந்து நடத்திக் கொடுக்க வேண்டும்,'' என வேண்டினான்.

சுந்தரம், பாலு மனம் மாறியது கண்டு மகிழ்ந்து, அவனது நண்பன் ஆனான்.

பிறகு சுந்தரம், பச்சையப்பனிடம் வந்து, ""ஆமாம்! பாலுவின் மனதை எப்படி மாற்றினீர்கள்?'' என்று கேட்டான்.

""அக்கம்பக்கத்தவரைப் பகைத்துக் கொண்டால் அதனால் விளையும் தீமைகளை பாலுவுக்கு எடுத்து விளக்கினேன். மேலும், பகைவனுக்கு அருள்வதே, "நல்நெஞ்சு' என்று எடுத்து கூறினேன். அவரும் மனம் மாறி விட்டார்,'' என்றார் பச்சையப்பன்.

""ஓ! அப்படியானால் அவர் புத்திசாலி என்கிறீர்களா?'' என சுந்தரம் கேட்டார்.

பச்சையப்பனும், ""அவரை விட நீங்கள் தான் அதிக புத்திசாலி. ஏனெனில், பகைமையை ஒழித்து நட்புறவு கொள்ள வேண்டும் என முதலில் நினைத்ததே நீங்கள் தானே!'' என்றான்.

சுந்தரமும் மனம் மகிழ்ந்து பச்சையப்பன் கேட்ட தொகையைக் கைமாற்றாக கொடுத்து உதவினான்.

சிறுவர் மலர்

எனக்கும் பக்கத்து வீட்டு அமோய்க்கும் அடிக்கடி சண்டை வருகிறது, நட்போடு இருக்க ஏதாவது ஒரு வழி சொல்லுங்கள் அங்கள்.

மனிதர்களுடன் அதுவும் அயலவருடன் சமாதானமாக பிணக்கில்லாமல் வாழ்வதுகூட ஒரு அற்புதமான கலைதான்.