ஓங்காரம் உச்சரிக்கும் முறை

எந்தவொரு வழிபாட்டையும் தொடங்குவதற்கு முன் ஓங்காரத்தை மும்முறை உச்சரித்து விட்டுத்தான் வழிபாடுகளைத் தொடங்க வேண்டும் என ஆகமம் விதித்துள்ளது.
சொற்கள், மந்திரங்கள், நூற்கள் இவையனைத்திற்கும் மூலம் ஓங்காரம்தான். அதிலிருந்து உருவாவதுதான் உலகம். ‘ஓங்காரத்துக்குள்ளே உதிக்கும் சராசரம்’ என்ற திருமந்திர வாக்கு இதனால் எழுந்தது.
ஓங்காரம் மூன்று எழுத்துக்களைக் கூட்டிச் சொன்னது. ஓம் என்ற எழுத்தில் அகரம், உகரம், மகரம் ஆகிய மூன்றெழுத்துக்கள் பிணைந்திருப்பதைக் காணலாம்.
வாயைத் திறந்தவுடன் இயல்பாக எழுவது அகரம்.
அப்படி எழுந்த அகரத்தைக் காப்பாற்றி நிலை நிறுத்த உதடுகளைக் குவித்தோமானால் வருவது உகரம்.
குவித்த உதடுகளை ஒட்டினால் வருவது மகரம்.
அகரம் – படைத்தல்
உகரம் – காத்தல்
மகரம் – ஒடுக்கல் ...........................என்று ஆகின்றன.
இந்த அகரத்திற்கும், உகரத்திற்கும், மகரத்திற்கும் இடையே உதடுகளை, நாக்கை, நாக்கின் அண்ணத்தை விதவிதமாகக் கூட்டியும் விலக்கியும் ஒலி எழுப்பினால் உலகில் உள்ள எல்லாமொழிகளில் உள்ள எழுத்துக்களும் வந்துவிடும். இந்த எழுத்துக்களால் ஆன உலகில் உள்ள எல்லா மொழி நூல்களுக்கும் ஓங்காரமே அடிப்படை.
எனவே ஓங்காரத்துக்குள்ளே எல்லாம் அடக்கம் என்பதைக் காட்டும் வண்ணம் உச்சரிக்க வேண்டும். அதாவது ஓங்காரத்தை ஒலிக்கும்போது அதனுள் படைத்தல், காத்தல், ஒடுக்கல் ஆகிய மூன்றும் அடக்கம் என்பது தோன்ற ஒலிக்க வேண்டும்.
படைக்கும்போது பொருள் சிறியதாய் இருக்கும். காத்து வளர்க்கும்போது பொருள் பெரிதாகும். பெரிதான பொருள் கால கதியில் ஒடுங்கிவிடும். அதுபோல ஓங்காரத்தை தொடங்கும்போது ஒலி குறைவாகவும், அந்த ஒலியை வளர்த்து உரத்தநிலையில் நிறுத்தியும் பிறகு ஒலியை இறக்கிக்கொண்டே வந்து முடிக்கவும் வேண்டும். இவ்வாறு ஓங்காரத்தை மும்முறை உச்சரித்த பின்னர்தான் வழிபாட்டுச் சடங்குகளைத் தொடங்க வேண்டும்.
( நன்றி : சிவனியமும் சால்பியமும் புத்தகம் ).