ஜெ. விளக்கம் தராவிட்டால் இளங்கோவனுக்கு கெட்ட கோபம் வரும்!

கூடங்குளம் அணுமின் திட்டம் தொடர்பாக ஆதரவாகவும், எதிர்ப்பாகவும் கருத்துக்கள் வெளியாகியுள்ள நிலையில், இந்தத் திட்டத்துக்கு எதிர்ப்பு தெரிவித்து போராடுபவர்களை தமிழக அரசு ஏன் கைது செய்யவில்லை? தமிழக அரசு உடனடியாக விளக்கமளிக்க வேண்டும்” என்று அடித்துக் கேட்டிருக்கிறார் தமிழக காங்கிரஸ் முன்னாள் தலைவர் இளங்கோவன்.

“கூடங்குளத்தில் அணு மின்சக்தி உற்பத்தி தொடங்கும் போது, 1000 மெகாவாட் மின்சாரம் தமிழ்நாட்டுக்கு தருவதாக பிரதமர் உறுதி அளித்துள்ளார். அவ்வளவு மின்சாரம் கிடைக்கும் பட்சத்தில் தமிழ்நாட்டில் மின்வெட்டு இல்லாத நிலை உருவாகும்.

இதை கருத்தில் கொண்டு கூடங்குளம் எதிர்ப்பாளர்கள் மீது தமிழக அரசு கடும் நடவடிக்கை எடுக்க வேண்டும். தேவைப்பட்டால் பாதுகாப்பு சட்டத்தின் கீழ் நடவடிக்கை எடுக்க வேண்டும். இவர்கள் மீது இதுவரை ஏன் நடவடிக்கை எடுக்கப்படவில்லை என்பது பற்றி பொது மக்களுக்கு தமிழக அரசு விளக்கமளிக்க வேண்டும்” என்றும் அவர் கூறியுள்ளார்.

கூடம்குளம் போராட்டத்தை முன்னின்று நடத்தும் உதயகுமார் தொடர்பாகவும் குற்றம்சாட்டியுள்ளார் இளங்கோவன். “உதயகுமார் பற்றி பல புகார்கள் வருகின்றன. அவர் தேச நலனுக்கு எதிராக செயல்படுவதாகவும் தகவல்கள் வந்துள்ளது. தொண்டு நிறுவனங்கள் மூலம் வெளிநாடுகளில் இருந்து பணம் வந்துள்ளதும் தெரியவந்துள்ளது. இவர்மீதும் மாநில அரசு உரிய நடவடிக்கை எடுக்க வேண்டும்”

இப்படிக் கூறியுள்ள இளங்கோவன் ஒரு விஷயத்தை தெரிவிக்கவில்லை.
வெளிநாடுகளில் இருந்து பணம் வரும் விவகாரம், தேச நலனுக்கு எதிராக செயற்படல் ஆகிய விவகாரங்களில் நடவடிக்கை எடுக்கும் அதிகாரம் மாநில அரசிடம் இல்லை, மத்திய அரசிடமே உள்ளது.இவர் குறிப்பிடும் வெளிநாட்டு பண வருகை குற்றச்சாட்டு, international money laundering என்ற பிரிவின்கீழ் வருகிறது. தேச நலனுக்கு எதிராக செயற்படல் என்பது protecting national security என்ற பிரிவின்கீழ் வருகிறது. முதலாவது மத்திய நிதி அமைச்சின் கீழும், இரண்டாவது மத்திய உட்துறை அமைச்சின் கீழும் வருகின்றன.

மத்தியில் ஆட்சி செய்வது, இளங்கோவன் உறுப்பினராக உள்ள காங்கிரஸ் கட்சிதான். அவர்கள் ஏன் நடவடிக்கை எடுக்கவில்லையாம்?“மாநில அரசு நடவடிக்கை எடுக்காத பட்சத்தில் மத்திய அரசு கடும் நடவடிக்கை எடுக்க வேண்டும். இதுவரை மத்திய அரசு நடவடிக்கை எடுக்காதது வருத்தமாகதான் உள்ளது” என்றும் கூறியுள்ளார் காங்கிரஸ் கட்சியைச் சேர்ந்த இளங்கோவன்.

ரொம்ப வருத்த படாதிங்க சார். டில்லியில் சொல்லி பாருங்க. உங்க பேச்சை நிச்சயம் கேட்பாங்க!

தகவல் பகிர்வு - தமிழ் வாரஇதழ் செய்திகள்

இளங்கோவன் இன்னொரு துக்ளக் (சோ)............தமிழ் நாட்டில் காங்கிரஸ் இருப்பதை உணர்த்த இவர் அடிக்கடி பேசுவது வாடிக்கை .....இவருக்கு என்ன மரியாதை என்பதை உலகம் அறியும் ..................