12 ஆயிரம் அடி உயரத்தில் இருந்து குதித்த ராணுவ அதிகாரிகள்

**சிவா** · **சிவா** Sun Feb 12, 2012 2:01 pm

சென்னையில் நடைபெற்ற ராணுவ அதிகாரிகளின் மெய் சிலிர்க்கும் சாகச நிகழ்ச்சியை குழந்தைகள் வெகுவாக ரசித்தனர்.

சாகச நிகழ்ச்சி

சென்னை பரங்கிமலை ராணுவ அதிகாரிகள் பயிற்சி மையத்தில் (ஒ.டி.ஏ.) பயிற்சி பெறும் அதிகாரிகளுக்கு தன்னம்பிக்கையை ஏற்படுத்தும் வகையிலும், சாகசங்கள் மீது ஆர்வத்தை ஏற்படுத்தும் வகையிலும் அவ்வப்போது பாராசூட் சாகச நிகழ்ச்சிகள் நடத்தப்படுவது வழக்கம்.

எதிரி நாட்டு ரேடருக்கு தெரியாமல் பாராசூட்டில் இறங்கி தாக்குதல் நடத்துவது எப்படி என்பதே இந்த பயிற்சியின் நோக்கம். தற்போது ராணுவ அதிகாரிகள் பயிற்சி மையத்தின் பொன்விழா ஆண்டையொட்டி ஒரு சிறப்பான வானவெளி திருவிழாவுக்கு இந்திய ராணுவம் நேற்று ஏற்பாடு செய்திருந்தது.

அதன்படி, தாம்பரத்தை அடுத்த சிங்கபெருமாள் கோவில் அருகே உள்ள அனுமந்தபுரம் துப்பாக்கி சுடும் பயிற்சி மையத்தில் பாராசூட் சாகச நிகழ்ச்சி தொடங்கியது. வியக்க வைக்கும் இந்த சாகச நிகழ்ச்சியை ராணுவம் மற்றும் விமானப்படையினர் இணைந்து நடத்தினர்.

உற்சாக கொண்டாட்டம்

இந்த நிகழ்ச்சியை காண்பதற்கு செங்கல்பட்டை சுற்றியுள்ள பகுதிகளை சேர்ந்த பொதுமக்கள், பள்ளி, கல்லூரி மாணவ, மாணவிகள் என ஏராளமானவர்கள் பயிற்சி மையத்தில் குவிந்திருந்தனர்.

சாகச நிகழ்ச்சியின் முதல் நிகழ்வாக தரையில் இருந்து 12 ஆயிரம் அடி உயரத்தில் பறந்து கொண்டிருந்த விமானத்தில் இருந்து 13 வீரர்கள் ஒவ்வொருவராக பாராசூட் மூலம் குதித்தனர். பறவைகளைபோல் பறந்தபடி, வானில் மிதந்து வந்த வீரர்களை கண்டதும் மாணவர்கள் உற்சாக குரல் எழுப்பினர்.

ஆக்ராவில் இருந்து 7 பாராசூட் ராணுவ படை வீரர்களும், 6 விமானபடை வீரர்களும் இந்த சாகச நிகழ்ச்சியில் பங்கு பெற்றனர். முதலில் 6 பேரும், அதன் பின்னர் 7 பேரும் விமானத்தில் இருந்து குதித்து தரை இறங்கினர்.

தேசிய கொடி வண்ணத்தில்...

மெய்சிலிர்க்கும் வகையில் நடைபெற்ற இந்த நிகழ்ச்சிகளை குழந்தைகள் மிக உற்சாகமாக கண்டு களித்தனர். அதிலும் குறிப்பாக தேசிய கொடியின் வண்ணங்களுடன் 3 வீரர்கள் பாராசூட்டில் ஒரே நேர்கோட்டில், ஒரே நேரத்தில் பறந்து வந்து தரை இறங்கியதை கண்டு பார்வையாளர்கள் மெய் மறந்து போயினர்.

போர்க்களம் போல் ஆனது...

கார்கில் போரை நினைவு கூறும் வகையில் போர்க்கள காட்சி பயிற்சி அளிக்கப்பட்டது. போர்க்களத்தில் பயன்படுத்தப்படும் அனைத்து ஆயுதங்களையும் பயன்படுத்தி பயிற்சி மேற்கொள்ளப்பட்டது.

இதில் வெடிகுண்டு தாக்குதலில் இருந்து தப்புதல்? எதிரியை வெடிகுண்டை வெடிக்க செய்து எவ்வாறு வீழ்த்துவது? என்பது குறித்து பயிற்சி அளிக்கப்பட்டது. பதுங்குகுழியில் மறைந்திருந்து எவ்வாறு எதிரியை குறிபார்த்து தாக்குவது என்பது பற்றியும் பயற்சி அளிக்கப்பட்டது.

இந்த நிகழ்ச்சிகளை பரங்கிமலை ராணுவ பயிற்சி மையத்தின் தலைவர் லெப்டினட் ஜோ உள்பட ராணுவ உயர் அதிகாரிகள் கண்டு ரசித்தனர்.

தமிழர்

ராணுவ அதிகாரிகளின் சாகச நிகழ்ச்சியில் 12 ஆயிரம் அடி உயரத்தில் பறந்த விமானத்தில் இருந்து, பாராசூட் மூலம் கீழே குதித்த தமிழக வீரர் குப்புசாமி கூறியதாவது:-

திருவண்ணாமலை மாவட்டம், நவம்பட்டி எனது கிராமம். இதுவரையில் 700-க்கு மேல் பாராசூட் பயிற்சி மேற்கொண்டு உள்ளேன். பாராசூட் வீரர்களுக்கு ஆக்ராவில் பயிற்சி கொடுக்கிறார்கள்.

பயிற்சியின்போது முதல் முதலாக பாராசூட் மூலம் கீழே குதிக்கும்போது பயம் இருக்க தான் செய்யும். நாங்கள் 12 ஆயிரம் அடியில் இருந்து குதித்தோம். ஒரு வினாடிக்கு 180 கி.மீ. வேகத்தில் பூமியை நோக்கி வந்தோம்.

எதிர்பார்த்து காத்திருக்கிறேன்...

விளையாட்டுக்காகவும், போர் முனைக்காகவும் இந்த பயிற்சியை மேற்கொள்ளலாம். ஆபத்து காலங்களில் விமானத்தில் இருந்து குதித்து பாராசூட் மூலம் கீழே இறங்கும் நேரத்தில் 3 நாட்களுக்கு தேவையான உணவு மற்றும் பொருட்கள் அடங்கிய 45 கிலோ எடை கொண்ட பையையும் எடுத்து வருவோம்.

இன்று நடைபெற்ற பயிற்சியில் ஒரே தமிழர் என்பதில் எனக்கு பெருமையாக உள்ளது. இந்த தேசத்திற்காக போர் முனைக்கு செல்லும் நாட்களை நான் எதிர்பார்த்து காத்திருக்கிறேன்.

இவ்வாறு அவர் கூறினார்.

தினதந்தி