வெட்டோரிக்கு ஸ்டிராஸ் பாராட்டு!

மூன்றாவது அம்பயர் அவுட் கொடுத்த பின்பும், கோலிங்வுட்டை விளையாட அனுமதித்த, நியூசிலாந்து கேப்டன் வெட்டோரிக்கு, இங்கிலாந்து அணியின் கேப்டன் ஸ்டிராஸ் பாராட்டு தெரிவித்துள்ளார்.
சாம்பியன்ஸ் டிராபி தொடரில் "பி' பிரிவில் நடந்த முக்கிய போட்டியில் நியூசிலாந்து, இங்கிலாந்து அணிகள் மோதின. இதில் 11வது ஓவரை கைல் மில்ஸ் வீசினார். 6வது பந்தை கோலிங்வுட் விக்கெட் கீப்பரிடம் விட்டுவிட்டார். "ஓவர்' முடிந்து விட்ட நிலையில், "கிரீசை' விட்டு வெளியேறினார். ஆனால் நியூசிலாந்து விக்கெட் கீப்பர் பிரண்டன் மெக்கலம் பந்தை "ஸ்டம்ப்ஸ்' நோக்கி எறிந்து ரன் அவுட் கோரினார். மூன்றாவது அம்பயரும் ரன் அவுட் கொடுத்தார்.
அம்பயர் "ஓவர்' முடிந்து விட்டதாக சொன்னதால், விதிமுறைப்படி ரன் அவுட் கோர முடியாது. இதையடுத்து விளையாட்டு உணர்வுடன் நடந்து கொண்ட நியூசிலாந்து கேப்டன் வெட்டோரி, ரன் அவுட்டை வாபஸ் பெற்றார். பின் கோலிங்வுட் தொடர்ந்து விளையாடினார். இதுகுறித்து வெட்டோரி கூறுகையில்,""மூன்றாவது அம்பயர் கொடுத்த அவுட் குறித்து அணியின் சக வீரர்களிடம் விவாதித்தேன். கோலிங்வுட் ரன் எடுக்கும் நோக்கத்துடன் கிரீசை விட்டு வெளியே வரவில்லை. ஓவர் முடிந்ததால் வெளியே வந்தார். அதனால் தான் அவரை திரும்ப விளையாட அனுமதித்தேன்,'' என்றார்.
வெட்டோரியின் இந்த செயலை இங்கிலாந்து அணியின் கேப்டன் ஸ்டிராஸ் பாராட்டியுள்ளார். இதுகுறித்து அவர் கூறுகையில்,"" வெட்டோரியின் செயல் பாராட்டுக்கு உரியது. அவர் செய்தது சரியான முடிவு தான். ஆனால் போட்டியில் வெற்றி பெற்றால் தான் அரையிறுதிக்கு செல்ல முடியும் என்ற நிலையில் வெட்டோரி முடிவு கடினமானது,'' என்றார்.