சுவாமி போட்ட குண்டு, ப.சிதம்பரம் அருகே வெடித்தே விட்டது!

சுவாமி போட்ட குண்டு, ப.சிதம்பரம் அருகே வெடித்தே விட்டது!

2ஜி வழக்கில் சுப்ரமணியம் சுவாமியின் மனு ஒன்றை ஏற்றுக் கொண்டதன் மூலம், மத்திய அரசுக்கு ‘இடி’ ஒன்றைக் கொடுத்திருக்கிறது உச்ச நீதிமன்றம். இந்த வழியில் சுவாமி சுற்றி வளைத்து பிரதமர் அல்லது ப.சிதம்பரத்தை வழக்குக்குள் இழுத்து விடுவார் போலிருக்கிறது.

ஜனதா கட்சித் தலைவர் சுப்ரமணியம் சுவாமி, 2ஜி வழக்கில் பிரதமர் அலுவலகம் ஏற்படுத்திய தாமதம் குறித்து தமது மனுவில் குறிப்பிட்டிருந்தார். அரசு ஊழியர் ஒருவரை வழக்கு விசாரணைக்கு அழைக்க அனுமதி கோரினால், அனுமதி வழங்குவதற்கு நீண்ட காலம் எடுத்துக் கொள்ளுவது பற்றிய விவகாரம் இது.


“நம்ம வழக்கெல்லாம் மேலே.. மேலிடத்தில் போய் அடிக்கும்!”
2ஜி ஸ்பெக்ட்ரம் ஊழல் வழக்கில் முன்னாள் அமைச்சர் ஆ.ராசாவுக்கு எதிராக வழக்கு தொடர பிரதமர் அலுவலகத்திடம் அனுமதி கேட்ட சம்பவத்தை மனுவில் ஹைலைட் செய்திருந்தார் சுவாமி.

சுவாமியின் அனுமதிக் கோரிக்கையை பிரதமர் அலுவலகம் கிடப்பில் போட்டு வைத்திருந்தது. குழறந்த பட்சம் இல்லை என்றாவது பதிலளிக்கவில்லை. தனது மனுவில் சுவாமி, “2008-ம் ஆண்டு நவம்பர் 29-ம் தேதி பிரதமர் அலுவலகத்துக்கு கடிதம் எழுதியிருந்தேன். ஆனால் பிரதமர் அலுவலகம் 2010-ம் ஆண்டு மார்ச் 19-ம் தேதிதான் பதிலளித்தது” என்றும் தெரிவித்திருந்தார்.

சுவாமியின் மனுவை ஏற்றுக் கொண்ட உச்சநீதிமன்றம், அரசு ஊழியர்களுக்கு எதிராக வழக்கு தொடர யாராவது அனுமதி கேட்டால் அதுகுறித்து நிர்வாகம் 3 மாதங்களுக்குள் பதிலளிக்க வேண்டும் என்று உத்தரவிட்டுள்ளது. இதற்கு ஒருபடி மேலே போய், “4 மாதங்களாக பதில் அளிக்கவில்லை என்றால் குறிப்பிட்ட அரசு ஊழியருக்கு எதிராக வழக்கு தொடரலாம் என நீதிமன்றம் முடிவுசெய்யும்” என்று உச்சநீதிமன்றத் தீர்ப்பில் தெரிவிக்கப்பட்டுள்ளது.

இது சுப்ரமணியச் சுவாமிக்கு கிடைத்துள்ள வெற்றி என்றும் சொல்லலாம், மத்திய அரசுக்கு ஏற்பட்டுள்ள சங்கடம் என்றும் சொல்லலாம்.2ஜி-ஸ்பெக்டரம் ஊழல் வழக்கு தொடர்பாக சுவாமியின் வேறு சில மனுக்கள் பென்டிங்கில் உள்ளன. அவற்றில் முக்கிய மனு, இந்த விவகாரத்தில் முன்னாள் நிதி அமைச்சர் ப.சிதம்பரத்தை ஒரு குற்றவாளியாக விசாரிக்க வேண்டும் என்பது. அவர் தற்போது உட்துறை அமைச்சராக உள்ளதால், அதற்கு அரசு அனுமதி பெறப்பட வேண்டும். சுவாமி செய்துள்ள மற்றொரு மனுவில் பிரதமர் மன்மோகன் சிங் சாட்சியாக விசாரிக்கப்பட வேண்டும் என்று கோரப்பட்டுள்ளது.

இந்தக் கோரிக்கைகள் தொடர்பாக அரசு அனுமதி வழங்குவதை மத்திய அரசு தாமதப் படுத்திக்கொண்டு செல்லலாம் என்ற நிலை இதுவரை இருந்தது (அதைத்தான் செய்துகொண்டும் இருந்தார்கள்)

இப்போது கதை மாறியிருக்கிறது. பிரதமர் அலுவலகத்துக்கு அனுமதி கோரி கடிதம் அனுப்பிவிட்டு காலண்டரைப் பார்த்துக்கொண்டு இருக்கப் போகிறார் சுவாமி!

தகவல் பகிர்வு - தமிழ் வாரஇதழ் செய்திகள்