ஏன் வந்து பிறந்தீர்கள்?

மின்னல் வேகத்தில்
என் நெஞ்சத்தை ஆயிரம் கோடரி கொண்டு
பிளந்துவிட்ட பிஞ்சுகளே!
வன்னியில் நீங்கள் பிச்சை எடுக்கிறீர்களா?
அதுவும் ''அம்மா தாயே பிச்சை'' என்று
அண்ணன் தம்பி இருவரும் கத்துகிறீர்களா?

உண்மையாகவே உங்கள் கதறல்
இந்தத் தொலைவிலும்
எந்தன் காதில் ஈட்டிகளாக விழுகிறது!
முளைத்து மூன்று இலைவிட வில்லை
அதற்குள் முழுநேரப் பிச்சைத் தொழிலா?
அப்படித்தான் உங்கள் படத்தின் கீழ்
விளக்கம் போட்டிருக்கிறார்கள்!

சற்றேனும் பொய்க்காத பருவ மழையும்
வற்றாத ஆறு குளங்களும்
சல சலத்து ஓடும் வாய்க்கால்களும்
வானுயர்ந்த மரங்களும் நிறைந்த
பொன் விளையும் வன்னி மண்ணில்
உண்ண ஒரு கவளம் சோறு இல்லையா?

ஓ மறந்து போனேன்!
பொன் விளையும் பூமியைத்தான்
அன்னியர்கள் ஆண்டுக் கணக்காக
பட்டப் பகலிலும் இரவிலும்
சுட்டுச் சுடுகாடாக்கி விட்டார்களே!

பாபப்பட்ட பிறவிகளே! உங்கள்
எலும்பையும் வறண்ட தோலையும்
உலர்ந்துபோன உதட்டையும்
குழிவிழுந்த விழிகளையும்
சூம்பிப்போன கைகளையும்
கூம்பிப்போன வயிற்றையும்
வாடிய முகங்களையும்
பார்த்துவிட்டு ஒரு கணம்

உங்களை சோமாலியா நாட்டுக் குழந்தைகள்
அல்லது எத்தியோப்பிய நாட்டு இளங் குடிமக்கள்
என்றல்லவா முதலில் எண்ணி ஏமாந்து விட்டேன்!
பழக்க தோசம் என்றொன்று இருக்கிறதல்லவா?
எலும்பும் தோலுமான குழந்தைகளைக் கண்டால்
வழக்கமாக அவர்கள் ஏழை ஆபிரிக்க நாட்டின்
வாரிசுகள் என்ற நினைப்புத்தானே வரும்?
அதனால் ஏற்பட்ட தவறு
அப்படி என்னை நினைக்க வைத்து விட்டது!

ஓங்கிக் குரல் எடுத்து
'அம்மா தாயே புண்ணியவாங்களே
வயிறு எரிகிறது நா வரள்கிறது
பிச்சை போடுங்கள் புண்ணியம் கிடைக்கும்''
என்று ஓவென்று அழுகிறீர்களா?

நன்றாக அழுங்கள்!
அழுகைதானே இறைவன் ஏழைகளுக்கு
படைப்புக் காலந்தொட்டு
கேட்காமல் கொடுத்த வரம்!
எனவே நன்றாக அழுங்கள்!

குழந்தைகள் கடவுளின் தோட்டத்தில்
பூத்த பூக்கள் என்றும்
தெய்வம் தந்த பரிசென்றும்
தேவனின் கருணையென்றும் புளுகிய
பொய்யர்கள் எங்கே தொலைந்தார்கள்?

போயும் போயும் முடைநாற்றம்
வீசுகின்ற மூடத்தனத்தை
மொத்தமாகக் குத்தகைக்கு எடுத்துள்ள
தமிழினத்தில் ஏன் வந்து பிறந்தீர்கள்?

செம்புக்கும் கல்லுக்கும் பாலாபிசேகம் செய்து
பன்னீரால் குளிப்பாட்டி பட்டுடை யுடுத்தி
பசி எடுக்கா கடவுளர்க்கு
சர்க்கரைப் பொங்கல் பொங்கி
பாலும், பழமும் பலகாராமும் படைத்து
அர்ச்சனை செய்துவிட்டு
நடமாடும் தெய்வங்களை பட்டினியில் தவிக்க விடும்
மூடர்கள் நிறைந்த தமிழினத்தில்
ஏன்வந்து பிறந்தீர்கள்?

நன்றாக அழுங்கள் அழுதுவிட்டு
ஆவிபோகு முன்னர் மீண்டும் பிறப்புளதேல்
இறைவனிடம் இறைஞ்சுங்கள்
மறந்தும் தமிழினத்தில் மீண்டும்
பிறக்க வேண்டா பெரும் வரம்!

நக்கீரன்

மனதை வருத்துகிறது
இந்த கொடுமை எல்லாம் நாம் சந்திக்க வேண்டும் என்று, தமிழர்களின் விதிதான்

சிவா அண்ணா உண்மையில் வருத்தம் தரும் விசயம்....

நன்றாக அழுங்கள் அழுதுவிட்டு
ஆவிபோகு முன்னர் மீண்டும் பிறப்புளதேல்
இறைவனிடம் இறைஞ்சுங்கள்
மறந்தும் தமிழினத்தில் மீண்டும்
பிறக்க வேண்டா பெரும் வரம்!


ஷிவா அண்ணா.. இந்த பிஞ்சு பிள்ளைகளை பார்த்து நிஜாம்மாவே மீனு அழுதேன்.. இங்கே அழுகுரல் கேட்டது . சதைக்குள்ளே எலும்பு இருக்கும்... இது எலும்புக்கு தோல் போர்த்திய உடம்பு , தாய் தந்தையை இழந்து தவிக்கும் இந்த பிஞ்சுகள் செய்த பாவம் தான் என்னமோ . ..நெஞ்சுக்குள் குளிர்கிறதே,,,, நாம் இங்கு உணவை உண்டு விட்டு ..உடம்பை குறைக்க ஜிம் பண்ணிக்கிட்டு இருக்கோம்..என்ன ஒரு கொடுமை ...பசி எடுக்கா கடவுளுக்கு உணவு.. இங்கே பசி எடுத்தும் உணவில்லா கொடுமை..உண்மையாகவே உங்கள் கதறல்
இந்தத் தொலைவிலும்
எந்தன் காதில் ஈட்டிகளாக விழுகிறது!

இப்படி ரொம்ப அழுது சொன்னாலும் யாரு போயி காப்பாத்துறது நம் தமிழ் மக்களை நானும் வருந்துகிறேன் என்று சொல்லிவிட்டு மூலையில் உட்காருபவர்கள் எத்தனை பேர் அதில் சில பேர் யாராவது முன் வந்தார்களா காப்பாற்ற பழமொழி சரியாகத்தான் இருக்கிறது குரைக்கிற நாய் கடிக்காது என்று வருத்தப்படுகிறவர்கள் வருத்தம் மட்டுமே படுகிறார்கள் அதற்கான முயற்சிகள் எதையும் செய்யவில்லை...... நம் தமிழ் மக்களை காப்பாற்ற வழி கிடைக்காதா ஆண்டவா.......

அழுகுறதுனால நீங்க யாரையும் சிரிக்க வைக்க முடியாது. உங்களால முடிஞ்சா 2 பேரை நீங்கள் அங்கிருந்து காப்பாற்றி கொண்டு வர முடியுமா 100 கோடி பேர்ல 2 பேருக்கு கூட இந்த அக்கரை வரலைனா நாமெல்லாம் என்ன மனுசங்க.............