தங்கம்-வெள்ளி இன்னும் விலை ஏறுமா?

தங்கம்-வெள்ளி இன்னும் விலை ஏறுமா?

தங்கம், வெள்ளிக்கான இறக்குமதி வரியை மீண்டும் உயர்த்தி இருக்கிறது மத்திய அரசு. இதனால் அதிக விலை தந்து தங்கத்தை வாங்க வேண்டியிருக்கிறதே என கவலைப்பட ஆரம்பித்திருக்கின்றனர் மக்கள்.

உலக பொருளாதாரச் சூழ்நிலை காரணமாக கடந்த ஆண்டில் தங்கம், வெள்ளி விலை வரலாறு காணாத அளவுக்கு உயர்ந்தது. இதனால் இவற்றின் மீதான இறக்குமதி வரியை அதிகரித்துள்ளது மத்திய அரசு. இதன் மூலம் அரசாங்கத்திற்கு கூடுதலாக 600 கோடி ரூபாய் வருமானம் கிடைக்கும். இந்தாண்டின் பட்ஜெட் பற்றாக்குறையை சிறிதளவாவது சரிக்கட்ட இது உதவும் என்று நினைக்கிறது மத்திய அரசாங்கம்.

இந்த இறக்குமதி வரியால் தங்கத்தின் விலை உயருமா என சென்னை தங்க நகை மற்றும் வைர வியாபாரிகள் அமைப்பின் தலைவர் ஜெயந்திலால் சலானியிடம் கேட்டோம்.


''முன்பு ஒரு கிராமுக்கு முப்பது ரூபாய் என்று இருந்த இந்த இறக்குமதி வரி தற்போது தங்கத்தின் விலை மதிப்பில் இரண்டு சதவிகிதம் என அதிகரிக்கப்பட்டுள்ளது. வெள்ளியைப் பொறுத்தவரை, ஒரு கிலோவிற்கு 1,500 ரூபாய் என இருந்த இறக்குமதி வரி இப்போது ஒரு கிலோ விலை மதிப்பில் 6% என அதிகரிக்கப்பட்டுள்ளது.

இன்றைய மதிப்பில், ஒரு கிலோ தங்கம் இறக்குமதி செய்ய 28 லட்சம் ரூபாய் தேவை. இதில் இரண்டு சதவிகிதம் வரி எனில் 56,000 ரூபாயும், வாட் 28,000 ரூபாய் என மொத்தம் 84,000 ரூபாய் கட்ட வேண்டி இருக்கும். இதனால் நகை வியாபாரிகளுக்கோ, அரசுக்கோ கவலையில்லை. காரணம், உயர்த்தப்பட்ட வரிக்கான தொகையை பொருளின் மீது ஏற்றிவிடுவார்கள். இதனால் பொருளின் விலை அதிகரிக்கும். இந்த வரி உயர்வால் பாதிக்கப்படப் போவது மக்கள்தான்.


மேலும், கள்ளக் கடத்தல் மூலமாக தங்கத்தை வெளிநாடு களிலிருந்து இறக்குமதி செய்ய வாய்ப்பிருக்கிறது. முன்பு அதிகளவில் இருந்த இந்த கள்ளக் கடத்தல் சமீபத்தில்தான் கட்டுக்குள் கொண்டு வரப் பட்டது. மீண்டும் அந்த அபாயம் அதிகரிக்க வாய்ப்புள்ளது. இதனால் அரசுக்கு வருவாய் இழப்பு ஏற்படும்.

ஏற்கெனவே தங்கம் விலை அதிகமாக உயர்ந்திருப்பதால், அதை வாங்க முடியாமல் தவிக்கிறார்கள் நடுத்தர மக்கள். இப்போது வந்திருக்கும் இந்த வரியால் மக்களுக்கு கூடுதல் சுமைதான்!'' என்றார்.இந்த இறக்குமதி வரியால் தங்கம் விலை உயருமா என மும்பை 'காம்டிரென்ட்ஸ் ரிஸ்க் மேனேஜ்மென்ட் சர்வீஸஸ்’ நிறுவனத்தின் நிர்வாக இயக்குநர் ஞானசேகர் தியாகராஜனிடம் கேட்டோம்.


''இந்த இறக்குமதி வரியால் தங்கம், வெள்ளி விலை உயரும் என்பது உண்மையல்ல. உலக பொருளாதாரக் காரணிகளே தங்கத்தின் விலையை தீர்மானிக்கின்றன. முதலீட்டு அடிப்படையில் கமாடிட்டி, இ-கோல்டு, இ-சில்வர் போன்றவைகள் மூலம் முதலீடு செய்பவர்களுக்கு இதனால் பாதிப்பு இருக்காது. ஆனால், ஆபரணத் தங்கம் வாங்குபவர்கள் இந்த இரண்டு சதவிகித இறக்குமதி வரிக்கான பணத்தைக் கட்டத்தான் வேண்டும்.

இந்த வரியால் 'அண்டர் இன்வாய்ஸிங்’ அதிகளவில் நடக்க வாய்ப்புண்டு. அதாவது, நூறு கிலோ தங்கத்தை வாங்கி விட்டு ஐம்பது கிலோதான் வாங்கியதாக பில் போடுவது. தவிர, கள்ளக் கடத்தல் அதிகரிக்கவும் செய்யும். இந்த வரியால் ஆபரணத் தங்கம் வாங்குபவர்களுக்கு கூடுதல் சுமை என்றாலும், தங்கம் மற்றும் வெள்ளியின் விலை அதிகரிக்காது'' என்றார்.தங்கம் விலை இத்தனை உயர்ந்திருக்கும் இந்த சமயத்தில் மத்திய அரசு இப்படி வரி விதிப்பது சரியில்லை.

-பானுமதி அருணாசலம்

தகவல் பகிர்வு - தமிழ் வாரஇதழ் செய்திகள், நன்றி விகடன்...