வருமானவரி விலக்கு உச்சவரம்பு ரூ.2 லட்சமாக உயருகிறது

மாத சம்பளக்காரர்கள் மகிழ்ச்சி அடையும் வகையில், வருமானவரி விலக்கு உச்சவரம்பை ரூ.2 லட்சமாக உயர்த்த மத்திய அரசு பரிசீலித்து வருவதாக தெரிகிறது.

பரிசீலனை

வருகிற 2012-2013-ம் நிதி ஆண்டுக்கான மத்திய பட்ஜெட், 5 மாநில சட்டசபை தேர்தல் ஓட்டு எண்ணிக்கைக்கு பிறகு, மார்ச் மாத தொடக்கத்தில் தாக்கல் செய்யப்படுகிறது. இந்த பட்ஜெட்டில், மாத சம்பளக்காரர்கள் மகிழ்ச்சி அடையும் வகையில், வருமானவரி விலக்கு உச்சவரம்பு ரூ.2 லட்சமாக உயர்த்தப்படும் என்று எதிர்பார்க்கப்படுகிறது.

தற்போது, ஆண்களுக்கான வருமானவரி விலக்கு உச்சவரம்பு ரூ.1 லட்சத்து 80 ஆயிரமாக உள்ளது. இதை ரூ.2 லட்சமாக உயர்த்த மத்திய நிதி மந்திரி பிரணாப் முகர்ஜி பரிசீலித்து வருகிறார்.

பல்வேறு தரப்பில் இருந்து விடுக்கப்பட்ட கோரிக்கைகளை ஏற்று இந்த இனிப்பான செய்தியை அவர் அறிவிக்க உள்ளார்.

மாற்றம்

மேலும், வருமானவரி விகிதங்களும் மாற்றி அமைக்கப்பட இருப்பதாக தெரிகிறது. தற்போது, ரூ.1 லட்சத்து 80 ஆயிரத்தில் இருந்து ரூ.5 லட்சம் வரையிலான ஆண்டு வருமானத்துக்கு 10 சதவீத வரியும், ரூ.5 லட்சத்தில் இருந்து ரூ.8 லட்சம் வரையிலான வருமானத்துக்கு 20 சதவீத வரியும், ரூ.8 லட்சத்துக்கு மேற்பட்ட வருமானத்துக்கு 30 சதவீத வரியும் விதிக்கப்படுகிறது.

இனிமேல், ரூ.2 லட்சத்தில் இருந்து ரூ.5 லட்சம் வரையிலான வருமானத்துக்கு 10 சதவீத வரி விதிக்கப்படும் என்று தெரிகிறது. ரூ.5 லட்சத்தில் இருந்து ரூ.10 லட்சம் வரையிலான வருமானத்துக்கு 20 சதவீத வரியும், ரூ.10 லட்சத்துக்கு மேற்பட்ட வருமானத்துக்கு 30 சதவீத வரியும் விதிக்கப்படும் என்று தெரிகிறது.

பணப்புழக்கம்

கடந்த 2010-ம் ஆண்டு பாராளுமன்றத்தில் தாக்கல் செய்யப்பட்ட மத்திய நேரடி வரிகள் சட்ட மசோதாவின் அடிப்படையில் இந்த சலுகைகள் அறிவிக்கப்படும் என்று மத்திய அரசு வட்டாரங்கள் தெரிவித்துள்ளன.

இந்த சலுகைகள் காரணமாக, மாத சம்பளக்காரர்களிடம் பணப்புழக்கம் அதிகரிக்கும் என்றும் அவ்வட்டாரங்கள் தெரிவித்தன.

தினதந்தி

இந்த ஆண்டு ஆண்களுக்கும் பெண்களுக்கும் ஒரே அளவு வருமான வரி என்று நினைக்கிறேன்