மனித எந்திரம்

by கவினா Fri Jan 27, 2012 8:55 am

பணத்தை துரத்தி
நீயும் நானும்
ஓடிக்கொண்டே இருக்கிறோம்
தடுக்கி விழுந்தவனை
தூக்கி விடவோ
'சாரி' சொல்லவோ
அவகாசமில்லை நமக்கு.
அவன்
நமது கால் இடறி
விழுந்தவனாய் இருந்தால் கூட.

கைக்கு எட்டாத நாகரிகத்தை
கற்றுக் கொள்வதிலேயே
காலம் தள்ளுகிறோம்.
பொருளோடு பிணைந்ததுதான்
நாகரிகமென்பதை மறந்துபோய்.

உன்வீட்டு விஷேஷத்திற்கு
வந்துபோக எனக்கோ
என் வீட்டு விஷேஷத்திற்கு
வந்துபோக உனக்கோ
நேரமில்லாமல் போய்விட்டது.

இரண்டு சம்பளமென்பதால்
ஞாயிற்று கிழமைகளைகூட
தொழிற்சாலையிலேயே
தொலைத்துவிட்டு வருகிறோம்.

எந்திரங்களுக்குள்
நீயும் நானும்
சக்கையாகிபோனோம்.
அதுவும்
நமது வியர்வையையே
எண்ணெய்யாக தந்து.

இந்த எந்திரவாழ்க்கையில்
பலகோடி எந்திரங்களோடு
மனிதனுமொரு எந்திரமாய்
மழுங்கி போனான்.

நாம்
ஒருவருக்கொருவர்
அந்நியமாகி போனோம்.
உலகமே வீடாக
வாழ்ந்த மனிதனின்று
வீடே உலகமாக
சுருங்கிபோனான்.

இதில்
எப்போதாவது ஒருமுறைதான்
ஒருவரையொருவர் பார்த்து
ஹலோ சொல்லிக்கொள்கிறோம்.

சிரிப்பைகூட
சிக்கனமாய்தான்
செலவு செய்கிறோம்.
ஒரு நாகரிகத்திற்காக.

"எப்படி இருக்கீங்க" என்றால்
"ஏதோ இருக்கேன்" என்கிறோம்
நமது பெருமூச்சின் அர்த்தம்
நாம் விரும்பும் வாழ்க்கை
இது இல்லையென்பதுதானே?

by **ரா.ரா3275** Fri Jan 27, 2012 11:19 am

எவனும் அவன் விரும்பும் வாழ்க்கையை முழுதாய் அமைத்துக் கொண்டதாகவோ -அமைந்துவிட்டதாகவோ ஒப்புக்கொள்ள மாட்டான்...
நிஜம் அதுதான்...இருப்பதைக் கொண்டு சிறப்புடன் வாழ்பவனே யதார்த்த மனிதனாகிப் போனான்...
நல்ல உணர்வு சுந்தரபாண்டி...

by கவினா Fri Feb 03, 2012 10:23 pm

RaRa3275 wrote:எவனும் அவன் விரும்பும் வாழ்க்கையை முழுதாய் அமைத்துக் கொண்டதாகவோ -அமைந்துவிட்டதாகவோ ஒப்புக்கொள்ள மாட்டான்...
நிஜம் அதுதான்...இருப்பதைக் கொண்டு சிறப்புடன் வாழ்பவனே யதார்த்த மனிதனாகிப் போனான்...
நல்ல உணர்வு சுந்தரபாண்டி...

கருத்தைப் பதிவு செய்ததற்கு நன்றி நண்பரே

வாஞ்சையுடன் சுந்தரபாண்டி

by dhilipdsp Fri Feb 17, 2012 9:43 am

உன்வீட்டு விஷேஷத்திற்கு
வந்துபோக எனக்கோ
என் வீட்டு விஷேஷத்திற்கு
வந்துபோக உனக்கோ
நேரமில்லாமல் போய்விட்டது. மகிழ்ச்சி

by sinthiyarasu Thu Mar 01, 2012 3:39 pm

உண்மைதான் நண்பரே, இந்த அவசர உலகினுள் எத்தனையோ அழகிய அவசியமான மனிதப் பண்புகளை மறந்து போய் வாழ்ந்து வருகிறோம் என்பதை நினைத்தால் வருத்தமாகத்தான் இருக்கிறது.