இந்தியாவில் பரிதாபம் கருக்குழாய் புற்றுநோயால் 7 நிமிடத்துக்கு 1 பெண் பலி

by **இளமாறன்** Sun Feb 05, 2012 4:35 pm

மும்பை: கருக்குழாயை தாக்கும் புற்றுநோய் பாதிப்பால், நம் நாட்டில் 7 நிமிடங்களுக்கு ஒரு பெண் பலியாவதாக புள்ளிவிவரம் அதிர்ச்சி அளிக்கிறது.
உலக சுகாதார அமைப் பின் சர்வதேச புற்றுநோய் ஆராய்ச்சி ஏஜென்சி சார்பில் குளோபோகேன்&2008 என்ற புள்ளிவிவர அறிக்கை வெளியிடப்பட்டுள்ளது. அதில் புற்றுநோய் பாதிக்கும் இந்திய பெண்கள் பற்றிய விவரங்கள் அதிர்ச்சி தருகின்றன. 2008ம் ஆண்டில் 72,825 பெண்கள் கருக்குழாய் புற்றுநோய்க்கு பலியாகினர்.
மார்பக புற்றுநோயால் இறந்த பெண்கள் எண்ணிக்கை 53,592. நாடு முழுவதும் பரவலாக இது நடந்தாலும் மெட்ரோ நகரங்களில் வசிக்கும் பெண்கள்தான் அதிகமாக புற்றுநோய்க்கு பலியாகினர்.
‘கிராமங்களில் வசிக்கும் பெண்களின் சுகாதார அக்கறையின்மை (குறிப்பாக, பிறப்புறுப்புகளை சுத்தமாக பராமரிக்காதது) கருக்குழாய் புற்றுநோய் தாக்க காரணமாகிறது. மாநகர பெண்களிடையே தாமதிக்கப்படும் குழந்தைப்பேறு, குறைந்த கால தாய்ப்பால் ஊட்டுதல், உடல் பருமன் ஆகிய காரணங்களால் மார்பக புற்றுநோய் ஆபத்து அதிகம்’ என்று அறிக்கையில் கூறப்பட்டுள்ளது.
இதனால், 2025ம் ஆண்டில் 4.6 நிமிடத்துக்கு ஒரு பெண் பலியாகும் அளவுக்கு கருக்குழாய் புற்றுநோய் அதிகரிக்கும் அபாயம் உள்ளது.
அதே போல், 6.2 நிமிடத்துக்கு ஒரு பெண் மார்பக புற்றுநோயால் இறக்கக் கூடும். இந்த கணிப்புகளை பொய்யாக்க சரியான தடுப்பு நடவடிக்கைகள் உடனடியாக தேவை. குறிப்பிட்ட கால இடைவெளியில் பெண்கள் கருக்குழாய், மார்பக பரிசோதனைகள் செய்து கொள்வது அவசியம். இவ்வாறு அறிக்கையில் கூறப்பட்டுள்ளது.

தினகரன்