தில்லுமுல்லு கணக்கு காட்ட சிஏ.க்களை தேடும் வேட்பாளர்கள்

பஞ்சாப் சட்டப்பேரவை தேர்தலில்
தில்லுமுல்லு கணக்கு காட்ட சிஏ.க்களை தேடும் வேட்பாளர்கள்




சண்டிகர் : பஞ்சாப் சட்டப்பேரவை தேர்தலில் சார்ட்டர்ட் அக்கவுண்ட்டன்ட்களுக்கு கிராக்கி ஏற்பட்டுள்ளது. உத்தர பிரதேசம், பஞ்சாப் உட்பட 5 மாநில சட்டப்பேரவைக்கு தேர்தல் நடைபெறுகிறது. இத்தேர்தலில் கறுப்பு பணம் நடமாட்டத்தை கட்டுப்படுத்த தேர்தல் ஆணையம் கடும் நடவடிக்கை எடுத்துள்ளது. இந்த கெடுபிடியால், தாராளமாக செலவு செய்ய முடியாமல் வேட்பாளர்கள் திணறி வருகின்றனர்.

பஞ்சாப் சட்டப்பேரவைக்கு வரும் 30ம் தேதி ஒரே கட்டமாக தேர்தல் நடக்கிறது. இதில் போட்டியிடும் வேட்பாளர்கள் அதிகபட்சமாக ரூ.16 லட்சத்துக்கு மேல் செலவு செய்யக்கூடாது என்று தேர்தல் ஆணையம் உத்தரவிட்டுள்ளது. ஆனால், இத்தேர்தலில் கடும் போட்டி நிலவுவதால், இந்த தொகைக்குள் செலவை கட்டுப்படுத்துவது கடினம் என்ற நிலையில், எல்லா முக்கிய கட்சிகளின் வேட்பாளர்களும் உள்ளனர்.

அதே நேரம், நிர்ணயிக்கப்பட்ட இந்த தொகையை விட அதிகம் செலவு செய்ததாக வெற்றி பெற்ற பிறகு தெரிய வந்தால், பதவியை தேர்தல் ஆணையம் பறிக்க முடியும் என்பதையும் அவர்கள் அறிந்துள்ளனர். இதனால், தங்களின் செலவு கணக்கை பராமரிக்க சிஏ.க்களின் (சார்ட்டர்ட் அக்கவுண்ட்டன்ட்) உதவியை வேட்பாளர்கள் நாடியுள்ளனர். செலவு கணக்கை ரூ.16 லட்சத்துக்குள் காட்டுவதற்கான தில்லுமுல்லு வழிகளை இவர்கள் சொல்லி தருகின்றனர்.

ஷானிவால் தொகுதி சிரோணி அகாலி தள வேட்பாளர் சரண்ஜித் சிங் தில்லானின் செலவு கணக்கை பராமரித்து வரும் சிஏ.வான அனுப் ஜெயின் கூறுகையில், ‘’செலவு கணக்கை எப்படி காட்டுவது என வழிகாட்டும்படி, வேட்பாளர்கள் எங்களை தேடி வருகின்றனர். நாங்கள் பராமரிக்கும் வேட்பாளர்களின் செலவு கணக்கை, தேர்தல் பார்வையாளர்கள் பராமரிக்கும் செலவு கணக்குடன் 3 அல்லது 4 நாட்களுக்கு ஒருமுறை சரிபார்த்துக் கொள்கிறோம்.’’ என்றார்.