பி.பி.எஃப்.-க்கு எவ்வளவு ரூபாய் வரை வரிச் சலுகை?

பஜாஜ் அலையன்ஸ் இன்வெஸ்ட் பிளஸ் பிரீமியர் பாலிசியில் வருடத்துக்கு பத்தாயிரம் வீதம் இரண்டு வருடங்கள் பிரீமியம் கட்டியுள்ளேன். பாலிசி எடுக்கும்போது மூன்று வருடங்கள் மட்டும் பிரீமியம் கட்டினால் போதும்,

ஐந்தாவது வருடம் ஐம்பதாயிரம் கிடைக்கும் என்று கூறினார்கள். ஆனால், பாலிசியில் இருபத்தைந்து வருடங்கள் பிரீமியம் கட்ட வேண்டும் என்று உள்ளது. நான் இந்த பாலிசியைத் தொடர்ந்து கட்டலாமா? இந்த பாலிசியில் கிடைக்கும் பயன்கள் என்ன?
ஏ.பிரபு, சேலம்.
விவேக் கார்வா, நிதி ஆலோசகர்.
''சந்தையின் ஏற்ற இறக்கங்களுக்கு ஏற்பவே யூலிப் பாலிசிகளின் வளர்ச்சி இருக்கும் என்பதை மறந்துவிட வேண்டாம். மூன்று வருடங்கள் கட்டினால், ஐந்தாவது வருடத்தில் ஐம்பதாயிரம் கிடைக்கும் என்று உங்களுக்குத் தவறான வாக்குறுதி தரப்பட்டிருக்கிறது. பத்தாண்டு காலத்திற்குமேல் யூலிப் பாலிசிகளில் தொடர்ந்து பணம் கட்டும் பட்சத்தில் ஓரளவுக்கு நல்ல லாபத்தை எதிர்பார்க்க முடியும். இதற்கு நீங்கள் தயாராக இல்லை எனில் மூன்றாண்டுகளுக்குப் பிறகு சந்தை ஏறி பாலிசி ஓரளவுக்கு லாபகரமாக ஆகும் சமயத்தில் பாலிசியை சரண்டர் செய்துவிட்டு, டேர்ம் பிளானை எடுத்துக் கொள்ளலாம்.''



எனக்கு வயது 32. எனது 60 வயது வரை மாதம் ஐந்தாயிரம் வீதம் சேமிக்கலாம் என நினைக்கிறேன். இதற்கேற்ற ஃபண்டுகளை குறிப்பிடவும்?
சிவப்பிரகாச வேலன், கரூர்.
செந்தில், நிதி ஆலோசகர்.
''நீண்டகால முதலீட்டில் லார்ஜ்கேப் மற்றும் மிட்கேப் ஃபண்டுகளில் முதலீடு செய்யலாம். ஹெச்.டி.எஃப்.சி. டாப் 200, ஐ.சி.ஐ.சி.ஐ. புரூடென்ஷியல் டிஸ்கவரி போன்ற ஃபண்டுகளில் தலா இரண்டாயிரம் வீதமும், டி.எஸ்.பி. பிளாக்ராக் ஃபண்டில் ரூபாய் ஆயிரம் என பிரித்து முதலீடு செய்து வரவும். நீண்டகால நோக்கில் இந்த ஃபண்டுகளில் நல்ல லாபத்தை எதிர்பார்க்கலாம்.''

என்.இ.எஃப்.டி. மூலம் பணம் பரிவர்த்தனை செய்யும்போது கணக்கு எண் தவறாக கொடுத்ததில், பணம் வேறு ஒருவரின் கணக்கிற்குப் போய் சேர்ந்துவிட்டது.'பெயரை சரிபார்க்காமல் பணத்தை வேறு ஒருவரின் கணக்கில் வரவு வைக்கலாமா?’ என வங்கி மேலாளரிடம் கேட்டால், என்.இ.எஃப்.டி-யில் கணக்கு எண்ணை மட்டும்தான் பார்ப்போம் என்கிறார்கள். இதற்கு தீர்வு என்ன?
முப்புடாதி, திருச்சி.
பத்மநாபன், மேலாளர், இந்தியன் ஓவர்சீஸ் வங்கி.
''என்.இ.எஃப்.டி. மூலமான பணப்பரிமாற்றத்தில் பெயர் குழப்பம் காரணமாகச் சிக்கல் ஏற்பட்டதை அடுத்து ரிசர்வ் வங்கி இந்த நடைமுறையில் மாற்றத்தைச் செய்துள்ளது. அதன்படி கணக்கு எண் மட்டும்தான் இந்த முறையில் பணப் பரிமாற்றத்திற்கு எடுத்துக் கொள்ளப்படும். எனவே, கணக்கு எண்ணை தெளிவாக கொடுக்க வேண்டியது அவசியம்.
பணத்தைத் திரும்பவும் சரியான எண்ணிற்கு மாற்றித் தரும்படி வங்கி மேலாளருக்கு இது தொடர்பாக கடிதம் எழுதினால் மாற்றித் தருவார்கள். இதற்கு ஒருசில வாரங்கள் ஆகலாம்.''


என் வயது 30, இரண்டு குழந்தைகள். நான் 30 லட்ச ரூபாய்க்கு டேர்ம் இன்ஷூரன்ஸ் மற்றும் குடும்பத்திற்கு என்று மூன்று லட்சத்துக்கு மெடிக்ளைம் பாலிசியும் (ஃப்ளோட்டர்) எடுக்க விரும்புகிறேன். இதற்கு பிரீமியம் எவ்வளவு கட்ட வேண்டும்? எத்தனை வருடங்கள் கட்ட வேண்டும்? டேர்ம் பிளான் பாலிசியில் முதிர்வு தொகை திரும்ப கிடைக்குமா?
பி.முத்துஅழகேசன், காஞ்சிபுரம்.
சுந்தரராஜன், வெல்த் மேனேஜர், ஐ.என்.ஜி. வைஸ்யா
''30 லட்ச ரூபாய்க்கு டேர்ம் பிளான் எடுக்கிறபட்சத்தில் பிரீமியம் தொகை வருடத்திற்கு சுமார் ஐந்தாயிரத்துக்குள் கட்ட வேண்டியிருக்கும்.
இன்ஷூரன்ஸ் நிறுவனங்களைப் பொறுத்து இது வேறுபடலாம். டேர்ம் இன்ஷூரன்ஸில் கட்டிய பிரீமியம் தொகை திரும்ப கிடைக்க வேண்டும் என்றால், அதற்கு கூடுதலாக பிரீமியம் தொகை செலுத்த வேண்டும். பொதுவாக முதலீட்டு நோக்கத் துக்கு இந்த பாலிசியை தேர்வு செய்வது சரியல்ல. மெடிக்ளைம் பாலிசியைப் பொறுத்தவரை கணவன், மனைவி இரண்டு குழந்தைகள் கொண்ட குடும்பத்திற்கு 3 லட்ச ரூபாய்க்கு என்றால், ஆண்டிற்கு சுமார் 6,000-திலிருந்து 9,000 ரூபாய் வரை பிரீமியம் தொகை கட்ட வேண்டியிருக்கும். நீங்கள் தேர்ந்தெடுக்கும் நிறுவனங்களுக் கேற்ப பிரீமியத் தொகை வேறுபடலாம்.''

எனது பி.பி.எஃப். கணக்கில் ஆண்டிற்கு 70 ஆயிரம் ரூபாய் கட்டி வருகிறேன். தற்போது எனது மகன் பெயரிலும் கணக்கு தொடங்கி ஆளுக்கு ஒரு லட்சமாக கட்டலாம் என நினைக்கிறேன். இரண்டு பேருக்கும் சேர்த்து அதிகபட்சமாக இவ்வளவுதான் கட்ட வேண்டும் என வரம்புகள் உள்ளதா?
சரவணன், சென்னை.
ஜி.ஆர்.ஹரி, ஆடிட்டர்.
''பி.பி.எஃப். கணக்கை பொறுத்தவரை, வருமான வரிச் சலுகையை பெற ஒரு கணக்கில் அதிகபட்சமாக எழுபதாயிரம் மட்டுமே கட்டலாம் என்கிற உச்சவரம்பு தளர்த்தப்பட்டு தற்போது ஒரு லட்சம் வரை கட்டலாம் என மாற்றம் வந்துவிட்டது.
உங்களது மகன் பெயரில் தனியாக கணக்கு ஆரம்பித்தும் பணத்தைக் கட்டலாம். ஆனால், நீங்கள் கட்டுவதில் ஒரு லட்சத்துக்கு மட்டும்தான் வருமான வரிவிலக்கு பெற முடியும்.''

தகவல் பகிர்வு - தமிழ் வாரஇதழ் செய்திகள்... ARRKAY BLOGSPOT ...