16,000 கிலோ சிக்கன் பிரியாணி தயாரித்து 40 ஆயிரம் பேருக்கு விருந்து- சமையல் கலைஞர் தாமோதரன் கின்னஸ் சாதனை நிகழ்த்துகிறார்

by **இளமாறன்** Sat Jan 21, 2012 11:36 pm

பிரியானி வாசனைன்னா சும்மாவா....?குப்புன்னு ஆளையே தூக்குதுப்பா... என்று ரோட்டோரங்களில் நடந்து செல்லும்போதே கடையை பார்க்காமல் கிறங்கி போவதுண்டு. ஆனால் பிரியாணி வாசனையே அறியாத கிராம மக்களும் இருக்கிறார்கள். அதுவும் “தலப்பாகட்டு” முதல் தள்ளுவண்டி வரை... பலவகை பிரியாணிகளுக்கு புகழ் பெற்ற சென்னைக்கு அருகிலேயே தான் அந்த கிராமம்.

தாம்பரத்தில் இருந்து 10 கிலோ மீட்டர் தொலைவில் இருக்கும் இந்த கிராமம் விவசாய பூமி. இப்போதுதான் நகரத்து வாசனை மெல்ல மெல்ல வீசத்தொடங்கி இருக்கிறது. அதனால்தான் படப்பை வாசிகள் பெரும்பாலானவர்கள் இதுவரை பிரியாணி வாசனையை அறிய வில்லை போலும்.

பிரபல சமையல் கலைஞர் தாமோதரன் இந்த கிராமத்தினரின் பிரியாணி ரசனையை அறிந்து கொள்வதற்காக ஒரு சர்வே நடத்தினார். அப்போதுதான் அந்த கிராமத்தினர் பிரியாணியை ருசித்ததில்லை என்பதை அறிந்தார்.

லட்சக்கணக்கானவர்களுக்கு தன் கைவண்ணத்தில் விருந்து படைத்து கிறங்கடிக்கும் தாமோதரன் படப்பை வாசிகள் பலர் பிரியாணி வாசனை அறியாததை கேட்டு அதிர்ந்து போனார். உடனே படப்பை கிராமத்தினருக்கு பிரியாணி விருந்து படைக்க வேண்டும் என்று மனதுக்குள் முடிவெடுத்தார். வருகிற மார்ச் மாதம் 17-ந்தேதி இந்த பிரமாண்டமான பிரியாணி விருந்து படப்பை கிராமத்தில் நடக்கிறது.

4 ஆயிரம் கிலோ சிக்கன், 4 ஆயிரம் கிலோ அரிசி, 4,500 கிலோ காய்கறிகள் மற்றும் பொருட்களுடன் 16 ஆயிரம் கிலோ சிக்கன் பிரியாணி தயார் செய்ய முடிவு செய்துள்ளனர். இதற்காக 2 கிலோ மீட்டர் நீளத்துக்கு மிகப்பிரமாண்ட சமையல் கூடம் தயார் செய்யப்படுகிறது. 350 அண்டாக்களில் பிரியாணி தயார் செய்யப்படும். 10 அடி இடைவெளியில் ஒவ்வொரு அண்டாவும் வைக்கப்பட்டு இருக்கும்.

இந்த ராட்சத சமையலில் தாமோதரனுடன் சமையல் கலை கல்லூரி மாணவர்கள் 30 பேரும் ஈடுபடுகிறார்கள். காலை 6 மணி முதல் இரவு 8 மணி வரை கிராம மக்கள் 40 ஆயிரம் பேர் பிரியாணி சாப்பிடுவார்கள் என்று எதிர்பார்க்கப்படுகிறது.

ஓட்டல் மானேஜ்மென்டில் டாக்டர் பட்டம் பெற்ற முதல் இந்தியர் என்ற பெருமைக்குரியவர் தாமோதரன். ஏற்கனவே 24 மணி நேரத்தில் 617 வகையான உணவு தயாரித்து கின்னஸ் சாதனை படைத்துள்ளார். படப்பையில் அரங்கேறப்போகும் பிரியாணி விருந்தும் அவரது கின்னஸ் சாதனையில் இடம் பிடிக்கும் என்று கருதப்படுகிறது. இன்னும் 2 மாதத்தில் பிரமாண்டமான பிரியாணி விருந்து ரெடி! சாப்பிட நீங்க ரெடியா...?

மாலைமலர்