மாதவன் நாயர் விளக்கம்

பெங்களூரு : ""ஸ்பெக்ட்ரம் விவகாரத்தையும், டிரான்ஸ்பாண்டர் குத்தகை விவகாரத்தையும் போட்டு மக்கள் குழப்பிக் கொள்கின்றனர். ஆன்டிரிக்ஸ் - தேவாஸ் நிறுவன ஒப்பந்தத்தில் பெரிய நஷ்டம் ஏற்பட்டுவிட்டதாகக் கூறுவது தவறு,'' என இஸ்ரோ முன்னாள் தலைவர் மாதவன் நாயர் தெரிவித்துள்ளார்.

மிகவும் குறைந்த விலைக்கு, "எஸ்-பாண்டு' அலைக்கற்றை ஒதுக்கீடு செய்ததில் முறைகேடு நடந்ததாகக் கூறி அவர், அரசு பதவி மற்றும் குழு தலைவர் பதவி வகிக்க, மத்திய அரசு தடை விதித்தது. தன் மீது கூறப்பட்டுள்ள புகாருக்கு, தற்போதைய இஸ்ரோ தலைவர் ராதாகிருஷ்ணன் தான் காரணம் என, மாதவன் நாயர் குறை கூறியிருந்தார்.

இது குறித்து மாதவன் நாயர் கூறியதாவது: ஸ்பெக்ட்ரம் விவகாரத்துக்கும், டிரான்ஸ்பாண்டரை குத்தகைக்கு விட்ட விவகாரத்துக்கும் சம்பந்தமில்லை. இரண்டுக்கும் சம்பந்தம் உள்ளதாக மக்கள் குழம்புகின்றனர். நாங்கள் ஒரு நிறுவனத்துக்கு டிரான்ஸ்பாண்டர்களை அளித்தாலும், அதை அப்லிங் மற்றும் டவுன் லிங்க் செய்வதற்கெல்லாம் தொலைத்தொடர்புத் துறையிடம் லைசென்ஸ் பெற வேண்டும். கடந்த 2009ம் ஆண்டு தேவாஸ் நிறுவனத்துக்கு நாங்கள் டிரான்ஸ்பாண்டர்கள் அளிக்க ஒப்புக் கொண்டாலும், இதுவரை அந்த நிறுவனத்துக்கு லைசென்ஸ் கிடைக்கவில்லை. இதை ஸ்பெக்ட்ரத்துடன் தொடர்புபடுத்தி 20 ஆயிரம் கோடி ரூபாய் நஷ்டம் ஏற்பட்டதாகக் கூறுவது தவறானது.

இஸ்ரோவுக்கு ஓராண்டு பட்ஜெட் ஒதுக்கீடே 4,000 கோடி ரூபாய் தான். இரண்டு டிராஸ்பாண்டர்கள் ஒதுக்கீட்டில் இஸ்ரோவுக்கு 20 ஆயிரம் கோடி ரூபாய் கிடைக்கும் என்றால், அரசின் உதவியே எங்களுக்கு தேவையில்லையே? எனவே, 20 ஆயிரம் கோடி நஷ்டம் ஏற்பட்டது என்று கூறுவதில் அர்த்தமில்லை.

டிரான்ஸ்பாண்டர்களின் தற்போதைய சர்வதேச விலையை கணக்கிட்டு தான் ஒப்பீடு செய்ய வேண்டுமேயொழிய, ஸ்பெக்ட்ரம் என்றாலே ஊழல் என்ற பொருள் கொள்ளக்கூடாது. என்னுடன் சேர்த்து மற்ற மூன்று விஞ்ஞானிகளுக்கும் அரசு பதவி வகிக்கக்கூடாது என்ற தடை நியாயமில்லாதது. எனவே, இதை அரசு புரிந்து கொண்டு உரிய நடவடிக்கை எடுக்க வேண்டும். இவ்வாறு மாதவன் நாயர் கூறினார்.

தினமலர்

சரி என்னமோ சொல்லவர்றாரு.... பாவம். மத்திய அரசு கே்கனுமே!