சங்கரன்கோவில் தொகுதிக்கு இடைத்தேர்தல் எப்போது?

தமிழக தலைமை தேர்தல் அதிகாரி பிரவீன்குமார் பேட்டி
சங்கரன்கோவில் தொகுதிக்கு இடைத்தேர்தல் எப்போது?



சென்னை : தேர்தல் ஆணையத்தின் சார்பில் தேசிய வாக்காளர் தினம், கிண்டி ராஜ்பவன் தர்பார் மண்டபத்தில் நேற்று நடந்தது. தலைமை தேர்தல் அதிகாரி பிரவீன்குமார் வரவேற்றார். ஆளுநர் ரோசய்யா, புதிய வாக்காளர்களுக்கு அடையாள அட்டை வழங்கினார். தேசிய வாக்காளர் உறுதி மொழியை அவர் வாசிக்க, மற்றவர்களும் திரும்ப கூறி உறுதி ஏற்றனர்.

விழாவில் ரோசய்யா பேசுகையில், ‘‘நடந்து முடிந்த சட்டப்பேரவை தேர்தலில் 78 சதவீத வாக்குகள் பதிவானது. இதற்கு தேர்தல் ஆணையத்தின் முயற்சித்தான் காரணம். ஓட்டுபோடுவது ஜனநாயக உரிமை மட்டுமல்ல ஒவ்வொரு தேசபக்தனின் கடமை ஆகும். பேரவை, உள்ளாட்சி தேர்தலுக்கு பிறகு புதிய வாக்காளர் சேர்ப்பு பணி நடந்தது. அதில் விண்ணப்பித்த 38 லட்சம் பேரில் 33 லட்சம் பேருக்கு அடையாள அட்டை வழங்கப்பட்டுள்ளது. ‘‘ஜனநாயகத்தின் நண்பர்கள்’’ என்ற கோஷத்தோடு தேசிய வாக்காளர் தினத்தை கொண்டாடுவோம்’’ என்றார்.

தலைமைச் செயலாளர் தேபேந்திரநாத் சாரங்கி, மாநில தேர்தல் ஆணையர் சோ.அய்யர், கூடுதல் தலைமை தேர்தல் அதிகாரி ராஜேந்திரன் ஆகியோர் கலந்து கொண்டனர். நிகழ்ச்சியில் சென்னை மாநகராட்சி பள்ளி மாணவிகளின் வாக்காளர் விழிப்புணர்வு கலைநிகழ்ச்சியும் மத்திய அரசின் தகவல் ஒளிபரப்புத்துறை சார்பில் விடியல் என்ற விழிப்புணர்வு நாடகம் ஆகியவை நடந்தது.

விழா முடிவில், சங்கரன்கோவில் இடைத்தேர்தல் எப்போது நடைபெறும் என்ற கேள்விக்கு தலைமை தேர்தல் அதிகாரி பிரவீன்குமார் பதிலளிக்கையில், ‘‘சங்கரன்கோவில் தொகுதி இடைத்தேர்தல் ஏப்ரல் 21ம் தேதிக்குள் நடைபெறும். தற்போது 50% பணிகள் முடிந்து விட்டன. இடைத்தேர்தல் தேதியை இந்திய தேர்தல் ஆணையம்அறிவிக்கும். மார்ச், ஏப்ரல் மாதங்களில் 12 மற்றும் 10ம் வகுப்பு பொதுத்தேர்வுகள் உள்ளன. யாருக்கும் இடைஞ்சல் இல்லாமல் தேர்தலை நடத்துவோம்’’ என்றார்.

ஆளுநர் பேட்டி

சென்னை அருகே நெற்குன்றம் பகுதியில் ஐஏஎஸ் அதிகாரிகளுக்கு அடுக்குமாடி குடியிருப்புகள் ஒதுக்கப்பட்டுள்ளதில் முறைகேடு நடந்துள்ளது என்றும் தமிழக தலைமை தகவல் ஆணையர், முறைகேடாக பிளாட் ஒதுக்கீடு பெற்றுள்ளார் என்று உங்களுக்கு புகார் தெரிவிக்கப்பட்டுள்ளதே என்ற கேள்விக்கு ஆளுநர் ரோசய்யா கூறுகையில், ‘‘புகார் குறித்த விபரம் எனது கவனத்துக்கு வந்தால் உரிய நடவடிக்கை எடுக்கப்படும்’’ என்றார்.


தினகரன்