மின்திருட்டில் சிக்கிய 17,773 பேர் : ரூ.107.48 கோடி அபராதம் வசூல்

**இளமாறன்** · **இளமாறன்** Sat Jan 21, 2012 12:50 am

தமிழகத்தில், கடந்த மூன்று ஆண்டுகளில், மின்சாரம் திருடியதற்காக அபராதம் செலுத்தியவர்களின் எண்ணிக்கை, 17 ஆயிரத்து, 773. இவர்களிடம் இருந்து, 107.48 கோடி ரூபாயை அபராதமாக, மின்வாரியம் வசூலித்து உள்ளது.

* தொழிலகங்கள் மற்றும் வீடுகளில், மீட்டர்களை சேதப்படுத்தி மின் திருட்டு; 8,449 பேர் சிக்கினர்; 56.38 கோடி ரூபாய், அபராதம் வசூல்.

* வீட்டு உபயோகத்திற்காக வழங்கப்பட்ட மின் இணைப்பில், பிற உபயோகங்கள்; 5,543 பேர் சிக்கினர்; 19.88 கோடி ரூபாய் வசூல்.

* குடிசைகளுக்கு வழங்கப்பட்ட இலவச மின்சாரத்தை, முறைகேடாக பயன்படுத்திய வகையிலும், இலவச மின்சாரத்தை, அங்கீகரிக்கப்பட்ட அளவிற்கு மேலாக பயன்படுத்திய வகையிலும்; 111 பேர் சிக்கினர்; 7.69 லட்சம் ரூபாய் அபராதம் வசூல்.

* இதர பிரிவுகளில் சிக்கியவர்களிடமும் அபராதம் வசூலிக்கப்பட்டது. இந்த நடவடிக்கைகள் மூலம், மின்சாரத்தை திருடியவர்களுக்கு, அபராதம் மட்டுமே விதிக்கப்பட்டுள்ளது; சிறை தண்டனை வழங்கப்படவில்லை. இதனால், அபராதத்தை கட்டிய பலர், மீண்டும் மின் திருட்டில் தொடர்ந்து ஈடுபட்டு வருகின்றனர்.

சட்டம் கடுமையாக வேண்டும் : இதுகுறித்து, ஓய்வுப் பெற்ற மின்வாரிய அதிகாரி ஒருவர் கூறியதாவது: மின் திருட்டுக்கு சிறை தண்டனை வழங்கும் முறை, பல ஆண்டுகளுக்கு முன் இருந்தது. சட்டத்தில் உள்ள ஓட்டைகளை பயன்படுத்தி, இதிலிருந்து பலர் தப்பினர். மின் திருட்டு குறித்த பல வழக்குகளில், மின்வாரியத்திற்கு சாதகமாக தீர்ப்பு வரவில்லை.

இதற்கு, போதிய அளவு சாட்சிகள் இல்லாதது; குறிப்பிட்ட காலக் கெடுவிற்குள் சார்ஜ் ஷீட் போடாதது; குற்றத்தை நிரூபிக்க தேவையான ஆவணங்கள் தராமல் இருப்பது போன்றவையே காரணம். இந்நிலையில், கடந்த 2003ல், மின் திருட்டு குறித்த விஷயத்தில், புதிய சட்டம் அறிமுகப்படுத்தப்பட்டது. அதன்படி, மின் திருட்டில் ஈடுபடுவோருக்கு, கூடுதல் அபராதம் விதிக்கும் முறை பின்பற்றப்பட்டு வருகிறது.

மின் திருட்டை முற்றிலுமாக தடுக்க, சட்டத்தை கடுமையாக்க வேண்டும். அதேசமயம், குற்றவாளிகள் தப்பாமல் இருக்க தேவையான ஏற்பாடுகளையும், மின் வாரியம் யோசிக்க வேண்டும். இவ்வாறு அவர் கூறினார்.

தினமலர்