அமீர் தந்த பளார் அதிர்ச்சியில் உதவி இயக்குனர்

அமீர் தந்த பளார் அதிர்ச்சியில் உதவி இயக்குனர்

பத்தாயிரம் ரூபாய் கடன் வாங்க போனால் கூட அதற்காக பத்தாயிரம் இடத்தில்கையெழுத்து கேட்கும் காலத்தில் ஒரு இயக்குனரை நம்பி எவ்வித உத்தரவாதமும் இல்லாமல் கோடிக்கணக்கில் பணத்தை கொடுக்கும் தயாரிப்பாளர் எவ்வளவு பெரிய புண்ணியவான் தெரியுமா? ஆனால் இதுபற்றியெல்லாம் எந்த அக்கறையும் இல்லாமல் முதல் படத்திற்கே பத்து லட்சம் சம்பளத்தை நிர்ணயித்திருக்கிறார் டைரக்டர் அமீர்.



இந்த சம்பளத்தை முறையாக கொடுக்கவில்லை என்றால் அதை இயக்குனர் சங்கமே தலையிட்டு வாங்கிக் கொடுக்கும் என்பதும் அமீரின் உத்தரவாதம்.

மேலோட்டமாக பார்த்தால் இது நல்ல விஷயமாக இருக்கும். ஆனால் நாளைக்கு சங்கம் அது இது என்று வந்து நின்றால் என்னாவது என்ற அச்சத்தில் புது இயக்குனர்களுக்கு வாய்ப்பு கொடுக்கவே தயாரிப்பாளர்கள் அஞ்சுவார்கள் என்பதையும் கருத்தில் கொள்ள வேண்டும்.

போகட்டும்... நாம் சொல்லப்போவது இன்னொரு அதிர்ச்சிகரமான சம்பவத்தைதான். நேற்றைய தினம் இயக்குனர்கள் சங்கத்தில் இந்த புதிய சம்பள அறிக்கை தொடர்பாக ஒரு கூட்டம் நடந்தது. இதில் கலந்து கொள்ள சங்கத்தை சேர்ந்த பல இயக்குனர்களும் உதவி இயக்குனர்களும் வந்திருந்தார்கள். இட நெரிசல் காரணமாக உட்கார முடியாமல் தவித்த ஒரு உதவி இயக்குனர் மற்றொரு இயக்குனரான செந்தில்நாதன் பக்கத்தில் நெருக்கிக் கொண்டு அமர்ந்தார். சீனியர் இயக்குனர் என்ற மரியாதையே இல்லாமல் தன்னை நெருக்கிய அந்த உதவி இயக்குனரை லேசாக கடிந்து கொண்டார் செந்தில்நாதன். இதை கவனித்துவிட்ட அமீர் சட்டென்று எழுந்து சென்று அவரை பளார் என்று அறைந்துவிட்டார்.

இதனால் அங்கு சில நிமிடங்கள் கூச்சலும் குழப்பமும் நிலவியது. அமீருக்கு வெளியில் ஆயிரம் டென்ஷன் இருக்கும். அதற்காக உதவி இயக்குனரை தாக்குவதா? என்று கூடி கூடி கொந்தளித்தார்கள் உதவி இயக்குனர்கள்.

காலையில் உதவி இயக்குனர்கள் விஷயத்தில் சம்பள சந்தோஷத்தை தந்த அமீர் அன்று மாலையே பளார் விட்டதுதான் கோடம்பாக்கத்தின் இப்போதைய பரபரப்பு.

தகவல் பகிர்வு - தமிழ் வாரஇதழ் செய்திகள்