பழம்பெரும் நடிகர் இடிச்சபுளி செல்வராஜ் மரணம்

**சிவா** · **சிவா** Tue 31 Jan 2012 - 14:14

பழம்பெரும் நடிகர் இடிச்சபுளி செல்வராஜ் மூச்சுத்திணறல் ஏற்பட்டு மரணம் அடைந்தார். அவருக்கு வயது 72.

எம்.ஜி.ஆர், சிவாஜிகணேசன், ரஜினிகாந்த், கமல்ஹாசன், அஜீத் ஆகியோருடன் ஆயிரத்தில் ஒருவன், கர்ணன், வேலைக்காரன், படையப்பா, முத்து, வில்லன், வரலாறு உள்பட 100-க்கும் மேற்பட்ட படங்களில் இடிச்சபுளி செல்வராஜ் நடித்து இருக்கிறார். எம்.ஜி.ஆர். நடித்த `இதயக்கனி,' `உலகம் சுற்றும் வாலிபன்' ஆகிய படங்களில் உதவி டைரக்டராக பணிபுரிந்தார்.

கடந்த சில வருடங்களாகவே உடல்நலக்குறைவுடன் இருந்த அவருக்கு, நேற்று காலை 7 மணிக்கு திடீர் மூச்சுத்திணறல் ஏற்பட்டது. உடனடியாக அருகில் இருந்த தனியார் ஆஸ்பத்திரிக்கு கொண்டு சென்றார்கள். அங்கு சிகிச்சை பலன் அளிக்காமல் அவர் மரணம் அடைந்தார்.

அவருடைய உடல் சென்னை நந்தனம் சத்யமூர்த்தி நகரில் உள்ள வீட்டுக்கு கொண்டுவரப்பட்டது. இறுதிச்சடங்குகளுக்குப்பின், நேற்று மாலை 6 மணிக்கு கண்ணம்மாப்பேட்டை சுடுகாட்டில், அவர் உடல் தகனம் செய்யப்பட்டது.

மரணம் அடைந்த இடிச்சபுளி செல்வராஜ், நடிகர் பாண்டுவின் உடன் பிறந்த அண்ணன் ஆவார். அவருக்கு செல்லம்மாள் என்ற மனைவியும், பசந்தி என்ற மகளும் இருக்கிறார்கள்.

தினதந்தி